Ntshinyi tshidi muntu mua kuenza padi malu amutekesha mu mikolo?

MMUNYI mudi muntu mua kutshimuna diteketa mu mikolo? Lukonko elu nduakelabu batangidi bena-ngendu ba bungi batu bakumbula bisumbu bia Bantemu ba Yehowa pa tshibidilu. Mandamuna abu adi mua kutuambuluisha bua kukonkonona biledi bia malu adi atekesha bantu mu mikolo, ne mishindu ya kukola ku muoyo mu nsombelu eu utu mua kufikila muena Kristo yonso.

Bidi bikengela kukonkonona malu a bungi bua kumanya mua kutshimuna bintu bidi bitekesha mu mikolo. Bimue bimanyinu bidi mua kuikala: dilengulula masambila anyi dibenga kudilongela, dibenga kubuela mu bisangilu pa tshibidilu, dibenga kuikala ne disanka, ne kuikala ne mubidi mashika kumpala kua bena Kristo netu. Kadi, tshimue tshia ku bimanyinu binene ndijimija tshisumi mu dienza dia mudimu wa buambi. Tukonkononayi bimanyinu bia diteketa mu mikolo ne imue mishindu ya kubijikija.

Diteketa mu mikolo mu mudimu wetu wa buambi

Yezu Kristo uvua mumanye ntatu ivua mua kumueneka mu mudimu wa divuija bantu bayidi. (Matayo 28:19, 20) Wakatuma balongi bende bu “mikoko idi munkatshi mua nkashama,” mumanye ne: bavua ne bua kubakengesha bua mudimu wabu wa buambi. (Matayo 10:16-23) Nansha nanku, kabavua ne bua kuteketa mu mikolo to. Bushuwa, makenga atu misangu mivule akolesha basadidi ba Nzambi badi beyemene Yehowa bikole.​—Bienzedi 4:29-31; 5:41, 42.

Nansha pavuabu kabayi batamba kukengesha balongi ba Kristo, kabavua babakidila bimpe misangu yonso to. (Matayo 10:11-15) Bia muomumue, mudimu wa buambi wa Bantemu ba Yehowa lelu’eu kawutu wenzeka bipepele misangu yonso nansha.a Bua bantu ba bungi, kuitabuja Nzambi mbualu bua muntu nkayende, ki mbualu budi bukengela kubuyukidilangana to. Bua ngenyi idi bamue bantu badianjile kuikala nayi bua tshitendelelu kampanda, kabitu bibalengelela bua kubuelamu. Bushuwa, dibuidia, dipanga kupatula bipeta bimpe anyi malu makuabu a bungi bidi mua kuikala bimue bia ku biledi binene bia diteketa mu mikolo. Mmunyi mutudi mua kutshimuna ntatu eyi?

Dipatula bipeta bimpe

Disanka ditudi tupeta mu mudimu wetu didi mu mushindu kampanda diluila ku bipeta bitudi tupatula. Nunku, mmunyi mutudi mua kupatula bipeta bivule mu mudimu wetu wa buambi? Bulelela, tudi “balobi ba bantu.” (Mâko 1:16-18, Muanda Mulenga Lelu) Mu Isalele wa kale, balobi bavua baya kuloba butuku, dîba divuabu mua kukuata mishipa ya bungi. Tuetu petu tudi ne bua kukonkonona teritware wetu bua kumona mua kuya “kuloba” padi bantu ba bungi bikale ku nzubu, dîba didibu mua kuteleja mukenji wetu bimpe. Bidi mua kuikala ku dilolo, mu Disambombo ne mu Dia lumingu anyi dîba dikuabu. Bilondeshile mutangidi muena-ngendu kampanda, bitu bimpe kuenza nunku miaba itu bantu baya ku mudimu dituku dijima. Wakaleja ne: kuya mu buambi dilolo kutu pa tshibidilu kupatula bipeta bimpe. Tutu kabidi tupetangana ne bantu ba bungi mu buambi bua ku nshinga anyi bua mu mpukapuka.

Dinanukila mu mudimu didi dipatula bipeta bimpe. Ku Mputu wa ku Est ne mu amue matunga a mu Afrike, mudimu wa diyisha Bukalenge udi wenda wenzeka bimpe, ne nkupatuke didiunda dinene. Bia muomumue, bisumbu bia bungi mbiledibue miaba ivua imueneka kumpala bu ivua kayiyi ipatula bipeta bimpe, too ne mu teritware ikadibu bayishe bikole. Kadi, ntshinyi tshiwenza bikala webe teritware kayi upatula bipeta bia mushindu’eu?

Ulame mmuenenu muimpe

Kumanya bimpe bipatshila bidi Yezu mutufundile nekutuambuluishe bua kubenga kuteketa mu mikolo patudi tupetangana ne bantu badi batubuidia mu buambi. Kristo uvua musue bua balongi bende kukebabu bantu badi bakumbanyine, kadi ki mbua kushintululabu mitshima ya bantu bonso to. Wakaleja misangu ya bungi ne: bantu ba bungi kabakuteleja lumu luimpe to, amu bu muvua bena Isalele ba bungi kabayi bateleje baprofete kale.​—Yehezekele 9:4; Matayo 10:11-15; Mâko 4:14-20.

Bantu badi ‘bapele mu mitshima yabu,’ ke badi banyisha ‘lumu luimpe lua bukalenge.’ (Matayo 5:3; 24:14) Mbasue kusadila Nzambi mu mushindu udiye muleje. Bushuwa, bipeta bitudi tupatula mu mudimu wetu bidi bilondeshila mudi mutshima wa bantu, kadi ki mbualu tudi bamanye mua kuyisha nansha. Bulelela, tudi ne bua kuenza muetu muonso bua lumu luimpe luikale lusankisha bantu. Kadi, Nzambi ke udi mumanye mua kupatuisha bipeta bimpe, bualu Yezu wakamba ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke.’​—Yone 6:44.

Mudimu wetu wa buambi udi umanyisha dîna dia Yehowa. Nansha bantu bateleje anyi kabayi bateleje, mudimu wetu wa buambi udi usamuna dîna dinsantu dia Yehowa. Kabidi, ku diambuluisha dia mudimu wa buambi, tudi tujadika ne: tudi balongi ba Kristo ne tudi ne diakalenga dia kuenza mudimu wa mushinga mukole udi wenda wenzeka mu matuku etu aa.​—Matayo 6:9; Yone 15:8.

Diteketa mu mikolo ne malanda adi pankatshi pa bantu

Amue malanda adi pankatshi pa bantu mu dîku anyi mu tshisumbu, adi mua kutekesha mu mikolo. Tshilejilu, muntu udi mua kumona ne: bakuabu kabatu basue kumvua bidiye wamba. Dipanga bupuangane dia bena kuitabuja netu didi kabidi mua kututekesha mu mikolo. Mifundu idi mua kutuambuluisha bikole bua kujikija bualu ebu.

“Nsangilu mujima wa bana betu” badi pa buloba bujima n’dîku dialabale dia mu nyuma. (1 Petelo 2:17, NW) Kadi lungenyi lua se: tudi munkatshi mua bantu badi mu buobumue ludi mua kujimina padi tulumbulumbu tujuka munkatshi muetu. Bushuwa, nansha bena Kristo ba mu bidimu lukama bia kumpala bavua pabu ne malu a mushindu’eu, bualu mupostolo Paulo wakabavuluija misangu ne misangu bua basombe pamue mu diumvuangana. Tshilejilu, wakasengelela bena Kristo bakaji babidi, Ewodia ne Suntuke, bua kumvuanganabu.​—1 Kolinto 1:10; Efeso 4:1-3; Filipoi 4:2, 3.

Biajuka bilumbu munkatshi muetu, ntshinyi tshitudi ne bua kuenza bua kutungunuka ne kunanga bana betu? Mpatudi tuvuluka ne: Kristo wakabafuila, nenku amu bu tuetu, buobu pabu mbitabuje mulambu wende wa tshia-bupikudi. Tudi kabidi ne bua kuvuluka se: bana betu ba bungi mbadilongolole bua kuidikija Yezu Kristo pa kuanyisha bua kuteka mioyo yabu mu njiwu bua bualu buetu.

Kukadi bidimu ndambu, mu tshimenga tshia Paris, mu ditunga dia France, nsonga kampanda Ntemu wa Yehowa kakelakana bua kuambula tshibuta tshia bombe tshivuabu bateke pambelu pa Nzubu wa Bukalenge. Wakapueka natshi lubilu pa bibandilu bia nzubu wa kuulu mutangile panshi kumpala kua kutshisumbulaye mu tshina tshia mâyi, muakatayikilatshi. Pakamuebejabu bua kumanya tshiakamufikisha ku ditaba bua kuditeka mu njiwu eyi, wakandamuna ne: “Mvua mumone ne: tuvua mua kufua. Nunku ngakamona se: bivua bimpe bua meme kufua nkayanyi pamutu pa kutushipabu bonso.”b Ndiakalenga kayipu edi ditudi nadi bua kuikala ne bakuetu badi badilongolole bua kulonda menemene tshilejilu tshia Yezu!

Tudi kabidi mua kuelangana meji pa diumvuangana divua munkatshi mua Bantemu ba Yehowa bavua mu tumponya tua disubishilangana, mu Mvita Mibidi ya Buloba bujima.c Matuku adi mapite aa, bana betu ba mu Malawi bakalama muoyo-mutoke anu mudibi bikengela bua bena Kristo balelela. Dimanya dia se: bena mu tshisumbu tshietu badi pabu mua kuenza bia muomumue mu tshikondo tshia buluishi kadienaku mua kutuambuluisha bua kulengulula anyi mene kukepesha makokangana a buatshia-buila ne bilumbu anyi? Bituikala ne lungenyi bu lua Kristo, malanda etu a matuku onso ne bena kuitabuja netu neabakoleshe ku muoyo, pamutu pa kubatekesha mu mikolo.

Muntu yonso udi mua kuteketa mu mikolo

‘Ditekemena didibu balayidila didi disamisha mutshima, kadi kukumbaja kua dijinga kudi bu mutshi wa muoyo.’ (Nsumuinu 13:12) Bua bamue basadidi ba Yehowa, nshikidilu wa ndongoluelu eu wa malu utshidi kule. Bena Kristo badi bamona tshikondo tshitudi etshi ‘tshikole mua kutantamena,’ anu bu mutu bantu ba bungi badi kabayi bena kuitabuja bamona.​—2 Timote 3:1-5, NW.

Kadi, bu mudibu bashilangane ne bantu badi kabayi bena kuitabuja, bena Kristo badi ne bua kusanka mudibu bamona ne: nsombelu eyi mikole idi “tshimanyinu” tshia dikalaku dia Yezu, tshidi tshileja ne: Bukalenge bua Nzambi nebubutule ndongoluelu eu wa malu mabi mu tshitupa tshîpi emu. (Matayo 24:3-14) Nansha padi nsombelu ukola menemene, amu bu muenzekabi palua “dikenga dinene,” tudi tusanka bualu malu aa adi atumanyisha difika dia bukua-panu bupiabupia bua Nzambi.​—Matayo 24:21; 2 Petelo 3:13.

Padi muena Kristo umona mu meji ende bua se: ki mmpindieu wikala Bukalenge bua Nzambi mua kumbusha malu adiku lelu, bidi mua kumufikisha bua kudina ne kasuki mu dikeba dia bintu bia ku mubidi. Yeye mulekelele bintu bu mudi mudimu ne dijikija lutetuku biangata dîba ne makanda ende onso, nebimukolele bua kukumbaja majitu ende a mu Mifundu bu mudibi bikengela. (Matayo 6:24, 33, 34) Mmuenenu wa mushindu’eu utu ubungamija ne utekeshangana mu mikolo. Mutangidi kampanda muena-ngendu wakumvuija ne: “Kukeba bua kuikala ne nsombelu wa mu bukua-panu bupiabupia mu ndongoluelu eu wa malu nkupanga tshia kuenza.”

Bibidi bia ku bintu bitambe buimpe bidi mua kuambuluisha

Mmunyi mudi muntu mua kupeta luondapu luimpe diakamue padi disama diende dimanyika? Didilongela ng’umue wa ku mishindu mitambe buimpe idiku. Bua tshinyi? Mutangidi muena-ngendu kampanda wakamba ne: “Ditu dituvuluija bua tshinyi tudi ne bua kuenza tshitudi tuenza.” Mukuabu wakumvuija pende ne: “Kuyisha anu bualu kudi mukenji udi ulomba bua kuyisha kudi kulua bujitu mpindieu.” Kadi didilongela dimpe didi dituambuluisha bua kuikala ne mmuenenu muimpe wa mudimu utudi tuenza pa kumona mutudi tuenda tusemena ku nshikidilu. Bia muomumue, Mifundu idi ituvuluija njila ne njila mushinga udi nawu didia bimpe mu nyuma bua kupeta disanka dilelela mu dienza disua dia Nzambi.​—Musambu 1:1-3; 19:7-10; 119:1, 2.

Bakulu badi mua kuambuluisha bakuabu bua kukolabu ku muoyo pa kuenza makumbula a bulami adi akankamijangana. Mu makumbula abu aa, bakulu badi mua kuleja ne: badi banyisha muntu yonso bikole mu tshisumbu. (1 Kolinto 12:20-26) Pavuaye wakula bua bena Kristo nende, mukulu kampanda wakamba ne: “Bua kubaleja mudibu ne mushinga, ntu mbavuluija malu malenga adibu bakumbaje kale. Ntu mbambila ne: Yehowa udi ubangata ne mushinga wa bungi, ne se: Muanende wakafila mashi ende bua diakalenga diabu. Batu batamba kuanyisha ngelelu eu wa meji. Paudi ulondakajapu ne mvese ya mu Bible idi ilenga ku muoyo, bantu badi batekete mu mikolo badi bangata mapangadika mimpe, badifundila bipatshila bipiabipia bu mudi: kusambila, kulonga ne kubala Bible pamue mu dîku.”​—Ebelu 6:10.

Padibu benza makumbula a bulami, bakulu badi ne bua kudimuka bua kubenga kufila lungenyi lua se: kakuena mushindu wa kusankisha Nzambi to. Kadi badi mua kuambuluisha bena kuitabuja badi batekete mu mikolo bua kumonabu ne: bujitu bua balongi ba Yezu mbupepele. Bushuwa, mudimu wetu wa bena Kristo udi ufila disanka.​—Matayo 11:28-30.

Tutshimune diteketa mu mikolo

Nansha diodi dikebesha kudi bintu kayi, diteketa mu mikolo ntshipupu tshitudi ne bua kuluangana natshi. Kadi umanye ne: katuena nkayetu mu mvita eyi to. Bituikala batekete mu mikolo, mbimpe tuitabe diambuluisha dia kudi bena Kristo netu, nangananga bakulu. Bituenza nenku, katuakuteketa menemene mu mikolo to.

Kupita malu onso, tudi ne bua kunyemena kudi Nzambi bua atuambuluishe tutshimune diteketa mu mikolo. Bitueyemena Yehowa ne muoyo mujima, neatuambuluishe bua kutshimuna diteketa mu mikolo dionso nkong. (Musambu 55:22; Filipoi 4:6, 7) Bushuwa, bu mutudi bantu bende, tudi mua kumvua amu bu mufundi wa misambu wakimba ne: ‘Disanka didi kudi bantu badi bamanye tshiona tshia badi basanka. Yehowa, badi benda biabu mu munya wa pa mpala pebe. Badi basanka mu dîna diebe dinda too ne ku dilolo, ne bua buakane buebe badi batumbishibue. Bualu bua wewe muine udi butumbi bua bukole buabu; ne bua dianyisha diebe kutudi wewe udi ubandisha lusengu luetu muulu.’​—Musambu 89:15-17.

[Mêyi adi kuinshi]

[Tshimfuanyi mu dibeji 31]

Makumbula a bulami menza kudi bakulu bena dinanga adi mua kuambuluisha bena Kristo bua kutshimuna diteketa mu mikolo