Diyisha bantu ku telefone didi dienda bimpe

¹ Tshipatshila tshietu katshitu amu tshia kudifila mu diyisha dia lumu luimpe patupu to, kadi kabidi tshitu tshia kutuadila bantu batudi mua kupeta mukenji wa Bukalenge. (Bien. 10:42; 20:24) Nansha mudi buambi bua ku nzubu ne ku nzubu butshikale anu mushindu munene wa dipeta bantu, bidi bimueneka se: nansha ngenzelu eu kêna utufikisha ku diyikila ne bantu bonso to. Nunku, bua ‘kukumbaja bimpe mudimu wetu’ ne kupeta bantu badi bu mikoko, tudi tuyisha mu mishindu mikuabu, bu mudi: ku telefone.​—2 Tim. 4:5, Mukanda wa Mvidi Mukulu.

² Miaba ya bungi, bantu mbasombele mu nzubu milama kudi bampulushi, mu nzubu minene idi ne mêku a bungi peshi mu mpangu idi ne biibi binene bitua bikuvu, kakuyi mushindu wa kubuela patudi tuyisha ku nzubu ne ku nzubu. Nansha miaba itudi mua kuyisha ku nzubu ne ku nzubu kakuyi lutatu, katutu tusangana bantu ba bungi ku mabu to. Kadi bamanyishi ba bungi badi bafika ku diyikila ne bantu ba miaba ya nunku padibu bateta kubela nshinga. Dimue dituku mu dinda, muanetu mukuabu uvua ne mukajende mu mudimu wa ku nzubu ne ku nzubu kabakasangana bantu ku nzubu tshitema to. Pakapinganabu ku Nzubu wa Bukalenge, bakakeba nimero ya telefone ya bantu abu. Kuelabu nshinga ne kuyukilabu ne bantu miaba muanda-mukulu ya ku miaba tshitema ayi.

³ Udi utshina bua kuyishila bantu ku nshinga anyi? Muanetu wa balume mukuabu wakamba ne: “Bu mundi meme tshitu musue muntu angele nshinga bua kungambila bua bintu bidiye usumbisha, ntu ngela meji ne: bantu bakuabu kabakuteleja muntu wajinga bua kubayishila ku nshinga to.” Kadi anu misangu ibidi patupu yakatetaye kuela bantu nshinga, wakamba ne: “Ndi munange kuyishila ku nshinga! Tshivuaku muele meji ne: nebikale nunku to, ndi munange kuyisha kua nunku be! Ku nshinga bantu batu bakula kabayi ne buôwa, udi mua kuakula nabu muudi musue. Bidi biambuluisha dikema!” Muanetu wa bakaji mukuabu uvua pende ne lungenyi lua muomumue elu: “Tshivua mmona binsankisha bua kuyishila bantu ku telefone to. Bushuwa, tshivuaku munange kuyishila ku nshinga to. Kadi ndi mutete patupu ne ndi mufike ku dimona ne: bidi bienda be! Ndi mupete bantu 37 ku telefone ba kupinganyina ne ba kulonga nabu Bible bungi bundi tshiyi nansha mua kukumbana bua kulombola to!” Teta pebe bua kuyisha ku nshinga, neumone muendabi.

⁴ Tudilongololayi bua kuyishila bantu ku telefone: Mutangidi wa mudimu ke utu utangila malu a mudimu wa buambi mu tshisumbu. Kasumbu ka bakulu kadi mua kusungula mukulu mukuabu peshi musadidi wa mudimu mupiluke bua kuambuluishaye mutangidi wa mudimu mu dilongolola buambi bua ku telefone, pikalabi bikengedibua. Muanetu udi utangila malu a teritware abeleshe pende diboko, bualu yeye ke wabanyina bantu teritware ne kulama karte kayi. Nunku, mutangidi wa tshijengu neapete mushindu wa kutangila mudi mudimu wa diyishila bantu ku nshinga wenda.

⁵ Bikala mu teritware wenu muikale miaba inudi kanuyi mua kubuela panudi mu mudimu wa ku nzubu ne ku nzubu, dilongololayi bua kuyishila bantu ba mu teritware ayi ku telefone. Muanetu udibu bapeshe mudimu eu neafunde bimpe adrese ya bantu badi miaba ayi badibu ne bua kuyishila ku telefone ne teritware eyi idi ne bua kuikala bunene bukumbane bua bamanyishi bapete mushindu wa kuyishamu misangu ne misangu. Tuarte tuonso tua teritware idi ne miaba ya nanku badi ne bua kuenzapu kamanyinu kadi kaleja ne: tshitupa etshi ntshia kuyishila anu ku telefone.

⁶ Nkuepi kunudi mua kupeta nimero ya telefone ya bantu? Nudi mua kupeta kakanda katu ne nimero ya telefone ya bantu mu bilaminu bia mikanda mutu bantu bonso babuela. Bikala nzubu munene kampanda udi bantu kabayi mua kubuela tshibuelabuela muikale ne kende kakanda ka nimero ya telefone ya bantu badimu, nudi mua kupetelaku nimero yabu. Biobi kabiyi nanku, nudi nansha mua kutentula mêna a badi basombele mu nzubu au ku mabeji atubu balamika ku tshibueledi ne kuya kuakeba mu kakanda ka nimero ya telefone ya bantu bonso.

⁷ Bakulu badi mua kuenza pabu muabu muonso ne kulongolola bua bana betu badi bamanye kuyishila ku nshinga bimpe balongeshe bakuabu, pamu’apa mu programe wa Bampanda-njila badi bambuluisha bakuabu. Imue misangu, badi mua kuangata tshitupa tshia Majinga a tshisumbu mu Tshisangilu tshia Mudimu bua kumvuija mudi mudimu wa ku telefone upatula bipeta bimpe.

⁸ Padi bakulu baya kukumbula bana betu badi batshibukile panshi anyi badi balema, badi mua kubakankamija bua bikale bayishila ku telefone. Mukulu udi mua kuidikija kubikila bantu ku nshinga bua kubayisha muanetu au muteleje. Pashishe umuambila bua kutetaye pende. Ba bungi batu batuadije nunku badi benza minite bungi kampanda ku dituku bayikila ne bantu ku nshinga, mbafike ku dinanga mudimu eu bushuwa.

⁹ Malu atudi mua kuenza: Pavua Yezu mutume bayidi bende bua kuyisha, ‘wakabatuma kumpala kuende ku babidi ku babidi.’ (Luka 10:1) Bua tshinyi? Uvua mumanye se: padibu benza mudimu pamue nebapeshangane ngenyi ne nebakankamijangane. Mbia muomumue kabidi bua diyisha bantu ku telefone. Panudi nuyisha babidi nudi mua kupeshangana ngenyi, nukonkonona mudibi bienda ne nupeshangana tu-mibelu tua kutumikila panuayikila ne bantu ku nshinga musangu walonda. Nansha munkatshi mua diyikila ne muntu ku nshinga, nudi mua kuambuluishangana bua kukeba malu adi akengela kumuambila.

¹⁰ Bua kupeta mushindu wa kuela meji bimpe ne kulama lungenyi kaba kamue, sombela muaba uudi mua kutekela pabuipi mikanda ya diyisha nayi: Bible, Comment raisonner, Utulomba, bibejibeji ne bikuabu bintu. Funda pa dibeji imue mishindu ya dituadija diyuki ne muntu ne wikale ne dibeji adi pabuipi. Ikala mudilongolole bua kufunda malu majalame ne makumbane, kuyi upua muoyo dîba ne dituku dia ngondo bua umanye dituku diudi mua kuela kabidi muntu udi muleje dijinga dia kumanya au nshinga.

¹¹ Muntu yonso utu mudimuke padiye umvua dîyi dia muntu udiye kayi mumanye. Nunku, mbimpe kuikala ne musangelu, kudileja mulunda ne kuikala ne meji. Amu dîyi diebe nkayadi ke diamujadikila tshiwudi, kabidi kumujadikila ni udi wamba bulelela anyi dishima. Akula mudilekelele kabidi ne muoyo webe mujima. Akula bitulu bitulu ne dîyi dikumbane didi muntu mua kumvua. Lekela muntu unudi nuyikila nende akule pende. Muambile dîna diebe dionso, ne umumanyishe ne: udi musombele mu kartié aku. Katuena basue bua bantu bele meji ne: tudi tubela nshinga bua kubasumbisha bintu to. Pamutu pa kuambila muntu ne: udi wenda ubikila ku nshinga bantu bonso badi basombele ku nzubu munene kampanda, muleje ne: yeye ke uudi mubikile.

¹² Mushindu wa kuasa diyuki ne muntu ku nshinga: Mbuelelu ya bungi idi mu kakanda ka Mua kutuadija ne kutungunuka ne mayuki pa Bible (anyi Comment raisonner dib. 9-15) idi mua kutuambuluisha bua kuyikila ne bantu ku telefone. Udi mua kuamba ne: “Ndi nkuela nshinga bualu kakuena mushindu wa meme kulua kumonangana nebe muaba uudi to. Tshindi nkubikidila mbua kumanya tshiudi pebe wela meji bua lukonko elu ludi lukoka ntema ya bantu ba bungi.” Pashishe umuele lukonko alu.

¹³ Mushindu wa kumpala wa kuasa diyuki ne muntu udi muleja mu ka-tshiena-bualu ka “Dibunda bibawu/​Dikubibua” tudi mua kuulonda nunku: “Muoyo au mukalenge. Dianyi ndi ․․․․․․․․. Ndi musombele mu kartié emu. Tshiena ngela bantu nshinga bua kubapanyisha bintu anyi ngenda mbela nkonko to. Ndi mukubikile bualu tshilumbu tshia mushindu wa kukuba bantu tshidi tshingelesha meji a bungi be. Bungi bua bantu badi babunda bibawu mbutungunuke ne kuvula, ne bualu ebu mbututangile petu. Udi wela meji ne: nekulue tshikondo tshikala bantu bu wewe ne meme mua kuikala tuendakana mu njila butuku katuyi tumvua buôwa anyi? [Mulekele andamune.] Indila nkubadile malu adi Nzambi mulaye.”

¹⁴ Kulomba muntu diakamue bua kutuadija kulonga nende Bible ku nshinga nkupatule bipeta bimpe. Udi mua kuleja muntu mu minite mikese mushindu wa kulonga Bible. Lomba muntu bua uye kumutangila kumbelu bua nutungunuke ne dilonga, peshi bikalaye welakana, mulombe bua nutungunukile ne dilonga ku nshinga dikuabu dituku.

¹⁵ Padi diyuki dienu dijika, wikale mulame mu lungenyi bualu buakuambuluisha bua uye kutangila muntu au kumbelu anyi kumutumina tshibejibeji ta mukanda wa kubala. Bikala muntu utshina kukupesha adrese wende, mulomba bua umubikile kabidi ku nshinga dikuabu dituku. Pamu’apa bidi mua kunulomba bua kuanji kuyikila ne muntu misangu ne misangu ku nshinga kumpala kua kuitabaye bua kukubikila kumbelu.

¹⁶ Tudikuatshile malu mu bianza: Muanetu wa bakaji mukuabu wa bidimu 15 wakatuadija mudimu wende wa buambi dinda dinda ne dibikila bantu ku nshinga. Wakayikila ku nshinga ne muntu mukaji mukuabu, yeye kuitabaye bua bamutuadile mukanda wa Dimanya. Pakaya muanetu wa bakaji eu kumutuadila mukanda kumbelu, muntu mukaji au wakajinga bua kumanya muvua muanetu mufike ku dimanya nimero wende wa telefone bualu kabavua bamuele mu kakanda nansha kamue kavua ne nimero mikuabu. Muanetu uvua mutupakane, mutue mbote pa nimero ya tshianana! Muntu mukaji au wakitaba bua kulonga Bible ne ukadi mpindieu muambi wa lumu luimpe udi kayi muanji kutambula.

¹⁷ Bavua bapeshe munga muanetu wa bakaji teritware uvua ukengela kuyikidila ne bantu anu ku telefone, kadi bu muvuaye utshina, wakenza mbingu isatu mijima kayi wela bantu ba mu teritware wende eu nshinga to. Ntshinyi tshiakamupesha dikima bua kutuadijaye? Wakavuluka tshiena-bualu tshia: “Lorsque je suis faible, c’est alors que je suis puissant” (Pandi mutekete, ke pandi ne bukole) mu Réveillez-vous! wa dia 22 Tshiongo 1997. Mu tshibejibeji atshi badi balondamu bualu bua Ntemu udi uyishila bantu ku nshinga nansha mudiye ne disama dimutekeshe mubidi wonso. Muanetu wa bakaji au wakamba ne: “Mvua nsambila Yehowa bua ampeshe muoyo mukole. Mvua mumulombe bua angambuluishe ne mêyi andi mua kuamba bua kuasa diyuki ne muntu.” Mmunyi muakapitabi dituku dia kumpala diakatetaye kuyishila bantu ku telefone? Udi wamba ne: “Yehowa wakangumvuila. Bantu bakanteleja, ne muntu umue wakitaba bua meme kuyikila nende kabidi.” Pashishe diyisha bantu ku telefone diakamulelela dilonga dia Bible. Udi ujikija ne mêyi aa: “Yehowa mmundongeshe musangu eu kabidi bua kumueyemena yeye, bua tshidieyemenyi meme nkayanyi to.”​—Nsu. 3:5.

¹⁸ Kumanyishila bantu bulelela ku telefone nkulue mushindu mulenga wa diyisha lumu luimpe. Dilongolola bimpe, udifilemu ne muoyo webe mujima. Kuteketshi mu maboko bikala bantu babenga kukuteleja ku ntuadijilu paudi ubanga. Sambila Yehowa bua akuambuluishe, ne uyikile ne bana betu bakuabu badi pabu bayishila ku nshinga. Tuenzayi mudimu wetu ne lukunukunu, bikale ne dijinga dia kupetangana ne bantu bonso ba mu teritware wetu.​—Lomo 10:13, 14.