Newenze tshinyi pawakola?

¹ Batu imue misangu bakonka bana ne: “Ntshinyi tshiwenza pawakola?” Pautshivua kana kabalume, uvua muandamune bishi? Uvua musue kulua muntu munene mu filme anyi? Muntu wa makuta a bungi anyi? Mutangidi wa tshijengu anyi? Anyi pautshivua kana ka bakaji, uvuaku muambe ne: udi musue kulua muji wa maja anyi? Munganga anyi? Misionere anyi? Kadi mpindieu uukadi muntu mukole, diela lukuabu lukonko elu: ‘Tshingenza ntshinyi kumpala kua matuku eku?’ Udi mumanye tshiwenza anyi?

² Bua kumona mua kukuambuluisha bua kuangata dipangadika dimpe, bulongolodi bua Yehowa mbupatule ditadi dia DVD didi ne tshiena-bualu ne: Les jeunes s’interrogent . . . Que vais-je faire de ma vie? Tangila ditadi edi ne wele meji bikole pa malu onso adimu bu mudi drama, dielangana nkonko ne makuabu malu. Mbaleje mudi malu malondangane mu kazubu ka “Programe.”

³ Filme (Drame): Paudi utangila drama eu, ikala kabidi wenda ukeba bua kuandamuna nkonko eyi: (1) Ndifuanangana kayi didi pankatshi pa Timote ne Andre wa mu filme eu? (Bien. 16:1; 1 Tim. 4:8; 2 Tim. 1:5) (2) Mmunyi muvuabu bafikishe Andre bua kudifila bikole mu manaya? Kudi nganyi? (3) Bavua bambuluishe bimpe Timote ne Andre mbanganyi? Mushindu kayi? (2 Tim. 1:1-4; 3:14, 15) (4) Mmunyi muvua mubelu udi mu Matayo 6:24 ne udi mu Filipoi 3:8 miambuluishe Andre? Idi ikuambuluisha pebe munyi?

⁴ Manaya (Chapitres): Wewe mumane kutangila drama yonso mujima, pingaja manaya adi alonda aa, andamuna nkonko eyi. “Paulo ne Timote”: Mmubelu kayi wa ndekelu uvua Paulo mupeshe Timote? (2 Tim. 4:5) “Kupesha Yehowa bintu bitambe buimpe bitudi nabi”: Udi mudifundile malu kayi a kuenza mu ntendelelu wa Nzambi? “Kuditeka ku luseke lua Yehowa”: Disanka dilelela didi difumina kuepi? “Mubelu wa kaku”: Kukeba bua kuenda lumu mu bulongolodi bua Satana ebu nkubi ku tshinyi? (Mat. 4:9) “Kubenga kunyingalala”: Tshidi mua kukuambuluisha bua kuikala ne disanka dilelela ntshinyi?​—Nsu. 10:22.

⁵ Dielangana nkonko (Interviews): Paudi utangila tshitupa tshionso tshidi tshilonda etshi, tshiudi mumone ne: tshidi mua kukuambuluisha bua wewe kupesha Yehowa biebe bia mushinga biudi nabi ntshinyi? (1) “Kudifila mu dikeba dia bintu bia patupu anyi kuenzela Nzambi mudimu?” (1 Yone 2:17); (2) “Kumanya mua kuikala ne disanka mu mudimu wa kuyisha.” (Mus. 27:14) ne (3) “Malu adi mua kukufikisha ku dienza midimu udi utumbisha Yehowa.”​—Mat. 6:33.

⁶ Malu a kuvuluka (Souvenirs): Udi mua kuandamuna anyi? (1) Muanetu wa balume ne wa bakaji bavua basungule bua kuenza mudimu kayi? Mbua tshinyi? (2) Mmalu kayi mimpe avuabu bapete? (3) Ndishintuluka kayi dinene divua dienzekele yonso wa kudibu? (2 Kol. 5:15) (4) Mmidimu kayi ya Nzambi yakabangabu kuenza, kulekelabu yabu ya kumpala? Bua tshinyi bakamona ne: kabavua mua kuenza midimu ibidi diakamue? (5) Badiku banyingalala bua muvuabu bashintulule malu mu nsombelu wabu anyi? (6) Nshinyi tshivuabu bambe tshidi tshitamba kukueleshisha meji bua tshiudi pebe ne bua kuenza kubanga ku lelu?

⁷ Dielangana nkonko dikuabu (Autres interviews): Mu dielangana nkonko edi, tshiudi mulonge mua kuenza ntshinyi bua kudifila bikole mu mudimu wa Yehowa? (1) “Mushinga udi nawu kudilongela Bible,” (2) “Mishindu mikuabu ya kuyisha,” (3) “Mudimu wa ku Betele,” (4) “Kalasa ka bamisionere ka Gilada” ne (5) “Kalasa ka Dilongesha Mudimu.”​—Konkonona “Miaba mikuabu idi biena-bualu bia buena ebi,” ubale malu onso awamona ne: adi akusankisha.

⁸ Mpindieu udi musungule tshiudi ne bua kuenza matuku adi kumpala anyi? Paulo wakabela Timote bua ‘kunanukila mu malu aa, kudifila ne mutshima wende wonso kudiwu, bua kudiunda kuende kumueneke kudi bonso.’ (1 Tim. 4:15) Ke tshitudi tukulomba pebe bua wenze ne malu audi mumone ne mumvue kabidi mu ditadi dia DVD edi. Lomba Yehowa diambuluisha bua usungule tshidi tshimpe, tshidi mua kukupetesha disanka mu nsombelu webe mpindieu ne kupeta muoyo wa kashidi mu matuku adi kumpala.

[Kazubu mu dibeji 6]

PROGRAME

Filme

Manaya (bitupa 11)

Dielangana nkonko

Bionso

Bitupa (bitupa 3)

Malu a kuvuluka

Malu makuabu

Dielangana nkonko dikuabu

Miaba mikuabu idi biena-bualu bia buena ebi

Tu biena-bualu

Tumama

Nansha tshimue

Bua kubuela mu bitupa bionso, enza mudimu ne mbote wa Next ▶ (bua kuya kumpala), ◀ wa Back (bua kupingana panyima), ne wa Programe.