Tungunuka ne kuyisha
1 Tudi mu matuku a malu makole. Mvita, bipupu ne malu makuabu makuate buôwa adi enzeka miaba yonso lelu. Bantu ba bungi badi dijinga ne lumu luimpe. Kadi pabi dibenga kunanga malu a Nzambi nditampakane mu bantu. Mu imue miaba, mbikole bua kupeta bantu ku nzubu yabu ne mu mikuabu payi, mbikole bua kupeta bantu badi mua kututeleja anyi badi mua kuanyisha bua kulonga Bible. Nansha nanku, bidi ne mushinga bua tuetu kutungunuka ne kuyisha lumu luimpe lua Bukalenge bua Nzambi bukadiye mujadike mu diulu.—Mat. 24:14.
2 Dinanga bua bantu: Kuyisha kuetu kudi kukoka ntema ku dinanga didi nadi Yehowa bua bantu. ‘Kêna musue [bua] umue wenu ajimine, kadi udi musue [bua] bonso balue kukudimuna mitshima yabu.’ (2 Pet. 3:9; Yeh. 33:11) Ke bualu kayi Yezu wakamba ne: ‘Nebambile bisamba bionso lumu luimpe diambedi.’ (Mâko 13:10) Nzambi udi ulomba bantu bua bapingane kudiye bua bamone mua kupanduka ku kabutu ka bena dia Satana. (Yoe. 2:28, 29, 32; Sef. 2:2, 3) Katuenaku ne dianyisha bua mudi Yehowa musue ne: tupete lupandu anyi?—1 Tim. 1:12, 13.
3 Luapolo lua pa buloba bujima bua tshidimu tshia mudimu tshia 2004 ludi luleja ne: tuvua balombole malonga a Bible matue ku 6 085 387 ku ngondo yonso ne bayidi bapiabapia batue ku 5 000 bavua batambula ku lumingu luonso! Bamue ba ku bantu aba bavua baditshipe badi bipeta bidi bileja ne: Yehowa mmubeneshe mudimu wa bamanyishi bavua benze muabu muonso bua kufika ku diyukila ne bantu bonso ba mu teritware wabu. Ndisankapu kayi ditudi nadi mu bisumbu ne ndiakalengapu kayi dia kuikala benzejanganyi ba mudimu ne Nzambi mu mudimu eu wa lupandu!—1 Kol. 3:5, 6, 9.
4 Tutumbishayi dîna dia Nzambi: Netutungunuke ne kuyisha ne tshipatshila tshia kusamuna Yehowa patoke ne kutumbisha dîna diende kumpala kua bukua-bisamba. (Eb. 13:15) Satana udi udinga ‘ba pa buloba bonso’ bua bitaba ne: Nzambi kêna ne bukole bua kujikija ntatu ya bantu, kêna utangila makenga a bantu anyi ne: kênaku mene to. (Buak. 12:9) Kuyisha kutudi tuyisha kudi kutuambuluisha bua kubingisha bulelela pa bidi bitangila butumbi bua Tatu wetu wa mu diulu. Tutungunukayi ne kutumbisha dîna diende bua kashidi ne tshiendelele.—Mus. 145:1, 2.