Bansonga badi bakenka bu miendu
1. Bible udi wamba ne: bena Kristo bavua ne bua kuikala bantu ba mushindu kayi? Mmunyi mudi mêyi aa mua kukumbanyina kabidi bansonga lelu’eu?
1 Yezu wakambila bayidi bende ne: “Nuenu nudi munya wa buloba.” (Mat. 5:14, 16) Bayidi bende bavua ne bua kumueneka anu bu mutu musoko muasa pa mukuna ubalakana mu munya. Lelu’eu, bansonga ba bungi badi ‘bamueneka bu miendu munkatshi mua ba pa buloba’ ku diambuluisha dia bienzedi biabu bimpe ne ku tshisumi tshiabu mu diyisha lumu luimpe.—Filip. 2:15; Mal. 3:18.
2. Ngimue mishindu kayi iudi mua kuyisha balongeshi ne balongi nebe?
2 Mu tulasa: Mmunyi muudi mua kuyisha mu tulasa? Bamue bansonga mbafike ku diyisha pa kubuelela pa biena-bualu bu mudi: dinua dia diamba, didimenena dia bintu ne bikuabu. Tshilejilu, muanetu wa bakaji mukuabu wakabuelela pa tshiena-bualu tshia terorisme anyi tshinyangu bua kuleja ne: Bukalenge bua Nzambi ke ditekemena dimuepele bua bantu. Biakakemesha mulongeshi wabu bikole ne bualu ebu kupeteshabu muanetu au mushindu wa kuyisha kabidi matuku akalonda.
3. Mmushindu kayi udi bienzedi bienu mu tulasa mua kumuenesha bukenke buenu?
3 Mushindu mukuabu unudi mua kukenkesha bu miendu nku diambuluisha dia bienzedi bienu, mvuadilu, ndengejilu wa mubidi ne nkoseshilu wenu muimpe wa nsuki. (1 Kol. 4:9; 1 Tim. 2:9) Padi balongeshi ne balongi bamona ne: bikadilu bienu mbishilangane ne bia bakuabu, bamue badi mua kufika ku dinuteleja ne nunku nebinupeteshe mushindu wa kubayisha. (1 Pet. 2:12; 3:1, 2) Eyowa, kuikala ne bikadilu bilenga ki mbualu butekete to, kadi Yehowa neanubeneshe bikole. (1 Pet. 3:16, 17; 4:14) Bua kukoka ntema ya bantu ku lumu luimpe, udi mua kuikala ubala mikanda yetu panudi mu dikisha dia minite mikese anyi kuyiteka pa muaba udi balongeshi anyi balongi nebe mua kuyimona.
4. Ngamue masanka kayi anudi mua kupeta panudi nuyisha mu tulasa?
4 Kukenkesha butoke buenu mu tulasa kudi kukolesha ditabuja dienu ne kunuambuluisha bua kuikala ne disanka anu bualu nudi nuenzela Yehowa mudimu. (Yel. 9:24) Kudi kabidi kunulama. Tshilejilu, muanetu wa bakaji kampanda wakamba ne: “Disanka dindi mupete mu diyisha balongi nanyi ndia ne: kabena bansaka bua kuenza malu adi Bible ubenga to.”
5. (a) Mmunyi mudi bamue bansonga bavudije mudimu wabu? (b) Mbipatshila bia mu nyuma kayi biudi nabi?
5 Vudija mudimu webe: Bansonga batu kabidi bamuenesha bukenke buabu padibu bavudija mudimu wabu wa buambi. Tshilejilu, muanetu mukuabu wa balume wakaya kuenza mudimu muaba uvuabu dijinga ne bamanyishi ba Bukalenge bavule pakajikijaye tulasa tuende tua bikadilu. Wakaya mu tshisumbu tshikese tshivua ne mukulu anu umue. Wakafundila balunda bende ne: “Ke meme kutshionkomoka munemu eku. Buambi mbulenga bua lufu! Tudi tuyisha minite mitue ku 20 ku tshiibi tshionso, bualu bantu mbasue bua kubambila malu a bungi.” Wakamba kabidi ne: “Ndi nkeba bua nsonga yonso enze pende mundi muenze emu bua kumvuaye mundi ngumvua emu. Kakuena bualu budi mua kupita kuenzela Yehowa mudimu ne bionso bitudi nabi to.”
6. Bansonga ba mu tshisumbu tshienu badi bakusankisha ku tshinyi?
6 Tudi ne disanka dia bungi bua munudi nukenkesha butoke buenu miaba inudi! (1 Tes. 2:20) Nuenu benzele Yehowa mudimu ne muoyo wenu mujima ne anyima wenu mujima ne lungenyi luenu luonso ne bukole buenu buonso, nenupete ‘bintu misangu lukama mu tshikondo etshi, ne palua tshikondo tshikuabu, muoyo wa tshiendelele.’—Mâko 10:29, 30; 12:30.