Tuikalayi ne lungenyi lua bumpanda-njila
1. Lungenyi lua bumpanda-njila ntshinyi?
1 Nansha mudi bamue bamanyishi ba Bukalenge mua kuenza mudimu wa bumpanda-njila mpindieu ne bakuabu kabayi ne mushindu wa kuwenza, tshidibi buonso buabu badi mua kuikala ne lungenyi lua bumpanda-njila. Mbasue kutumikila ne muoyo wabu mujima mukenji wa kuyisha ne kuvuija bantu bayidi. (Mat. 28:19, 20; Bien. 18:5) Badi baditatshisha bua bantu bakuabu ne badipangisha amue malu bua kuenza mudimu wa buambi. (Mat. 9:36; Bien. 20:24) Basadidi ba Yehowa mbasue kuenza bionso bidi bikengedibua bua kumona mua kuambuluisha bakuabu bua balonge bulelela. (1 Kol. 9:19-23) Tukonkononayi tshilejilu tshia Filipo muambi wa lumu luimpe uvua ne lungenyi lua nunku.
2. Mmunyi mudi bakulu ne basadidi ba midimu mua kuidikija lukunukunu lua Filipo mu mudimu wa buambi?
2 Kuamba lumu luimpe ne kulongesha: Filipo uvua ne majitu manene mu tshisumbu tshia mu bidimu lukama bia kumpala. (Bien. 6:1-6) Kadi uvua nangananga muambi wa lumu luimpe wa lukunukunu. (Bien. 8:40) Bia muomumue lelu, nansha mudi bakulu ne basadidi ba midimu bakumbaja majitu abu, badi mua kuleja lungenyi lua bumpanda-njila padibu benza muabu muonso bua kuikala ba-ntunga-mulongo mu mudimu wa buambi. Bualu ebu budi bukolesha tshisumbu bikole be!—Lomo 12:11.
3. Mmunyi mutudi mua kuleja lungenyi lua bumpanda-njila patudi mu ntatu?
3 Kunyima kua lufu lua Stefano, bakatuadija kukengesha bikole bayidi ba Yezu, e kubuejabi nsombelu wabu mu kayumbayumba kakole. Kadi, Filipo wakatungunuka ne kuyisha, ne wakenza mudimu mukole ne yeye ke wakatuadija kuyisha bena Samalea. (Bien. 8:1, 4-6, 12, 14-17) Tudi mua kumuidikija petu pa kutungunuka ne kumanyisha lumu luimpe patudi mu ntatu ne kabidi pa kuyisha bantu bonso batudi tupeta katuyi tubasunguluja nansha.—Yone 4:9.
4. Ntshilejilu kayi tshia dimanya mua kulongesha tshivua Filipo mutushile?
4 Tudi tumona muvua Filipo mumanye mua kulongesha mu tshiakenzeka pankatshi pende ne muntu mutungula muena Etiopia. (Bien. 8:26-38) Kulengeja ngenzelu wetu wa mudimu ne Bible ne ‘[kuelangana meji] ne bantu [pa] malu a mu Mukanda wa Nzambi’ mmushindu mukuabu kabidi utudi mua kuleja lungenyi lua bumpanda-njila. (Bien. 17:2, 3) Anu bu Filipo, tudi tukeba kuambila bantu lumu luimpe miaba yonso idibu ne dîba dionso didi mpunga imueneka.
5. Ntshinyi tshidi mua kuambuluisha baledi bena Kristo bua kubueja lungenyi lua bumpanda-njila mu mitu ya bana babu?
5 Dîku ne tshisumbu: Kakuyi mpata, lungenyi ne tshilejilu tshia Filipo biakambuluisha bana bende ba bakaji bikole. (Bien. 21:9) Bia muomumue, baledi bena Kristo badi nsombelu wabu muikale mushindamene pa malu a Bukalenge badi bakankamija bana badibu balela bua kuenzabu pabu bia muomumue. Nansha mudi baledi mua kuikala batshioke ku ndekelu kua lumingu, muledi udi uyisha bakuabu ne muoyo mujima udi mua kushila bana bende tshilejilu tshimpe, tshiashala mu mitu yabu bidimu ne bidimu.—Nsu. 22:6.
6. Mmunyi mutudi mua kuleja dianyisha bua bampanda-njila badi mu tshisumbu tshietu?
6 Filipo wakakidila Paulo ne Luka ku nzubu kuende, bantu bavua pabu benzela Yehowa mudimu mukole. (Bien. 21:8, 10) Mmunyi mutudi mua kuleja dianyisha ne kukuatshisha bantu badi ne lukunukunu lelu? Misangu mikuabu tudi mua kudilongolola bua kuyisha nabu mu dinda anyi ku dilolo dia dituku ditu bamanyishi ba bungi kabayi bayisha to. (Filip. 2:4) Tudi kabidi mua kubabikila ku nzubu yetu bua kukoleshangana nabu ku muoyo. Nansha tuetu bikale mu nsombelu kayi, tudienzejayi bonso bua kuikala ne lungenyi lua bumpanda-njila.