Mmunyi mudi buobumue mua kuikala munkatshi mua bena Kristo balelela?
1 Ntshinyi tshidi mua kusangisha mu buobumue bantu bapite pa miliyo isambombo mijima ba mu matunga 234 ne badi bakula miakulu mitue ku 380? Anu ntendelelu wa Yehowa Nzambi nkayende. (Mika 2:12; 4:1-3) Bua malu adibu bamona enzeka lelu, Bantemu ba Yehowa mbamanye bimpe ne: buobumue bua bena Kristo mbualu bulelela. Bu mutudi “tshisumbu tshimue” tshidi “mulami umue” ulombola, tudi bapangadike bua kukandamena lungenyi elu lubi lua dibueja matapuluka mu bantu lua pa buloba ebu.—Yone 10:16; Ef. 2:2.
2 Dijinga dia Nzambi didi muntu kayi mua kupumbisha ndia se: bifukibua bionso bia lungenyi bikale mu buobumue mu ntendelelu mulelela. (Buak. 5:13) Bu muvua Yezu mumanye mushinga wa bualu ebu, wakasambila bikole bua balongi bende kuikalabu mu buobumue. (Yone 17:20, 21) Yonso wa kutudi udi mua kuenza tshinyi bua buobumue bua tshisumbu tshia bena Kristo kuvulabu?
3 Mua kufika ku buobumue: Bu kabuyi bua Dîyi dia Nzambi ne bua nyuma wende, buobumue bua bena Kristo kabuvua mua kuikalaku to. Ditumikila dietu dia bitudi tubala mu Bible didi dipetesha nyuma wa Nzambi mushindu wa kuenzaye mudimu mu nsombelu wetu kakuyi tshidi tshimukandika. Muanda eu udi utuambuluisha bua ‘kulama buobumue buetu bua mu nyuma muimpe mu tshisuikidi tshia ditalala.’ (Ef. 4:3) Nunku tudi ne bua kunangangana. (Kolos. 3:13, 14; 1 Pet. 4:8) Utuku wenza pebe bua kuvudija buobumue ebu pa kuelela meji pa Dîyi dia Nzambi dituku dionso anyi?
4 Mudimu wetu wa kuyisha ne kuvuija bantu bayidi udi kabidi utusangisha mu buobumue. Patudi ne bana betu bakuabu mu mudimu wa buena Kristo eu, tudi ‘tutshinte popamue ne mutshima umue bua ditabuja dia lumu luimpe,’ ne kabidi tudi tulua ‘benji nabu ba mudimu mu bualu bua bushuwa.’ (Filip. 1:27; 3 Yone 8) Patudi tuenza nunku, buobumue ne dinanga bitudi nabi munda mua tshisumbu bidi bikola menemene. Kuenaku mua kuambila muanetu kampanda uudi kuyi muyishe nende kukadi matuku a bungi bua yeye kuya kukufila mu buambi lumingu elu bua tshinyi?
5 Tudi ba diakalenga bua mutudi petu mu buena-muntu bumuepele bulelela bua pa buloba bujima mu matuku aa. Ki mmuomu anyi? (1 Pet. 5:9) Matuku abidi aa, bantu bapite bungi mbalabule buobumue ebu mu mpungilu ya bantu bafumine mu matunga mavule ya “Tutumbishayi Nzambi.” Nunku, tuetu buonso tuenzayi bua buobumue ebu bua mushinga mukole buikalaku pa kubala Dîyi dia Nzambi dituku dionso, pa kujikija bilumbu mu dinanga ne kuyisha lumu luimpe “buonsu pamue.”—Lomo 15:6, Mukanda wa Mvidi Mukulu, [MMV, Mishonyi].