Tuikale ne dîsu dimpe
1. Kuikala ne dîsu didi dimona bimpe kudi kumvuija tshinyi, ne bua tshinyi kudi ne mushinga wa bungi?
1 Mu Muyuki wa Yezu wa pa Mukuna, udi uleja mudi dîsu dia mu tshimfuanyi anyi dia mu nyuma ne bukole bua bungi pa nsombelu wetu yonso mujima. Udi wamba ne: ‘Bikala dîsu diebe dimona tshintu bimpe, mubidi webe wonso neutoke ne munya. Kadi bikala dîsu diebe dibi, mubidi webe wonso neufike ne mîdima.’ (Mat. 6:22, 23) Dîsu didi dimona bimpe ngedi didi dituishila pa tshipatshila tshimue: tshia kuenza disua dia Nzambi. Kadiena dibuela mu ditanaji bua tunyinganyinga bua dipeta bintu. (Mat. 6:19-21, 24-33) Ntshinyi tshidi mua kutuambuluisha bua kuikala ne dîsu didi dimona bimpe?
2. Mmuenenu kayi wa bintu udi Dîyi dia Nzambi ditukankamija bua kuikala nende?
2 Tusankayi bua bitudi nabi: Kukumbaja bimpe majinga a bena dîku mbualu bulomba mu Mukanda wa Nzambi. (1 Tim. 5:8) Kadi bualu ebu kabuena buenzeja muntu bua kuditua ne kasuki mu dikeba dia bintu bitambe buimpe bidiku matuku adi panshi aa to. (Nsu. 27:20; 30:8, 9) Kadi Bible udi utulomba bua kusanka bua bintu bitudi nabi, ‘bia kudia ne bia kuluata,’ bintu bitutu tukengela bua kuikala ne muoyo. (1 Tim. 6:8; Eb. 13:5, 6) Kuteleja mubelu eu kudi mua kutuambuluisha bua kuikala ne dîsu didi dimona bimpe.
3. Ntshinyi tshidi mua kutuambuluisha bua kuepuka didiambika bijitujitu bia tshianana?
3 Netuikale bena meji bituikala bepuke didiambuila bijitujitu bu mudi dipia mabanza a tshianana ne kuikala ne bintu bidi mua kutuangata dîba dia bungi ne ntema yetu anyi dibikeba. (1 Tim. 6:9, 10) Mmunyi mutudi mua kuenza nanku? Patudi tutangila nsombelu wetu, tuteta bua kuela meji bimpe bua kutshinka mushinga wa bintu bua kumona bikalabi kabiyi mua kutupangisha bua kuenza malu a mu nyuma. Ikala mupangadika bua kuteka malu a mu nyuma pa muaba wa kumpala mu nsombelu webe.—Filip. 1:10; 4:6, 7.
4. Bua tshinyi tudi ne bua kukeba mishindu ya kupepeja malu mu nsombelu wetu?
4 Tupepeja malu mu nsombelu wetu: Tshintu tshikuabu tshidi tshituambuluisha bua kubenga kuditua mu dikeba dia bintu nkupepeja malu mu nsombelu wetu. Muanetu wa balume mukuabu wakafika ku dimona se: bena mu dîku diende bavua mua kuikala ne nsombelu muimpe nansha kabayi ne bintu bipitepite bungi udi wamba ne: “Ndi mpindieu mua kuenza malu a bungi mu tshisumbu bua kusadila bana betu. Ndi mutuishibue se: Yehowa udi upesha basadidi bende bonso bintu bilenga padibu bateka malu a ntendelelu mulelela kumpala kua majinga abu nkayabu.” Udi pebe mua kupeta masanka a bungi adi apeteka padi muntu upepeja malu mu nsombelu wende anyi?
5. Bua tshinyi bidi bikengela kutungunuka ne kuenza muetu muonso bua kuikala ne dîsu dimpe?
5 Tudi ne bua kuenza muetu muonso bua kukandamena malu a Satana, bena pa buloba ebu bua ba-musua bintu ne kukandamena kabidi majinga a mubidi wetu muine mupange bupuangane. Pamutu pa kulekela mêsu etu atua apa atua papa, tuatuishilayi anu pa kuenza disua dia Nzambi ne pa ditekemena dietu dia mushinga mukole dia muoyo wa tshiendelele.—Nsu. 4:25; 2 Kol. 4:18.