Ndongamu mupiamupia wa mpuilu wa pa buende

Nyuma muimpe wakambuluisha bena Kristo ba kumpala bua kuyisha lumu luimpe ne bukole buonso. (Bien. 1:8; Kolos. 1:23) Mpuilu wa pa buende wa tshidimu tshia mudimu tshia 2007 udi ne tshiena-bualu ne: “Difila ne muebe muonso mu kuamba kua dîyi,” neatuambuluishe bua tuetu kulonda tshilejilu tshilenga tshia bena Kristo abu.​—Bien. 18:5.

Davidi wakamba bua dîyi dia Nzambi ne: Malu adi Yehowa utuvuluija anyi ‘tshimanyishilu tshia Yehowa tshidi mua kueyemenyibua, tshidi tshivuija muntu udi mudibakane muena meji.’ (Mus. 19:7) Programe wa mpuilu eu mbamulongole ne meji onso. Neatuleje mudi Dîyi dia Nzambi ne mudimu wa ‘kudimuija bantu’ ne neatuleje kabidi ne: tudi ne bua kuenza nadi mudimu mu buambi ne disanka dionso. (2 Tim. 3:16) Neatuleje kabidi mushindu utudi mua kuepuka mateyi, ne masanka atudi tupeta patudi tulonda mikenji ya mu Bible butuku ne munya. Neatuleje kabidi mua kuenza mudimu ne Bible bua kuambuluisha nende bansonga ne bantu bapiabapia bua kuyabu kumpala mu dienzela Nzambi mudimu.

Wikalaku padi mpuilu eu ubanga too ne padiye ujika. Uteye ntema milenga. Ufunde malu audi ne tshia kutumikila. Leja muudi ne dianyisha bua malu adi Yehowa utulongesha ne utuvuluija. Ela meji pa mushindu wa wewe kulonda malu audi ulonga.

Programe wetu wa mpuilu wa pa buende neatuambuluishe bua kutungunuka ne kunanga Dîyi dia Nzambi bikole, kudiyisha ne tshisumi ne kuambuluisha nadi bakuabu bua kudinanga pabu. Nunku, enza muebe muonso bua kupangidi kantu nansha kamue ka mu mpuilu eu to!