Dibanza ditudi nadi kudi bakuabu
1 Mupostolo Paulo uvua udimona ne dibanza dia kuyisha bantu. Uvua mumanye bimpe ne: Yehowa uvua muenze bua bantu ba mishindu yonso basungidibue ku diambuluisha dia mashi a mushinga mukole a Muanende. (1 Tim. 2:3-6) Ke bualu kayi wakamba ne: “Ndi ne dibanza dia kuya kudi bantu bonso; kudi bena Ngreka nansha kudi bantu ba tshianana, kudi bena dimanya nansha kudi badi kabayi nadio.” Wakenza muende muonso bua kufuta dibanza edi pa kuyisha bantu lumu luimpe.—Lomo 1:14, 15, MMM.
2 Anu bu Paulo, lelu bena Kristo badi bayisha bantu nabu dîba dionso didi mpunga umueneka. Bu mudi “dikenga dinene” disemena ne lukasa luonso, tudi ne bua kukeba bantu bimpe ne mitalu yonso. Dinanga dilelela dia bantu netu ditusake bua kuenza mudimu wa lupandu eu ne muoyo wetu mujima.—Mat. 24:21; Yeh. 33:8.
3 Tufutayi dibanza dietu: Patudi tuyisha ku nzubu ne ku nzubu ke patudi tutamba kupeta bantu. Mu teritware itu bantu ba bungi kabayi ku nzubu yabu, kufunda note mijalame ne kupingana mêba makuabu nekutuambuluishe bua kupeta bantu ba bungi. (1 Kol. 10:33) Tudi kabidi mua kupeta bantu patudi tuyisha miaba idibu bapanyisha bintu, mu misesu, miaba idi bantu bikishila ne idibu bimanyikila mashinyi, nansha ku telefone. Tudi mua kudiebeja ne: ‘Ndiku ngenza muanyi muonso bua kumanyisha mukenji wa muoyo eu mu mishindu yonso idi imueneka anyi?’—Mat. 10:11.
4 Mpanda-njila mukuabu wakadimona ne dibanza dinene dia kumonangana ne muntu yonso wa mu teritware wende. Ku nzubu kampanda, madidishi avua anu dîba dionso makanga ne kavua muanji kupeta muntu nansha umue ku nzubu aku to. Kadi dituku dikuabu divuaye kayi mu buambi, wakamona mashinyi mimane kumpala kua nzubu au. Wakakokola ku nzubu aku bualu kavua musue kupitshisha mpunga eu to. Tatu kampanda e kulua kuitaba, muyuki wabu kufikisha muanetu wa bakaji eu ne bayende bua kumupinganyina misangu ya bungi. Tatu kuitabaye bua kulonga Bible, mpindieu ukadi mutambule. Udi ne dianyisha dia bungi bua mushindu uvua muanetu wa bakaji au mudimone ne dibanza dia kuyisha bakuabu.
5 Bu mudi nshikidilu wenda usemena lubilu, tudi mu tshikondo tshia kufuta dibanza ditudi nadi kudi bantu netu pa kudifila ne muoyo wetu mujima mu mudimu wa buambi.—2 Kol. 6:1, 2.