Tshipatshila tshimpe bua tshidimu tshipiatshipia tshia mudimu
1. Ntshipatshila kayi tshitudi mua kudifundila bua tshidimu tshipiatshipia tshia mudimu?
1 Tuetu basue kuya kumpala mu mudimu wa Nzambi, tudi ne bua kudifundila bipatshila. Mbipatshila kayi biudi mudifundile bua tshidimu tshipiatshipia tshia mudimu? Tshipatshila tshimpe ntshia kuikala mpanda-njila muambuluishi bua ngondo umue anyi ya bungi. Bu mutubi bikengela kudianjila kudilongolola bua kuikala mpanda-njila muambuluishi, mpindieu ke tshikondo tshimpe tshia kutuadija kudilongolola. Bua tshinyi kudifundila tshipatshila tshia kuikala mpanda-njila muambuluishi?
2. Bua tshinyi kudifundila tshipatshila tshia kuikala mpanda-njila muambuluishi?
2 Tshitudi ne bua kuangatshila bumpanda-njila buambuluishi: Kuikala mpanda-njila muambuluishi kudi kutuambuluisha bua kuyisha bikole ne ‘kutamba’ kutumbisha Tatu wetu wa mu diulu. (1 Tes. 4:1) Patudi tutangila malu onso adi Yehowa mutuenzele, muoyo wetu udi utusaka bua kuambila bantu bakuabu bienzedi biende. (Mus. 34:1, 2) Yehowa udi umona bionso biudi wenza bua kuyisha bikole ne ubiangata ne mushinga. (Eb. 6:10) Patudi tumanya ne: Yehowa udi usanka patudi tumuenzela mudimu ne muoyo mujima, tudi tupeta disanka dia bungi.—1 Kul. 29:9.
3, 4. Kuikala mpanda-njila muambuluishi kudi kutuambuluisha ku tshinyi?
3 Pa tshibidilu, patu muntu wenza bualu kampanda bikole, budi bumuteketela ne udi umvua disanka dia kubuenza. Kuyisha bikole nekukuambuluishe bua kuikala wakula mudilekelele paudi uyisha ku nzubu ne ku nzubu. Neupiluke mu dituadija miyuki ne bantu ne kufila mvese bimpe. Paudi utamba kuakula bua malu audi witabuja, ditabuja diebe padi didi dikola bikole. Bantu ba bungi bavua kabayi balonga Bible ne muntu nansha umue badi mua kupeta mushindu wa kutuadija kulonga nende padibu bampanda-njila bambuluishi.
4 Kuikala mpanda-njila muambuluishi kudi kabidi mua kutuambuluisha bua kupetulula bukole bua kuenza mudimu wa Nzambi bikole. Muanetu mukuabu uvua mpanda-njila wa pa tshibidilu kale wakamona ne: ukavua wenza mudimu wa bianza mêba a bungi, wakangata dipangadika dia kulua mpanda-njila muambuluishi bua ngondo umue. Udi wamba ne: “Ngakapeta bukole bua mu nyuma mu mushindu umvua tshiyi muelela meji to. Meme kuangata dipangadika dia kutungunuka ne kuikala mpanda-njila muambuluishi, kumfikishabi ne ku dilua tshiakabidi mpanda-njila wa pa tshibidilu.”
5. Ntshinyi tshitudi mua kuenza tuetu bamone ne: katuena mua kukokesha bua kulua mpanda-njila?
5 Kuitabi bua tshintu nansha tshimue tshikupangishe: Bamue badi mua kuelakana bua kulua bampanda-njila bualu badi badiumvua kabayi ne dimanya dia bafuana kuyisha bimpe. Wewe mumona ne: bualu ebu ke budi bukupingaja tshianyima, umanye ne: Yehowa neakuambuluishe anu bu muvuaye muambuluishe Yelemiya. (Yel. 1:6-10) Nansha muvua Mose ne “tshikukumina” Yehowa wakenza nende mudimu bua kukumbaja disua diende. (Ekes. 4:10-12) Wewe mudiumvue bu udi ne buôwa, lomba Yehowa dikima.
6. Mmunyi mudi muntu anu mua kulua mpanda-njila nansha yeye ne tusamasama anyi kayi ne dîba?
6 Udi welakana bua kulua mpanda-njila muambuluishi bua tusamasama anyi bualu kuena ne dîba anyi? Biwikale udi ne mateketa a bungi, kudienzeja kudi mua kukuambuluisha bua kulua mpanda-njila muambuluishi. Wewe kuyi ne dîba, udi mua kudipeta wewe mumbushe malu adi kaayi ne mushinga mu programe webe, kualongolola bua kuenza mu ngondo udi ulonda. Bamue badi benza mudimu udi ubangata mêba a bungi badi mua kulua bampanda-njila bobu bangate dituku dimue anyi abidi a dikisha.—Kolos. 4:5.
7. Bua tshinyi mbimpe kulomba Yehowa dikuatshisha ne tshisumi bua kulua mpanda-njila muambuluishi?
7 Tshia kuenza: Ambila Yehowa dijinga diebe edi mu disambila. Mulombe bua akuambuluishe bua kuyisha bikole. (Lomo 12:11, 12) Udi mua kukuambuluisha bua kuakaja programe webe. (Yak. 1:5) Wewe umona mudimu eu kauyi ukusankisha, lomba Yehowa bua akuambuluishe bua ukusankishe.—Luka 10:1, 17.
8. Mmunyi mudi kutumikila Nsumuinu 15:22 mua kukuambuluisha bua kulua mpanda-njila muambuluishi?
8 Yukilayi mu dîku dienu bua tshilumbu tshia dilua mpanda-njila muambuluishi. (Nsu. 15:22) Pamuapa umue wa kunudi udi mua kufika ku dienza mudimu wa bumpanda-njila muambuluishi ne diambuluisha dienu. Leja bena mu tshisumbu tshienu dijinga diebe dia kulua mpanda-njila muambuluishi, nangananga badi ne nsombelu wa buena webe. Bidi mua kubafikisha pabu ku dilua bampanda-njila bambuluishi.
9. Nngondo kayi iudi mua kusungula bua kuikala mpanda-njila muambuluishi?
9 Paudi utangila programe webe uudi muenze bua tshidimu tshipiatshipia tshia mudimu, nngondo kayi uudi mumona ne: udi mua kulua mpanda-njila muambuluishi? Wewe wenza mudimu udi ukuangata dîba dia bungi anyi uya mu kalasa, udi mua kusungula ngondo ituku dikisha anyi idi ne matuku a Disambombo atanu anyi a Dia lumingu atanu. Tshilejilu, ngondo wa 9, wa 12, ngondo 3 ne wa 8 idi ne matuku a Disambombo atanu ne a Dia lumingu atanu. Ngondo 5 udi ne matuku a Disambombo atanu, ne ngondo 6 udi ne a Dia lumingu atanu. Wewe muikale ne tusamasama, sungula ngondo itu kayiyi ne mvula ya bungi anyi miunya mikole. Udi kabidi mua kuangata bumpanda-njila mu ngondo walua mutangidi wa tshijengu mu tshisumbu tshienu. Mu dikumbula diende edi, newikale ne diakalenga dia kubuela mu tshitupa tshia kumpala tshia tshisangilu tshienzaye ne bampanda-njila ba pa tshibidilu. Bu muikala Tshivulukilu tshia 2008 ne bua kuenzeka mu dia 22 a ngondo muisatu, nunku ngondo 3 too ne ku 5 idi payi ngondo mimpe bua kuikala mpanda-njila muambuluishi. Paudi anu usungula ngondo umue anyi mivule iudi musue kulua mpanda-njila muambuluishi, enza diakamue programe udi mua kukuambuluisha bua kukumbaja mêba adi bampanda-njila bambuluishi ne bua kufila.
10. Ntshinyi tshiudi mua kuenza wewe mumone ne: kuena mua kulua mpanda-njila muambuluishi?
10 Nansha wewe mumona ne: kuena ne mushindu wa kulua mpanda-njila muambuluishi mu tshidimu tshia mudimu tshitudi tubanga etshi, udi anu mua kuenza mudimu bikole. Tungunuka anu ne kuyisha ne muebe muonso mushindika ne: Yehowa udi usanka padiye ukumona umuenzela mudimu ne muebe muonso muudi namu. (Gal. 6:4) Ambuluishe badi benza mudimu eu ne ubakoleshe ku muoyo. Udi nansha mua kuakaja programe webe bua kuyisha dituku diutu kuyi uyisha mu lumingu bua kumona mua kuyisha ne bana betu badi bampanda-njila bambuluishi.
11. Bua tshinyi tudi ne bua kuenza malu ne mitalu?
11 Bantu ba Yehowa mbamanye ne: katuena mu tshikondo tshia kujimija dîba to. Kudi mudimu udi ne bua kuenjibua, mmudimu wa kuyisha lumu luimpe. Mioyo ya bantu idi mu njiwu ne dîba didi dishale ndikese menemene. (1 Kol. 7:29-31) Dinanga ditudi nadi bua Nzambi ne bua bantu netu neditusake bua kuenza muetu muonso bua kuyisha bikole. Wewe mudienzeje ne muenze programe muimpe, neufike ku dilua mpanda-njila nansha bua ngondo umue patupu mu tshidimu tshia mudimu tshipiatshipia etshi. Etshi ke tshipatshila tshitambe buimpe tshiudi mua kudifundila.