Yehowa udi upetesha ditalala ne bulelela bivulavulayi

“Nembuondape ne nembasokoluele ditalala ne bulelela bivulavulayi.”​—YELEMIYA 33:6, NW.

1, 2. (a) Pa bidi bitangila ditalala, nnsombelu kayi udi nende matunga? (b) Mu 607 K.B.B., ndilongesha kayi divua Yehowa mupeteshe Izalele pa bidi bitangila ditalala?

DITALALA! Mmunyipu mudidi dijingibue, kadi mmunyipu mudidi dipangike mu miyuki ya bantu! Mu mushindu wa pa buawu, siekele eu wa 20, kêna siekele wa ditalala. Bishilangane, mmumone mvita ibidi idi mitambe kubutulangana mu miyuki ya bantu. Kunyima kua mvita ya kumpala ya buloba bujima, Nsangilu wa Matunga wakenjibua bua kulama ditalala dia pa buloba bujima. Bulongolodi abu buakapangila. Kunyima kua mvita mibidi ya buloba bujima, bulongolodi bua Matunga Masanga buakenjibua ne tshipatshila tshia muomumue. Pa kubala amu bikandakanda bia ku dituku dionso tudi mua kumona mudibu buenda bupangila pabu menemene.

² Tudiku mua kukemeshibua bu mudi malongolodi a bantu kâyi akumbana kutuala ditalala anyi? Nansha kakese. Kukadi bidimu bipite pa 2 500, tshisamba tshisungula tshia Nzambi, Izalele, tshiakapetela dilongesha kampanda pa muanda eu. Mu siekele wa muanda-mutekete K.B.B., ditalala dia Izalele divua ditekibue mu njiwu kudi bukokeshi buvua buenda bubanda bua buloba bujima, Babilone. Izalele e kutangila kudi Ejipitu bua kupeta ditalala. Ejipitu wakapangila. (Yelemiya 37:5-8; Yehezekele 17:11-15) Mu 607 K.B.B., biluilu bia bena Babilone biakuupula bimana bia Yeruzaleme ne kuosha ntempelu wa Yehowa. Nunku Izalele wakalonga ne dibungama mudi ditekemena mu malongolodi a bantu dia tshianana. Pamutu pa kupeta ditalala, ditunga edi diakatumibua ku bukole mu tshimuangi ku Babilone.​—2 Kulondolola 36:17-21.

3. Mu dikumbajibua dia mêyi a Yehowa mamba ku butuangaji bua Yelemiya, mmalu kayi akêna kupua muoyo akapetesha Izalele dilongesha dibidi dia mushinga pa bidi bitangila ditalala?

³ Kadi, kumpala kua dipona dia Yeruzaleme, Yehowa ukavua muleje ne: yeye, ki ng’Ejipitu, ke uvua ne bua kupetesha Izalele ditalala dilelela. Ku butuangaji bua Yelemiya wakalaya ne: “Nembuondape ne nembasokoluele ditalala ne bulelela bivulavulayi. Ne nempingajilule bakuatshibue ba Yuda ne bakuatshibue ba Izalele, ne nembiibake anu bu ku ntuadijilu.” (Yelemiya 33:6, 7, NW) Dilaya edi dia Yehowa diakatuadija kukumbajibua mu 539 K.B.B. pakatshimunabu Babilone ne kupeshabu bena Izalele bavua ku bupika budikadidi. (2 Kulondolola 36:22, 23) Mu tshitupa tshia ndekelu tshia 537 K.B.B., tshisumbu kampanda tshia bena Izalele tshiakasekelela bua musangu wa kumpala kunyima kua bidimu 70 Difesto dia Mitàndà mu buloba bua Izalele! Kunyima kua disekelela edi, bakatuadija diibakulula ntempelu wa Yehowa. Mmunyi muakadiumvuabu mu mudimu eu? Muyuki mufunda udi wamba ne: ‘Bantu bonso bakela mbila ne dîyi dikole pakatumbishabo Yehowa, bualu bua bakajadika bishimikidi bia nzubu wa Yehowa.’​—Ezela 3:11.

4. Mmunyi muakasaka Yehowa bena Izalele bua kuenzabu mudimu wa diibaka ntempelu, ne ndilaya kayi diakenzaye pa bidi bitangila ditalala?

⁴ Kadi, kunyima kua ntuadijilu eu wa disanka, bena Izalele bakatekeshibua mu maboko kudi baluishi ne kuimanyikabu mudimu wa diibaka ntempelu. Bidimu bikese pashishe, Yehowa wakajula baprofete Hagai ne Zekâya bua kusaka bena Izalele ku dijikija mudimu wa diibakulula. Mmunyipu muvuabu ne bua kuikala bapampakane pa kumvua Hagai wamba pa bidi bitangila ntempelu eu uvua ne bua kuibakibua ne: ‘Yehowa wa misumba udi wamba ne, Butumbi bua nzubu eu bua matuku alualua nebupite butumbi buende bua diambedi bunene; mu muaba eu nempeshe bantu ditalala’!​—Hagai 2:9.

Yehowa udi ukumbaja malaya ende

5. Mbualu kayi budi bukoka ntema mu nshapita wa muanda-mukulu wa Zekâya?

⁵ Mu mukanda wa mu Bible wa Zekâya, tudi tubala bikena-kumona ne milayi bia ku spiritu bivulavulayi biakapetesha tshisamba tshia Nzambi dikanda ku kale mu siekele muisambombo K.B.B. Milayi imue imue eyi idi itungunuka ne kutushindikila pa bidi bitangila dikuatshisha dia Yehowa. Idi itupesha kabingila kajima bua kuitabuja ne: Yehowa neapeshe kabidi bantu bende ditalala mu matuku etu aa. Tshilejilu, mu nshapita wa muanda-mukulu wa mukanda udi ne dîna diende, muprofete Zekâya (NW) mmufundamu misangu dikumi mêyi aa: ‘Etshi ke tshidi Yehowa muambe.’ Musangu wonso, mêyi aa adi kumpala kua dimanyisha kampanda dia Nzambi didi ditangila ditalala dia bantu ba Nzambi. Amue a ku malaya aa akakumbajibua ku kale mu tshikondo tshia Zekâya. Wonso mmakumbajibue anyi adi enda akumbajibua lelu’eu.

“Nengikale ne mukawu bua Siona”

6, 7. Mmu mishindu kayi muvua Yehowa ‘ne mukawu bua Siona ne tshiji tshikole’?

⁶ Mêyi aa adi amueneka bua musangu wa kumpala mu Zekâya 8:2 (NW), mutudi tubala ne: “Etshi ke tshidi Yehowa wa biluilu muambe: ‘Nengikale ne mukawu bua Siona ne mukawu mukole, ne nengikale ne mukawu bualu buende ne tshiji tshikole.’” Dilaya dia Yehowa dia kuikala ne mukawu, ne mitalu mivule, bua tshisamba tshiende diakumvuija ne: uvua ne bua kutabalela bua kubapingajila ditalala diabu. Dipingajibua dia Izalele mu ditunga diende ne diibakuludibua dia ntempelu bivua tshijadiki tshia mitalu ayi.

⁷ Kadi, ntshinyi tshiakafikila aba bakaluisha tshisamba tshia Yehowa? Mitalu yende bua tshisamba tshiende ivua ne bua kukumbanangana menemene ne “tshiji tshikole” tshiende pa baluishi aba. Pavua bena Yuda ba lulamatu batendelela mu ntempelu muibakulula, bavua mua kuela meji pa diakabi dia Babilone wa bukole, ukavua mupone tshikondo atshi. Bavua kabidi mua kuela meji pa dipangila dinene dia baluishi bavua batete mua kupangisha diibakulula dia ntempelu. (Ezela 4:1-6; 6:3) Ne bavua mua kuela Yehowa tuasakidila muvuaye mukumbaje dilaya diende. Mitalu yende yakabatuadila ditshimuna!

“Tshimenga tshia bulelela”

8. Mu matuku a Zekâya, mmunyi muvua Yeruzaleme mua kuvua tshimenga tshia bulelela pa kufuanyikija ne bikondo bia kale?

⁸ Bua musangu muibidi Zekâya udi ufunda ne: “Etshi ke tshidi Yehowa muambe.” Mmêyi kayi adi Yehowa wamba bua musangu eu? “Nempingane ku Siona ne nensombe munkatshi mua Yeruzaleme; ne Yeruzaleme neabikidibue bushuwa ne: tshimenga tshia bulelela, ne mukuna wa Yehowa wa biluilu, ne: mukuna munsantu.” (Zekâya 8:3, NW) Kumpala kua 607 K.B.B., Yeruzaleme kavua bushuwa tshimenga tshia bulelela. Bakuidi ne baprofete bende bakavua banyanguke, ne benamu kabavua bena lulamatu. (Yelemiya 6:13; 7:29-34; 13:23-27) Mpindieu bantu ba Nzambi bakavua biibakulula ntempelu, pa kuleja didifila diabu ku ntendelelu mukezuke. Yehowa wakasomba kabidi musangu eu mu nyuma mu Yeruzaleme. Malelela a ntendelelu mukezuke akakudibua tshiakabidi munda muende, nunku Yeruzaleme uvua mua kubikidibua ne: “tshimenga tshia bulelela.” Muaba wende mutumbuke uvua mua kubikidibua ne: “mukuna wa Yehowa.”

9. Ndishintuluka kayi dinene mu nsombelu diakamonabu kudi “Izalele wa Nzambi” mu 1919?

⁹ Nansha muvua mamanyisha abidi aa ne diumvuija kudi Izalele wa kale, adi kabidi ne diumvuija dinene buetu bu mukadi siekele eu wa 20 utua ku tshibungubungu. Pamue ne bidimu 80 bishale, munkatshi mua mvita ya kumpala ya buloba bujima, binunu bikese bia bela manyi bìvuà tshikondo atshi bienza “Izalele wa Nzambi” biakaya ku bupika bua mu nyuma, anu bu muakaya Izalele wa kale ku bupika ku Babilone. (Galatia 6:16) Mu ngakuilu wa tshiprofete, bavua balejibue bu bitalu bilala mu njila. Kadi, batshivua anu ne dijinga dilelela dia kutendelela Yehowa “ne spiritu ne bulelela.” (Yone 4:24, NW) Nunku, mu 1919, Yehowa wakabapikula ku bupika buabu, pa kubajula ku nsombelu wabu wa dikala bafue mu nyuma. (Buakabuluibua 11:7-13) Nunku Yehowa wakandamuna ne eyowa mumvuike ku lukonko lua buprofete lua Yeshaya elu: “Badi mua kulela bantu bonso ba mu ditunga dituku dimue anyi? Badi mua kulela tshisamba tshijima musangu umue anyi?” (Yeshaya 66:8, MMM) Mu 1919, bantu ba Yehowa bavuaku kabidi musangu eu bu tshisamba tshia mu nyuma mu “ditunga” diabu buobu bine, anyi nsombelu wa mu nyuma pa buloba.

10. Kubangila mu 1919, mmabenesha kayi adi bena nkristo bela manyi bapete mu “ditunga” diabu?

¹⁰ Bakubibue mu ditunga adi, bena nkristo bela manyi bakasadila mu ntempelu munene wa mu nyuma wa Yehowa. Bakabikidibua bu “mupika wa lulamatu ne wa budimu,” pa kuitaba bujitu bua kutabalela bintu bia pa buloba bia Yezu, disanka dia mudimu didibu batungunuka ne kubabidila eku siekele wa 20 wenda usemena ku nkomenu wende. (Matayo 24:45-47, NW) Bakapeta bimpe dilongesha dia se: Yehowa udi “Nzambi wa ditalala.”​—1 Tesalonike 5:23.

11. Mmunyi mudi bamfumu ba malu a Nzambi ba Bukua-buena-nkristo badileje mudibu baluishi ba tshisamba tshia Nzambi?

¹¹ Kadi, ntshinyi tshiakafikila baluishi ba Izalele wa Nzambi? Mitalu ya Yehowa bua bantu bende mmikumbanangane ne tshiji tshiende tshikole bua baluishi. Munkatshi mua mvita ya kumpala ya buloba bujima, bamfumu ba malu a Nzambi ba Bukua-buena-nkristo bakatuala difinakaja dinenanenayi pakenzabu madikolela​—ne kupangila—​bua kubutula kasumbu aka kakese ka bena nkristo bakudi ba bulelela. Munkatshi mua mvita mibidi ya buloba bujima, ba-ministre ba Bukua-buena-nkristo bavua badisuike pamue anu bua bualu bumue: Ku nseke yonso ya diluangana, bakasaka mbulamatadi bua kukandikayi Bantemu ba Yehowa. Nansha lelu’eu, mu matunga mavule bamfumu ba malu a ntendelelu badi basaka mbulamatadi bua kupumbisha anyi kukandika mudimu wa buambi wa Buena-nkristo wa Bantemu ba Yehowa.

12, 13. Mmunyi mudi tshiji tshikole tshia Yehowa tshilejibue bua Bukua-buena-nkristo?

¹² Ebi ki mbipangike kumanyibua kudi Yehowa. Kunyima kua mvita ya kumpala ya buloba bujima, Bukua-buena-nkristo, pamue ne tshitupa tshiashadi tshia Babilone Munene, biakakuluka. (Buakabuluibua 14:8) Dijadikibua dia dikuluka dia Bukua-buena-nkristo diakalua kumanyika ku bantu tshikondo tshivua, kutuadija mu 1922, mulongolongo wa bipupu bia mu tshimfuanyi bituadije kupongolodibua, bivua bileja patoke ku bantu nsombelu wabu wa dikala bufue mu nyuma ne pa kudimuija bua kabutu kabu katshilualua. (Buakabuluibua 8:7–9:21) Bu tshijadiki tshia se: dipongolodibua dia bipupu ebi ditshidi ditungunuka, muyuki wa “Ndekelu wa bitendelelu bia dishima ukadi pabuipi” wakenjibua pa buloba bujima mu dia 23 Tshisanga 1995, ne kulondibua kudi diabanyibua dia nkama ya miliyo ya kopi ya nimero wa pa buende wa Ngumu ya Bukalenge.

¹³ Lelu’eu, Bukua-buena-nkristo budi mu nsombelu mukuate luse. Mu kupita kua siekele eu wa 20, benamu mbashipangane munkatshi muabu mu mvita mibiamibi mibenesha kudi ba-nsaserdose ne ba-ministre babu. Mu amue matunga buenzeji buende bukadi pamue ne kujimina. Mbufundila kabutu pamue ne tshitupa tshiashadi tshia Babilone Munene.​—Buakabuluibua 18:21.

Ditalala bua bantu ba Yehowa

14. Ndîyi kayi dia mu tshimfuanyi dia buprofete didi dimanyisha pa tshisamba tshidi mu ditalala?

¹⁴ Ku luseke lukuabu, mu tshidimu etshi tshia 1996, bantu ba Yehowa badi balabula ditalala divulavulayi mu ditunga diabu diasulula, anu bu mudibi bileja mu dimanyisha disatu dia Yehowa edi: “Etshi ke tshidi Yehowa wa biluilu muambe: ‘Bakulakaje balume ne bakaji nebasombe mu miaba ya patoke ya mu Yeruzaleme, kabidi muntu ne muntu ne dikombo diende mu tshianza bua bidimu biende bivulavulayi. Ne miaba ya patoke ya mu tshimenga mine neyikale miûle tente ne bana ba balume ne ba bakaji banaya mu miaba yatshi ya patoke.’”​—Zekâya 8:4, 5, NW.

15. Nansha mudiku mvita ya matunga, nditalala kayi didi nadi basadidi ba Yehowa?

¹⁵ Tshimfuanyi tshiumvuija kudi mêyi aa mashême tshidi tshileja tshintu kampanda tshisunguluke mu bulongolodi ebu mudi mvita itua ipela​—tshisamba kampanda mu ditalala. Bituadijile mu 1919, mêyi a buprofete a Yeshaya mmakumbajibue: ‘Yehowa udi wamba ne, Ditalala, ditalala dikale kudi muntu udi kule ne kudi muntu udi pabuipi; nemmuondape. Kadi . . . Nzambi wanyi udi wamba ne, Kakuena ditalala kudi bantu babi.’ (Yeshaya 57:19-21) Bushuwa, bantu ba Yehowa, nansha mudibu kabayi bena mu bulongolodi ebu, kabena mua kuepuka buenzeji bua munyukunyuku wa matunga. (Yone 17:15, 16) Mu amue matunga, badi bananukila ntatu mikole, ne bamue ba kudibu mbafike too ne ku dishipibua. Pabi, bena nkristo balelela badi ne ditalala mu mishindu ibidi minene. Wa kumpala, badi ne ‘ditalala ne Nzambi [ku butuangaji] bua Mukalenge [wabu] Yezu Kristo.’ (Lomo 5:1) Muibidi, badi ne ditalala munkatshi muabu buobu bine. Badi badima ‘meji adi afuma mu diulu’ adi ‘diambedi mimpe, pashishe a ditalala.’ (Yakobo 3:17; Galatia 5:22-24) Kupita apu, mbatekemene kupeta ditalala mu ngumvuilu wadi mujima pikala ‘badi ne mitshima mipuekele mua kupiana buloba, pikala mioyo yabo mua kusanka mu ditalala dikumbane.’​—Musambu wa 37:11.

16, 17. (a) Mmunyi mudi “bakulakaje balume ne bakaji” pamue ne “bana ba balume ne ba bakaji” balue kukolesha bulongolodi bua Yehowa? (b) Ntshinyi tshidi tshileja ditalala dia bantu ba Yehowa?

¹⁶ Kutshidi “bakulakaje balume ne bakaji” munkatshi mua bantu ba Yehowa, bela manyi bàdì bavuluka matshimuna a kumpala a bulongolodi bua Yehowa. Lulamatu ne dinanukila biabu bidi bianyishibua bikole. Bela manyi bàvuà ne bidimu bipuekele bakalombola [mudimu] mu matuku makole a mu bidimu bia 1930, ne Mvita ya Buloba bujima II, pamue ne mu bidimu bia disanka dikole bia didiunda biakalonda. Ne kabidi, nangananga kutuadija mu 1935, “musumba munene” wa “mikoko mikuabo” wakadileja. (Buakabuluibua 7:9, NW; Yone 10:16) Bu mukadi bena nkristo bela manyi bakulakaje ne balue kukepela, mikoko mikuabu mmiangate mudimu wa diyisha mu bianza ne miwalabaje pa buloba bujima. Mu bidimu bishale ebi mikoko mikuabu mmilue kuvula mu ditunga dia tshisamba tshia Nzambi. Ee, amu bua tshidimu tshishale nkayatshi, bantu 338 491 ba kudibu bakatambuishibua bu tshimanyinu tshia diditshipa diabu kudi Yehowa! Bapiabapia ba mushindu’eu badi bushuwa bana mu ngakuilu wa mu nyuma. Makanda abu ne musangelu bidi biangatshibua ne mushinga mukole bu mudibu benda babandisha milongo ya aba badi bimba misambu ya disamuna ne dianyisha “kudi Nzambi wetu udi musombe mu nkuasa wa bumfumu, ne kudi Muan’a mukoko.”​—Buakabuluibua 7:10, NW.

¹⁷ Lelu’eu, ‘miaba eyi ya patoke mmiûle tente ne bana ba balume ne ba bakaji,’ Bantemu badi ne makanda bu a bansonga. Mu tshidimu tshia mudimu tshia 1995, luapolo yakapetshibua ya ku matunga 232 ne bidiila bia mbuu. Kadi kakuena mukawu mubi wa bukua-matunga, peshi dikinangana dia bisa, peshi lubabu, munkatshi mua bela manyi ne mikoko mikuabo. Buonso badi bakola pamue mu nyuma, badisuike mu dinanga. Buena-muntu bua pa buloba bujima bua Bantemu ba Yehowa budi bushuwa bua pa buabu pa buloba bujima.​—Kolosai 3:14; 1 Petelo 2:17.

Mbitambe kukola bua Yehowa anyi?

18, 19. Mu bidimu bia kubangila mu 1919, mmunyi mudi Yehowa mukumbaje tshidi tshimueneke bu tshitambe kukola ku mmuenenu wa muntu?

¹⁸ Ku kale mu 1918 pavua bashadile bela manyi bikale binunu bikese patupu bia anyima mitekeshibue mu maboko ne mikale mu dikuatshibua dia mu nyuma, muntu nansha umue kavua mua kudianjila kumona mushindu uvua malu mua kupitakana. Kadi, Yehowa uvua mumanye​—anu bu mudibi bileja mu dimanyisha diende dinayi dia buprofete: “Etshi ke tshidi Yehowa wa biluilu muambe: ‘Nansha mudibi ne bua kumueneka bu bitambe kukola ku mêsu a bashadile ba ku tshisamba etshi mu matuku au, nebikale ne bua kumueneka bu bitambe kukola kabidi ku mêsu kuanyi anyi?’ ke mudi Yehowa wa biluilu wamba.”​—Zekâya 8:6, NW.

¹⁹ Mu 1919, spiritu wa Yehowa wakafululula bantu bende bua kutuma mudimu kumpala. Nansha nanku, bivua bikengela ditabuja bua kulamata ku bulongolodi ebu bukese bua batendeledi ba Yehowa. Bavua bungi butambe bukese, ne malu a bungi kâvua matokesha. Kadi, ku kakese ku kakese Yehowa wakabakolesha mu mianda ya bulongolodi ne kubakumbaja bua kuenza mudimu wa bena nkristo wa diyisha lumu luimpe ne dienza bayidi. (Yeshaya 60:17, 19; Matayo 24:14; 28:19, 20) Ku kakese ku kakese, wakabambuluisha bua kusunguluja malu a mushinga mukole bu mudi ndubidilu ne bumfumu [buende] ku mutu kua bifukibua bionso. Bivua bitambe kukola bua Yehowa kukumbajaye disua diende ku diambuluisha dia kasumbu kakese aku ka Bantemu anyi? Diandamuna didiku bushuwa n’tòo! Ebi mbijadikibue mu mabeji 12 too ne 15 a tshibejibeji etshi, adi aleja tabló wa mudimu wa Bantemu ba Yehowa bua tshidimu tshia mudimu tshia 1995.

“Meme nengikale Nzambi wabu”

20. Mmu bualabale kayi muvua disangishibua dia bantu ba Nzambi didianjila kumanyisha ne bua kuikala?

²⁰ Dimanyisha ditanu didi dileja kabidi nsombelu wa disanka wa Bantemu ba Yehowa lelu’eu: “Etshi ke tshidi Yehowa wa biluilu muambe: ‘Ke meme eu mpikula bantu banyi kumbukila ku ditunga dia kudi dîba dipatukila ne ku ditunga dia kudi dîba dibuelela. Ne nembapingajemu bushuwa, ne nebikale ne bua kusomba munkatshi mua Yeruzaleme; ne nebikale ne bua kulua bantu banyi, ne meme nengikale Nzambi wabu mu bulelela ne mu buakane.’”​—Zekâya 8:7, 8, NW.

21. Mmu mushindu kayi mudi ditalala divulavulayi dia bantu ba Yehowa dilamibue ne dialabajibue?

²¹ Mu 1996 tudi mua kuamba kakuyi dielakana se: lumu luimpe nduyishibue pa buloba bujima, kumbukila “ku ditunga dia kudi dîba dipatukila” too ne “ku ditunga dia kudi dîba dibuelela.” Mbenze bayidi mu bantu ba matunga wonso, ne mbamone dikumbajibua dia dilaya dia Yehowa dia se: “Bana bebe buonso nebikale bantu balongeshibue kudi Yehowa, ne ditalala dia bana bebe ba balume nedikale divule.” (Yeshaya 54:13, NW) Tudi ne ditalala bualu tudi bashidimunyibue kudi Yehowa. Bua bualu ebu, mikanda mmipatudibue mu miakulu mipite pa 300. Amu bua tshidimu tshishale, miakulu 21 ya pa mutu ivua misakidibue. Tshibejibeji tshia Tshibumba tshia Nsentedi tshidi mpindieu tshipatuka musangu umue umue mu miakulu 111, ne etshi tshia Réveillez-vous! mu miakulu 54. Mpuilu minene ya matunga ne ya bukua-matunga idi ifila tshijadiki tshia patoke tshia ditalala dia bantu ba Nzambi. Bisangilu bia ku lumingu bidi bitusangisha mu buobumue ne bitupetesha dikankamija ditudi tukengela bua kushala bashindame. (Ebelu 10:23-25) Eyowa, Yehowa udi ushidimuna bantu bende “mu bulelela ne mu buakane.” Udi upetesha bantu bende ditalala. Mmunyipu mutudi babeneshibue pa kuikala petu mu ditalala adi divulavulayi!

Udi mua kumvuija anyi?

◻ Mu bikondo bia lelu, mmunyi mudi Yehowa muikale ‘ne mukawu ne tshiji tshikole’ bua bantu bende?

◻ Mmunyi mudi bantu ba Yehowa bikale ne ditalala, nansha mudibu mu matunga mudi mvita itua ipela?

◻ Mmu mushindu kayi mudi ‘miaba ya patoke miûjibue ne bana ba balume ne ba bakaji’?

◻ Mmalongolola kayi adi menjibue bua bantu ba Yehowa bamone mua kulongeshibua kudiye?

[Tablo mu mabeji 12-15]

LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 1995

(Bua kumona malu bimpe, tangila mu mukanda)

[Tshimfuanyi mu mabeji 8, 9]

Mu siekele muisambombo K.B.B., bena Yuda ba lulamatu bakiibakulula ntempelu bakalonga se: Yehowa uvua mpokolo umu’epele wa ditalala wa kueyemena