Tulongeshe bantu badi badipuekesha bua kuendabu mu njila wa Nzambi
1. Mbipatshila kayi bitudi nabi patudi tulonga Bible ne muntu?
1 Bantu bavua babikila bayidi ba Yezu ba kumpala ne: bena ‘Njila’ eu. (Bien. 9:2) Buena-Kristo bulelela budi ne bua kubuela muntu mu mashi, bumuenekela ku bionso bidiye wenza. (Nsu. 3:5, 6) Nanku patudi tulonga Bible ne muntu, tshipatshila tshietu katshiena amu tshia kumulongesha malu malelela a mu Bible nkayawu to. Tudi kabidi ne bua kumuambuluisha bua ende mu njila wa Yehowa.—Mus. 25:8, 9.
2. Tshidi mua kusaka mulongi wa Bible bua kutumikila mêyi a Nzambi ntshinyi?
2 Tuambuluishe balongi bua banange Yehowa ne Yezu: Mbikole menemene bua ngelelu wa meji, ngakuilu ne bikadilu bia bantu betu aba kumvuanganabi ne malu adi Nzambi musue! (Lomo 7:21-23; Ef. 4:22-24) Kadi nansha mudibi bikole, bantu badipuekeshi badi baditatshisha bua kuenza malu adi Nzambi musue bualu mbamunange ne kabidi mbanange Muanende Yezu. (Yone 14:15; 1 Yone 5:3) Udi mua kuambuluisha bantu baudi ulonga nabu Bible bua kunangabu Nzambi ne Muanende mushindu kayi?
3. Tshitudi mua kuenza ntshinyi bua kuambuluisha mulongi wa Bible bua anange Yehowa ne Yezu?
3 Longesha muntu bua amanye Yehowa. Muanetu mukuabu wakamba ne: “Bantu kabena mua kunanga muntu udibu kabayi bamanye to, ke bualu kayi ntu mbaleja dîna dia Nzambi mu Bible anu dituku dia kumpala ditutu tutuadija kulonga, ne dîba dionso ditu mushindu umueneka ntu mbambila bua ngikadilu ya Yehowa.” Kuakula bua tshilejilu tshia Yezu ke bualu budi bukengela kuenza kabidi. (Yone 1:14; 14:9) Udi kabidi mua kuangata malu adi mu kazubu kadi ne malu a diambulula ku ndekelu kua nshapita yonso wa mukanda wa Bible ulongesha bua mulongi idikije pende ngikadilu milenga ya Nzambi ne ya Muanende Yezu Kristo.
4. (a) Balongi ba Bible ba bungi batu batshina bua kuyisha bua tshinyi? (b) Tshitudi mua kuenza ntshinyi bua kubambuluisha padibu batuadija kuyisha?
4 Ikala tshilejilu tshimpe: Tuetu bu mutudi tulongesha ne tulombola bantu ne Dîyi dia Nzambi, bienzedi bietu bidi ne bua kubaleja tshidi tshikengela kuenza bua kuenda mu njila wa Nzambi. (1 Kol. 11:1) Tshilejilu, balongi ba Bible ba bungi ki mbibidile kuyukila malu a Nzambi ne bantu badibu kabayi bamanye to. Ke bualu kayi bitu imue misangu bilomba lutulu ne dimanya bua kubambuluisha bua bikale ne dinanga ne ditabuja ne muoyo mukole bua kuyisha ne kulongesha bantu Bible. (2 Kol. 4:13; 1 Tes. 2:2) Dijinga dia kuambuluisha balongi ba Bible neditusake bua kupatuka nabu mu buambi padibu batuadija mudimu eu.
5. Tshilejilu tshimpe tshidi tshiambuluisha balongi ba Bible bua kumona malu adi muntu mua kupeta padiye ulonda mikenji ya Nzambi mushindu kayi?
5 Tshilejilu tshiebe tshidi mua kubambuluisha bua kumanyabu malu makuabu a bena Kristo. Tshilejilu, paudi uya kusamba babedi anyi wela bonso badi balua mu bisangilu muoyo bimpe, balongi badi bamona mushindu wa kuleja dinanga. (Yone 15:12) Paudi ukomba pebe ku Nzubu wa Bukalenge anyi wambuluisha bakuabu, udi ubalongesha mua kuambuluisha bakuabu. (Yone 13:12-15) Padibu bakumona kuyi ukebakeba bintu bipitepite bungi, badi bamona tshidi kutungunuka ne ‘kukeba diambedi bukalenge bua Nzambi’ kumvuija.—Mat. 6:33.
6. Tudi tupeta tshinyi patudi tuambuluisha bantu badi badipuekesha bua kuenzela Yehowa mudimu?
6 Kulongesha bakuabu Dîyi dia Nzambi ne kubavuija bayidi ba Yezu ki mbualu butekete to. Kadi bitu bienza disanka patudi tumona bantu badi badipuekesha ‘benda mu bulelela,’ ki mmuomu anyi?—3 Yone 4.