Udiku mua kuambuluisha anyi?

¹ Misangu yonso, Yehowa utu ukeba mishindu ya kuambuluisha basadidi bende ba lulamatu. (2 Kul. 16:9; Yesh. 41:10, 13) Yeshaya wakamufuanyikija ne mulami mulenga wa mikoko pakafundaye ne: ‘Neambule bana ba mikoko mu maboko ende, neabatuale mu tshiadi tshiende ne nealombole mikoko idi imuamuishila bana bitulu bitulu.’ (Yesh. 40:11) Tukonkononayi imue mishindu itudi mua kuidikija mutu Yehowa uditatshisha ne dinanga bua basadidi bende.

² Tuambuluishayi bapiabapia: Tudi mua kuambuluisha bapiabapia patudi tubabikila bua kusomba netu ne kuenza amue malu adi ibakangana pamue. (Nsu. 13:20) Muanetu wa balume mukuabu udi uvuluka muvuabu bamuambuluishe patshivuaye mupiamupia mu tshisumbu wamba ne: “Misangu ya bungi, bena dîku kampanda bavua bambikila mbuela mu dilonga diabu dia mu dîku. Mumvua nya mutangile kumpala, muanetu wa balume kampanda ne mukajende bavua bampanda-njila bavua pa tshibidilu bambikila bua kuya nabu mu buambi dituku dijima. Tuvua misangu yonso ne miyuki milenga idi ikolesha mu nyuma.” Udi usakidila ne: “Kumpala kua meme kulua muena Kristo, mvua ne tshibidilu tshia kuya kuendakana mu Ditanu ne mu Disambombo butuku bua kujikija lutetuku. Kadi, tshikondo tshimvua nsomba ne bana betu bena Kristo, dijinga dianyi dia kupeta wa kusombeshangana nende diakajika.” Mushindu wakadifila tshisumbu kudi muanetu eu ne dinanga wakamuambuluisha bua kuela miji ne kushindama bikole mu nyuma. Lelu’eu udi muena mu dîku dia Betele.​—Kolos. 2:6, 7.

³ Tudiundishanganayi bamue ne bakuabu: Tudi mua kumona mpunga muimpe wa kuambuluisha bana betu tshikondo tshidibu mu nsombelu mikole. Udiku mua kudilongolola bua kuyisha ku telefone pamue ne muanetu kampanda udi masama matshibuile panshi anyi matekeshe mubidi anyi kumulomba bua kukufilaye mu dilonga Bible ne muntu nansha kuya ne muntu au kua muanetu eu bua kulongelaku anyi? Muledi kampanda udi mua kuikala dijinga ne diambuluisha padiye uyisha ne bana bende batshidi bakese anyi? Kudiku bantu bena lumamamama badi mua kuikala dijinga ne diambuluisha padibu benza makumbula anyi mishindu mikuabu ya mudimu wa diyisha anyi? Diditatshisha ne dinanga bua bana betu didi ditusaka bua kukeba mushindu wa kubambuluisha.​—Lomo 14:19.

⁴ Patudi tuidikija mudi Yehowa uditatshisha ne dinanga bua basadidi bende, tudi tukoleshangana umue ne mukuabu, tuambuluisha bena mu tshisumbu bua kudisuika pamue mu dinanga ne tutumbisha Tatu wetu wa mu diulu.​—Ef. 4:16.