Ntshinyi tshitu pa muaba wa kumpala mu malu ebe onso?

¹ Bitendelelu bia bungi bitu bitamba kunemenena anu pa bualu bua midimu ya diambuluisha nayi bantu bu mudi dibaka dia tulasa anyi mpitadi. Kadi nansha mutu Bantemu ba Yehowa kabayi bapua muoyo bua “kuenzelangana bimpe ne bua kukuatshishangana,” mudimu utubu bateka pa muaba wa kumpala mmudimu wa diambuluisha bantu mu nyuma.​—Eb. 13:16.

² Tshilejilu tshia mu bidimu lukama bia kumpala: Yezu wakenza malu mimpe a bungi mu mudimu wende wa panu pa buloba, kadi mudimu wa kumpala uvuaye nawu uvua wa dimanyisha bulelela. (Luka 4:43; Yone 18:37; Bien. 10:38) Wakatumina bayidi bende dîyi bua ‘kuyabu ne kuvuija ba bisamba bionso bayidi, kubayisha.’ (Mat. 28:19, 20) Wakamba kabidi ne: bantu bavua bamuitabuja bavua mua kulua kutantshisha mudimu uvuaye mutuadije eu kuya nawu kule menemene. (Yone 14:12) Yezu wakateka mudimu wa diyisha pa muaba wa kumpala, bualu mmudimu udi wambuluisha bantu bua kumanya njila wa lupandu.​—Yone 17:3.

³ Mupostolo Paulo uvua umona mudimu wende wa diyisha bu ‘bujitu bumuomekela’ anyi dibanza divuaye kayi mua kulengulula to. (1 Kol. 9:16, 17, Mukanda wa Mvidi Mukulu [Mishonyi, MMV]) Uvua mua kudibudisha nansha masanka kayi onso, kutantamena mateta peshi kukenga makenga a mishindu yonso anu bua kukumbaja mudimu wende. (Bien. 20:22-24) Mupostolo Petelo pende ne bena diende bakaleja pabu lungenyi lua muomumue elu. Nansha muakabelabu mu buloko ne kudiabu mitutu, ‘kabakalekela kuyisha bantu ne kubambila lumu luimpe ne: Yezu udi Kristo’ nansha.​—Bien. 5:40-42.

⁴ Tudi mua kuamba tshinyi buetu tuetu? Tudiku tuteka mudimu wa diyisha lumu luimpe lua Bukalenge ne dienza bantu bayidi pa muaba wa kumpala anyi? Tudiku tuditatshisha bua bantu badi ‘batata ne bamuangalake bu mikoko idi kayiyi ne mulami’ anu bu muakenza Yezu anyi? (Mat. 9:36) Malu adi enzeka pa buloba matuku aa ne milayi ya mu Bible bidi bileja patoke ne: ndongoluelu mubi wa malu eu ukadi utua ku tshibungubungu tshiende! Tuetu bikale balame mushinga udi nawu mudimu wa kuyisha mu lungenyi luetu, nebitusake bua kutungunuka ne kuyisha ne tshisumi.

⁵ Tangila nsombelu webe: Bu mutu nsombelu wa muntu ushintuluka misangu ya bungi, mbimpe kutangila misangu ne misangu ni tudi mua kuakaja malu etu bua kumona mua kudifila kabidi bikole mu mudimu wa buambi. Muanetu mukuabu wa bakaji uvua mpanda-njila wa pa tshibidilu mu bidimu bia 1950 too ne mu bia 1970, kadi kuluaye kumona ne: bivua bikengela imanyike mudimu eu bua disama divua dimukuate. Kunyima kua matuku, wakumvua bimpe. Matuku adi mashale aa uvua mutangilulule nsombelu wende kumonaye ne: uvua kabidi mua kuenza bumpanda-njila. Ndisankapu kayi bungi diakumvuaye pakabuelaye mu Kalasa ka Mudimu wa Bumpanda-njila mumane kuikala ne bidimu 90! Newambe tshinyi buebe wewe? Ukadi pa kuangata pansio ku mudimu peshi kujikija kalasa anyi? Bu muikala nsombelu webe mua kushintuluka, newikaleku mua kuenza bumpanda-njila anyi?

⁶ Pakamona Yezu ne: Mâta ‘uvua utata ne mudimu wa bungi wa mu nzubu,’ wakamuambila ne dîyi dimpe umupesha lungenyi ne: uvua mua kukepesha bungi bua bintu bivuaye wenza bua kumona mua kupeta mabenesha a bungi. (Luka 10:40-42) Kuenaku pebe mua kukepesha malu a mu nsombelu webe anyi? Bidi ne mushinga menemene bua mulume ne mukaji kuikalabu buonso buabu ku mudimu anyi? Buobu bakaje malu abu, kabenaku mua kukumbaja majinga a bena dîku diabu ne difutu dia muntu umue nkayadi anyi? Bantu ba bungi mbambuluishibue mu nyuma pavuabu bakaje nsombelu yabu bua kumona mua kudifila bikole mu mudimu wa buambi.

⁷ Tulondayi tuetu bonso tshilejilu tshishiya kudi Yezu ne bapostolo bende! Netuikale mua kupeta mabenesha a Yehowa patudi tudifila ne muoyo umue bua kuenza bia bungi mu mudimu udi usungila mioyo ya bantu wa diyisha lumu luimpe lua Bukalenge.​—Luka 9:57-62.