Yehowa—Nzambi udi ulongesha
“Buonso buabu nebikale balongeshibue kudi Yehowa.”—YONE 6:45, NW.
1. Nkuepi kuvua Yezu muenze bishima, ne ntshinyi tshidiye wenza mpindieu ku muaba eu?
YEZU KRISTO utshivua ufuma ku dienza bishima ne mpindieu mbamumone ulongesha mu nsunagoga mu Kapernauma, pabuipi ne Mbuu wa Galileya. (Yone 6:1-21, 59) Bavule badi baleja dipanga ditabuja padiye wamba ne: “Ndi mufume mu diulu.” Badi banungana bamba ne: “Muntu ewu ki nYezu, muana wa Yozefu anyi? Tatuende ne mamuende se tudi babamanye. Kadi mmunyi mudiye mua kuamba mpindiewu ne: Ndi mufume mu diulu?” (Yowanese 6:38, 42, MMM) Pa kubatobolola, Yezu udi umanyisha ne: “Muntu kena mua kulua kundi padi Tatu udi muntume kayi mumusake, kabidi meme nemmubishe dituku dia nshikidilu.”—Yowanese 6:44, MMM.
2. Nnshindamenu kayi udiku bua kuitabuja dilaya dia Yezu didi ditangila dibiishibua?
2 Ndilaya kayipu dia mpatshi—kubiishibua dituku dia nshikidilu, pakokesha Bukalenge bua Nzambi! Tudi mua kueyemena dilaya edi bualu ndijadika kudi Tatu, Yehowa Nzambi. (Yobo 14:13-15; Yeshaya 26:19) Eyowa, Yehowa, údí ulongesha ne: bafue nebabiike, udi “mulongeshi mutambe buonso bunene.” (Yobo 36:22, nkudimuinu wa Today’s English Version) Pa kutuma ntema ku dilongesha dia Tatu, Yezu udi wamba pashishe ne: “Mbafunde mu Baprofete [se:] ‘Ne buonso buabu nebikale balongeshibue kudi Yehowa.’”—Yone 6:45, NW.
3. Nnkonko kayi ituakonkonona?
3 Bushuwa, nebikale disanka pa kuikala munkatshi mua aba bavua muprofete Yeshaya mufunde bualu buabu ne: “Bana bebe buonso nebikale bantu balongeshibue kudi Yehowa.” (Yeshaya 54:13, NW) Tudi mua kulua petu nanku anyi? Mbanganyi badi bu bana bende ne bapete malongesha ende? Mmalongesha kayi a mushinga a Yehowa atudi ne bua kumanya ne kutumikila bua kupeta dibenesha diende? Mmushindu kayi uvua Yehowa ulongesha ku kale, ne utshidi ulongesha bia muomumue lelu anyi? Eyi ke nkonko ituakonkonona.
Tatu, Mulongeshi, Bayende
4. Mbanganyi bavua bana ba Yehowa ba kumpala ku dipeta malongesha ende?
4 Yehowa wakalua diambedi Tatu ne Mulongeshi pakafukaye Muanende mulela-umuepele, Yezu kumpala kua kuluaye pa buloba. Yeye eu udi ubikidibua “Dîyi” bualu udi Tshikuma-mbila Munene wa Yehowa. (Yone 1:1, 14; 3:16) Dîyi wakasadila “ku luseke lua [Tatu] bu muena mudimu wa dilambu,” ne wakalongela bimpe ku dilongesha dia Tatuende. (Nsumuinu 8:22, 30, NW) Bushuwa, wakalua Tshiamu tshia mudimu, tshivua Tatu mutumike natshi bua kufuka bintu bikuabo bionso ku butuangaji buatshi, kusangisha ne “bana balume ba Nzambi” ba-spiritu. Mmushindu kayipu uvuabu ne bua kusanka pa kulongeshibua kudi Nzambi! (Yobo 1:6; 2:1; 38:7; Kolosai 1:15-17) Pashishe, muntu wa kumpala, Adama, wakafukibua. Yeye pende uvua “muana [wa balume] wa Nzambi,” ne Bible udi uleja ne: Yehowa wakamulongesha.—Luka 3:38; Genese 2:7, 16, 17.
5. Ndisanka kayi dia mushinga mukole diakajimija Adama, mbanganyi bakuabu bavua Yehowa mulongeshe, ne mbua tshinyi?
5 Bia dibungama, Adama, ku dipanga butumike ku budisuile, wakajimija muabi wa kutungunuka ne kuikala muana wa Nzambi. Nunku, ndelanganyi yende kayivua mua kuamba muvuayi ne malanda a kuikala bana ba Nzambi mashila amu pa diledibua tshianana. Pabi, Yehowa wakalongesha bantu bapange bupuangane bavua bakeba dibalombola diende. Tshilejilu, Nowa, wakaleja muvuaye “muntu muakane,” “wakenda ne Nzambi mulelela,” ne nunku Yehowa wakalongesha Nowa. (Genese 6:9, 13–7:5, NW) Ku butumike buende, Abrahama wakaleja muvuaye “mulunda wa Yehowa,” ne nunku yeye pende wakalongeshibua kudi Yehowa.—Yakobo 2:23, NW; Genese 12:1-4; 15:1-8; 22:1, 2.
6. Nnganyi wakangatshibua kudi Yehowa bu “muanende,” ne uvua mulongeshi wa mushindu kayi buabu?
6 Bidimu bivule pashishe, mu matuku a Mozese, Yehowa wakadia malanda a tshiovo ne ditunga dia Izalele. Bu tshipeta, ditunga adi diakalua tshisamba tshiende tshisungula ne tshiakangatshibua bu “muanende wa balume.” Nzambi wakamba ne: ‘Izalele udi muananyi wa balume.’ (Ekesode 4:22, 23; 19:3-6; Dutelonome 14:1, 2) Bashindamene pa malanda a tshiovo aa, bena Izalele bavua mua kuamba, bu mudibi bifunda kudi muprofete Yeshaya ne: “Wewe, Yehowa, udi Tatu wetu.” (Yeshaya 63:16) Yehowa wakakumbaja majitu ende a bu-tatu ne wakalongesha bana bende, Izalele, ne dinanga. (Musambu wa 71:17; Yeshaya 48:17, 18) Bushuwa, pakaluabo bapangi ba lulamatu, wakabasengelela ne luse luonso ne: “Nuenu bana badi batomboke, pinganayi.”—Yirmeya 3:14, MMM.
7. Mmalanda kayi avua nawu Izalele ne Yehowa?
7 Bu tshipeta tshia malanda a tshiovo ne Izalele, Yehowa wakalua kabidi mu ngakuilu wa mu tshimfuanyi Bayende wa tshisamba, ne tshiotshi tshiakavua mukajende wa mu tshimfuanyi. Muprofete Yeshaya wakafunda buatshi ne: ‘Bua Mufuki webe udi bayebe, Yehowa wa misumba ndîna diende.’ (Yeshaya 54:5; Yelemiya 31:32) Nansha muvua Yehowa mukumbaje ne bunême buonso mudimu wende bu Bayende, tshisamba tshia Izalele tshiakalua mukaji udi kayi lulamatu. ‘Bu mudi mukaji utungila bayende tshitungu bua kumuka kudiye,’ ke muakamba Yehowa, ‘nunku nuenu ba mu bena Izalele nuakuntungila tshitungu muomumue.’ (Yelemiya 3:20) Yehowa wakatungunuka ne kusengelela bana ba mukajende mupange lulamatu; wakatungunuka ne kuikala “Mushidimunyi wabu Munene.”—Yeshaya 30:20, NW; 2 Kulondolola 36:15.
8. Nansha muakimanshibua Izalele bu tshisamba kudi Yehowa, mmukaji wa tshilejilu wa mu tshimfuanyi kayi udiye nende?
8 Ndekelu wa bionso, Izalele pakimanshaye ne kushipa Muanende, Yezu Kristo, Nzambi wakamuimansha pende. Nunku, tshisamba tshia bena Yuda atshi katshitshivua kabidi mukajende wa mu tshimfuanyi, ne yeye katshitshivua kabidi Tatu ne Mulongeshi wa bana bende batomboke. (Matayo 23:37, 38) Kadi, Izalele uvua amu mukaji wa tshilejilu, anyi wa mu tshimfuanyi. Mupostolo Paulo wakatela Yeshaya 54:1 (MMM), udi wakula bua “mukaji nkumba” udi mushilangane ne muabulukangane ne “mukaji udi kua mulume,” tshisamba tshia ku tshilelelu tshia Izalele. Paulo udi usokolola ne: bena nkristo bela manyi mbana ba “mukaji nkumba,” udiye ubikila ne: “Yeruzaleme wa mu diulu.” Mukaji eu wa tshilejilu wa mu tshimfuanyi mbulongolodi bua Nzambi bua mu diulu buenza kudi bifukibua bia mu nyuma.—Bena Ngalata 4:26, 27, MMM.
9. (a) Yezu uvua ufunkuna nganyi pakakulaye bua ‘bana bebe nebikale balongeshibue kudi Yehowa’? (b) Mpa nshindamenu kayi padi bantu balua bana ba Nzambi ba mu nyuma?
9 Nunku, mu nsunagoga wa ku Kapernaume, pavua Yezu mutele mulayi wa Yeshaya ne: “Bana bebe buonso nebikale bantu balongeshibue kudi Yehowa,” uvua wakula bua aba bavua ne bua kulua “bana ba balume” ba “Yeruzaleme wa mu diulu,” bulongolodi bua mu diulu bua Nzambi budi bu mukajende. Pa kuitaba malongesha a muleji-mpala wa Nzambi wakafumina mu diulu, Yezu Kristo, bateleji bena Yuda abu bavua mua kulua bana ba mukaji nkumba wa kumpala wa mu diulu wa Nzambi ne kuenza “tshisamba tshinsantu,” “Izalele wa Nzambi” wa mu nyuma. (1 Petelo 2:9, 10, NW; Galatia 6:16, NW) Pa kumvuija diakalenga dinene divua Yezu mupeteshe bua kulua bana ba mu nyuma ba Nzambi, mupostolo Yone wakafunda ne: “Wakalua muabu, kadi bena tshisamba tshiende kabakamuakidila. Kadi, aba buonso bakamuakidila, wakabapesha bukenji bua kulua bana ba Nzambi, bualu bavua benza midimu ya ditabuja mu dîna diende.”—Yone 1:11, 12, NW.
Malongesha a mushinga a Yehowa
10. Diakamue kunyima kua buntomboji mu Edene, ntshinyi tshiakalongesha Yehowa pa bidi bitangila “dimiinu,” ne nnganyi uvua Dimiinu adi?
10 Yehowa, bu Tatu muena dinanga, udi umanyisha bana bende malongolola ende. Nanku, pakafikisha muanjelu ntomboji kampanda bantu babidi ba kumpala ku bupidia, Yehowa wakamanyisha diakamue tshivuaye ne bua kuenza bua kukumbaja dilongolola diende dia kuvuija buloba mparadizu. Wakamba ne: uvua ne bua kuteka lukuna pankatshi pa “nyoka wa kale,” Satana Diabolo, “ne mukaji.” Pashishe wakumvuija ne: “dimiinu” dia mukaji divua ne bua kuboza Satana bua kumushipa, “ku mutu.” (Genese 3:1-6, 15; Buakabuluibua 12:9; 20:9, 10) Anu bu mutukadi babimone, mukaji—wakafunkunyibua pashishe bu “Yeruzaleme wa mu diulu”—mbulongolodi bua mu diulu bua Nzambi bua bifukibua bia mu nyuma. Kadi “dimiinu” diende nnganyi? N’Yezu Kristo, Muana wa Nzambi, eu wakatumibua kumbukila mu diulu ne eu wabutula ndekelu wa bionso Satana.—Galatia 4:4; Ebelu 2:14; 1 Yone 3:8.
11, 12. Mmunyi muakumvuija Yehowa mu bualabale dilongesha diende dia mushinga mukole didi ditangila “dimiinu”?
11 Yehowa wakumvuija mu bualabale dilongesha dia mushinga edi divua ditangila “dimiinu” pakalayaye Abrahama ne: “Nemvudije ndelanganyi yebe bu mitoto ya kulu . . . Bisamba bionso bia pa buloba nebipetele diakalenga kudi ndelanganyi yebe.” (Tshibangidilu 22:17, 18, MMM) Yehowa wakatumika ne mupostolo Paulo bua kumvuija ne: Yezu Kristo ke Dimiinu dilaya dia Abrahama, kabidi ne: bakuabu bavua ne bua kulua tshitupa tshia dimiinu edi. “Binuikala ba Kristo,” ke muakafunda Paulo, “nudi bushuwa dimiinu dia Abrahama, bena bumpianyi bilondeshile dilaya.”—Galatia 3:16, 29, NW.
12 Yehowa wakasokolola kabidi ne: Kristo, Dimiinu, uvua ne bua kufumina mu mulongo wa bakalenge ba Yuda, kabidi ne: “butumike bua bisamba bionso nebuikale buende.” (Genese 49:10, NW) Pa bidi bitangila Mukalenge Davidi wa mu tshisa tshia Yuda, Yehowa wakalaya ne: ‘Nenjadike mulongo wa tunkanunuina tuende bua wikaleku tshiendelele, nenjadike nkuasa webe wa bukalenge bua ikaleku bu mudi diulu dikalaku ne matuku adi. Milongo ya tunkanunuina tuende neyilondangane kashidi, nkuasa wende wa bukalenge neikaleku ku mpala kuanyi bu mudi dîba tshiendelele.’ (Musambu wa 89:3, 4, 29, 36) Pakamanyisha muanjelu Gabriele diledibua dia Yezu, wakumvuija ne: muana uvua Mukokeshi musungula wa Nzambi, Dimiinu dia Davidi. “Muine eu neikale munene, ne nebamubikile ne: Muana wa Mutambe Kutumbuka,” ke muakamba Gabriele, “ne Yehowa Nzambi neamupeshe nkuasa wa bumfumu wa tatuende, Davidi, . . . ne bukalenge buende kabuena ne nshikidilu.”—Luka 1:32, 33, NW; Yeshaya 9:6, 7; Danyele 7:13, 14.
13. Bua kupeta dibenesha dia kudi Yehowa, mmunyi mutudi ne bua kuandamuna ku dilongesha diende?
13 Bua kupeta dibenesha dia kudi Yehowa, tudi ne bua kumanya ne kutumikila dilongesha edi dia mushinga pa bidi bitangila Bukalenge bua Nzambi. Tudi ne bua kuitabuja ne: Yezu wakafuma mu diulu, ne: udi Mukalenge musungula wa Nzambi—Dimiinu dia bukalenge dialombola diasuludibua dia Mparadizu pa buloba—kabidi ne: neabiishe bafue. (Luka 23:42, 43; Yone 18:33-37) Pavua Yezu wakula mu Kapernaume bua dibiisha bafue, bivua ne bua kuikala bijadikibue kudi bena Yuda ne: uvua wamba bulelela. Eyowa, amu mbingu mikese kumpala, pamu’apa amu mu Kapernaume, ukavua mubiishe muana wa bakaji wa bidimu 12 wa muludiki wa nsunagoga! (Luka 8:49-56) Bushuwa tudi petu ne kabingila kakumbane bua kuitabuja ne kuenza malu mu diumvuangana ne dilongesha dipeteshi dia ditekemena dia Yehowa pa bidi bitangila Bukalenge buende!
14, 15. (a) Yezu udi wangata Bukalenge bua Yehowa ne mushinga kayi? (b) Ntshinyi tshitudi ne bua kumvua bua kupeta mushindu wa kumvuija malu adi atangila Bukalenge bua Yehowa?
14 Yezu wakafila muoyo wende wa pa buloba bua kulongesha pa bidi bitangila Bukalenge bua Yehowa. Wakavuija dilongesha edi tshiena-bualu tshia mudimu wende, ne wakalongesha nansha balondi bende bua babusambidile. (Matayo 6:9, 10; Luka 4:43) Bena Yuda ba ku tshilelelu bavua mua kulua ‘bana ba bukalenge,’ kadi bua dipanga kuitabuja diabo, bavule ba kudibu bakabula disanka adi. (Matayo 8:12; 21:43) Yezu wakamanyisha ne: amu “kasumbu kakese” ke kadi kapeta diakalenga dia kulua ‘bana ba bukalenge.’ “Bana” aba badi balua “bena bumpianyi bumue ne Kristo” mu Bukalenge buende bua mu diulu.—Luka 12:32, NW; Matayo 13:38; Bena Roma 8:14-17, MMM; Yakobo 2:5.
15 Kristo neangate mu diulu bena bumpianyi ba bukalenge bungi munyi bakokesha nende buloba? Amu bantu 144 000, bilondeshile Bible. (Yone 14:2, 3; 2 Timote 2:12; Buakabuluibua 5:10; 14:1-3; 20:4) Kadi Yezu wakamba ne: uvua ne “mikoko mikuabo,” bikala bakokedi ba pa buloba ba bukokeshi bua Bukalenge abu. Buobu aba nebalabule makanda a mubidi ne ditalala bipuangane bua kashidi mu mparadizu wa pa buloba. (Yone 10:16; Musambu wa 37:29; Buakabuluibua 21:3, 4) Tudi ne bua kumvua bua kupeta mushindu wa kumvuija dilongesha dia Yehowa pa bidi bitangila Bukalenge.
16. Ndilongesha kayi dia mushinga dia Yehowa ditudi ne bua kulonga ne kutumikila?
16 Mupostolo Paulo wakafunkuna dilongesha dikuabu dia Yehowa dia mushinga mukole. Wakamba ne: “Nuenu nudi bayishibue kudi Nzambi bua kunangangana.” (1 Tesalonike 4:9) Bua kulengelela Yehowa, tudi ne bua kuleja dinanga dia mushindu’eu. “Nzambi udi dinanga,” ke mudi Bible wamba, ne tudi ne bua kuidikija tshilejilu tshiende tshia dileja dinanga. (1 Yone 4:8; Efeso 5:1, 2) Bia dibungama, bantu ba bungi mbapange bushuwa kulonga bua kunanga bantu nabu bu mudi Nzambi utulongesha bua kunanga. Bidi munyi buetu? Tukadi bandamune ku dilongesha edi dia Yehowa anyi?
17. Nngikadilu wa nganyi utudi ne bua kuidikija?
17 Bidi ne mushinga bua tuetu kuteleja ne ntema malongesha wonso a Yehowa. Tuikalayi ne mmuenenu wa bafundi ba misambu ba mu Bible bakafunda ne: ‘Yehowa, ummanyishe bienzedi biebe; unyishe njila yebe. Undombole biebe mu bulelela buebe, unyishe.’ ‘Unyishe mikenji yebe mifunda. Unyishe dijingulula dimpe dia malu ne meji . . . Unyishe mêyi ebe majalame.’ (Musambu wa 25:4, 5; 119:12, 66, 108) Bikala nyanji yebe ya muomumue ne ya bafundi ba misambu, udi mua kuikala munkatshi mua musumba munenanenayi wa bantu badi balongeshibue kudi Yehowa.
Musumba munene wa balongesha
18. Ntshinyi tshiakadianjila kumanyisha muprofete Yeshaya tshivua ne bua kuenzeka mu tshikondo tshietu?
18 Muprofete Yeshaya wakadianjila kumanyisha tshivua ne bua kuenzeka mu tshikondo tshietu etshi: “Nebikale ne bua kuenzeka mu tshitupa tshia matuku a ndekelu se: mukuna wa nzubu wa Yehowa neujadikibue ku mutu kua nsongo ya mikuna, . . . Bushuwa bantu bavule nebayeku ne nebambe ne: ‘Vuayi ne tubandayi ku mukuna wa Yehowa, ku nzubu wa Nzambi wa Yakobo; ne neatulongeshe njila yende.’” (Yeshaya 2:2, 3, NW; Mika 4:2) Bantu balongesha kudi Yehowa aba mbanganyi?
19. Mbanganyi badi babadibue lelu’eu munkatshi mua aba badi balongeshibue kudi Yehowa?
19 Mbakuabu bashilangane ne aba bikala ne bua kukokesha mu diulu pamue ne Kristo. Anu bu mutukadi bamane kubimona, Yezu wakamba ne: uvua ne “mikoko mikuabo”—bakokedi ba Bukalenge ba pa buloba—kusakidila ku “kasumbu kakese” ka bena bumpianyi bua Bukalenge. (Yone 10:16; Luka 12:32) “Musumba munene,” wa badi bapanduka ku “dikenga dinene,” mbena mu tshisumbu tshia mikoko mikuabo, ne badi basanka bua dianyishibua diabu kumpala kua Yehowa diashila pa ditabuja diabu mu mashi mapumuna a Yezu. (Buakabuluibua 7:9, 14) Nansha mudi mikoko mikuabo kabayi basangishibue buludiludi munkatshi mua “bana” badi Yeshaya 54:13 mutela, mbabeneshibue pa kuikala balongeshibue kudi Yehowa. Nunku, badi ne kabingila ka kubikila Nzambi bu “Tatu” bualu, neikale bushuwa, Kakuabu, ku butuangaji bua “Tatu wa Tshiendelele,” Yezu Kristo.—Matayo 6:9; Yeshaya 9:6.
Mushindu udi Yehowa ulongesha
20. Mmu mishindu kayi mudi Yehowa ulongesha?
20 Yehowa udi ulongesha mu mishindu mivule. Tshilejilu, udi wenza nunku ku diambuluisha dia midimu yende ya bufuki, idi ijadika dikalaku diende ne meji ende a bungi. (Yobo 12:7-9; Musambu wa 19:1, 2; Lomo 1:20) Kusakidila apu, udi ulongesha ku diyukidilangana dia buludiludi, bu muakenzaye pa kulongesha Yezu kumpala kua kuluaye pa buloba. Bia muomumue, misangu isatu mifunda, wakakula buludiludi kumbukila mu diulu ne bantu pa buloba.—Matayo 3:17; 17:5; Yone 12:28.
21. Mmuanjelu kayi uvua Yehowa mutumike nende mu mushindu wa pa buawu bu muleji-mpala wende, kadi mmunyi mutudi bamanye se: wakatumika kabidi ne bakuabu?
21 Yehowa utu kabidi utumika ne baleji-mpala banjelu bua kulongesha, pa kusangisha ne Muan’a bute wende, “Dîyi.” (Yone 1:1-3) Nansha muvua Yehowa mua kuikala muakule buludiludi ne muanende mupuangane wa pa buloba, Adama, mu budimi bua Edene, pamu’apa wakatumika ne Yezu kumpala kua kuluaye pa buloba bua kuakulaye Buende. (Genese 2:16, 17) Yeye eu ke uvua mua kuikala “muanjelu wa Nzambi mulelela, uvua wenda kumpala kua kamponya ka bena Izalele” ne uvua Yehowa mubatumina dîyi ne: “Tumikilayi dîyi diende.” (Ekesode 14:19; 23:20, 21, NW) Kabiyi mpata, Yezu kayi muanji kulua pa buloba uvua kabidi “mfumu wa tshiluilu tshia [Yehowa, NW]” wakamuenekela Yoshua bua kumupa bukole. (Yeshuwa 5:14, 15, MMM) Yehowa udi kabidi utumika ne banjelu bakuabu bua kumanyisha malongesha ende, bu mudi aba bavuaye mutumike nabu bua kufila Mikenji yende kudi Mozese.—Ekesode 20:1; Galatia 3:19; Ebelu 2:2, 3.
22. (a) Mbantu kayi pa buloba bavua Yehowa mutumike nabu bua kulongesha? (b) Mmushindu kayi wa kumpala udi Yehowa utumika nawu bua kulongesha bantu lelu’eu?
22 Kusakidila apu, Yehowa Nzambi udi utumika ne baleji-mpala ba pa buloba bua kulongesha. Baledi mu Izalele bavua ne bua kulongesha babu bana; baprofete, bakuidi, bakalenge, ne bena Lewi bavua balongesha bena ditunga Mikenji ya Yehowa. (Dutelonome 11:18-21; 1 Samuele 12:20-25; 2 Kulondolola 17:7-9) Yezu uvua Tshikuma-mbila munene wa Nzambi pa buloba. (Ebelu 1:1, 2) Pa tshibidilu, Yezu uvua wamba ne: bivuaye ulongesha, bivua menemene bivuaye mulongele kudi Tatu, nunku bateleji bende, bushuwa, bavua balongeshibua kudi Yehowa. (Yone 7:16; 8:28; 12:49; 14:9, 10) Yehowa wakafundisha bivuaye wamba, ne mu matuku etu aa udi ulongesha bantu nangananga ku diambuluisha dia Mifundu eyi mifunda ku spiritu wende.—Lomo 15:4; 2 Timote 3:16.
23. Nnkonko kayi ituakonkonona mu tshiena-bualu tshidi tshilonda?
23 Tudi mu bikondo bia mushinga, bualu Mifundu idi ilaya ne: ‘mu tshitupa tshia ndekelu tshia matuku [mutukadi mpindieu] bantu bavule nebalonge njila ya Yehowa.’ (Yeshaya 2:2, 3, NW) Mmunyi mudi dilongesha edi difidibua? Tudi ne bua kuenza tshinyi bua kubabidila programe munene wa dilongesha wa Yehowa udi wenda udiunda mpindieu, ne kumukumbaja tshietu tshitupa? Netukonkonone nkonko ya nunku mu tshiena-bualu tshidi tshilonda.
Newandamune munyi?
◻ Mmunyi muakalua Yehowa Tatu, Mulongeshi, ne Bayende?
◻ Ntshinyi tshidi Yehowa ulongesha pa bidi bitangila “Dimiinu”?
◻ Ndilongesha kayi dia mushinga dia Nzambi ditudi ne bua kulonda?
◻ Yehowa udi ulongesha munyi?
[Tshimfuanyi mu dibeji 10]
Dibiisha muana wa bakaji wa Jairuse ku lufu diakapetesha nshindamenu bua kuitabuja dilaya dia Yezu dia dibiishibua