Kuandamuna ne Bible

PATUBU batuela nkonko bua malu atutu tulongesha, bua malu atutu tuenza, bua adi enzeka, bua ditekemena ditudi nadi bua matuku adi kumpala, tutu tuenza muetu muonso bua kuandamuna ne Bible. Bua tshinyi? Bualu Bible n’Dîyi dia Nzambi. Malu atutu tulongesha atu afumina mu Bible. Tutu tuenza malu mu diumvuangana ne Bible. Bible ke utu utuleja mmuenenu wa kuikala nende pa malu adi enzeka lelu. Malu adi Nzambi mutulaye mu Bible ke atutu tutekemena ne mutshima mujima.​—2 Tim. 3:16, 17.

Tutu bamanye bimpe tshidi dîna dietu ditulomba bua kuenza. Tudi Bantemu ba Yehowa. (Yesh. 43:12) Nanku patutu tuandamuna nkonko, tutu tushindamena pa tshidi Yehowa wamba mu Dîyi diende, pamutu pa kulonda ngenyi ya bantu. Ntshia bushuwa bua se: muntu ne muntu utu ne wende mmuenenu wa malu, kadi tshidibi tutu tukeba bua meji etu alonde Dîyi dia Nzambi bualu tudi tuitaba tushindika ne: diodi ke bulelela menemene. Eyowa, Bible utu utulekela mu malu a bungi bua kuenza mutudi basue. Nenku pamutu pa kuenzeja bantu malu ku bukole, tutu basue kubalongesha mêyi manene adi mu Bible, tubalekela pabu basungula tshia kuenza. Tudi tukeba ne: bantu ‘batumikile mu ditabusha’ anu bu muvua Paulo ukeba pende.​—Lomo 16:26.

Buakabuluibua 3:14 udi ubikila Yezu Kristo ne: “Mumanyishi wa kueyemena ne mulelela.” Uvua wenza tshinyi mu nsombelu kampanda, ne uvua wandamuna nkonko munyi? Imue misangu uvua ukuata mudimu ne mifuanu ivua yeleshisha bantu meji. Mikuabu misangu uvua webeja mumuedi wa lukonko muvuaye yeye nkayende umvua mifundu. Misangu mivule uvua utela mêyi a mvese mijima, wamba mvese ayi mu makuabu mêyi, anyi wamba malu tshianana avua atuma meji a bantu ku mvese kampanda. (Mat. 4:3-10; 12:1-8; Luka 10:25-28; 17:32) Tshikondo tshivua Yezu pa buloba, bavua balama mivungu ya Mukanda wa Nzambi mu sunagoga. Kakuena tshidi tshileja ne: Yezu uvua ne yende mivungu to, kadi tshivuabi uvua mumanye mifundu bikole, uvua uyitela bikole dîba divuaye ulongesha. (Luka 24:27, 44-47) Nenku uvua muambe bulelela pakambaye ne: malu avuaye ulongesha kaavua afumina kudiye to. Uvua wamba malu avuaye mumvuile kudi Tatuende.​—Yone 8:26.

Eyowa, tudi basue kuidikija Yezu. Kadi nansha mututu katuyi banji kuyikila ne Nzambi nkayende bu mutu Yezu muenze, tudi ne Bible (anyi Dîyi dia Nzambi). Patudi tuandamuna nkonko ne Bible, katuena tukoka meji a batuteleji kutudi tuetu to. Tudi tuleja mutudi bashindike ne: Nzambi ke udi ne bua kutuleja tshidi tshilelela, kadi ki mbantu nansha.​—Yone 7:18; Lomo 3:4.

Tshidibi, dijinga dietu kadiena amu dia kuenza mudimu ne Bible to, kadi ndia kuenza mudimu mu mushindu udiye mua kuambuluisha bantu bikole. Tutu basue ne: bantu batuteleje ne meji mimpe munda. Bilondeshile tshidi muntu, udi mua kubueja Bible mu muyuki pa kuamba ne: “Kuenaku umona ne: tshidi ne mushinga ntshidi Nzambi wamba anyi?” Anyi ne: “Utuku mumanye ne: Bible udi wakula pa tshilumbu etshi anyi?” Bikala muntu kayi wanyisha Bible, udi mua kuamba tshilejilu ne: “Ndi musuaku kuyikila nebe pa mulayi wa kale eu.” Peshi ne: “Mukanda udi mutangalake bikole menemene pa buloba udi wamba ne: . . . ”

Imue misangu udi mua kuamba anu mêyi a mu mvese kampanda mu yebe miaku. Kadi padiku mushindu, mbitambe bulenga kubadila buludiludi mvese mu Bible. Padibi biakanyine, udi mene mua kulejila muntu mvese mu Bible wende nkayende. Kubala Bible kua nunku kutu kulenga bikole mitshima ya bantu.​—Eb. 4:12.

Bakulu bena Kristo badi ne bujitu bunene bua kukuata mudimu ne Bible padibu bandamuna nkonko. Bumue bua ku malu malomba muntu bua kulua mukulu, budi ne: udi ne bua ‘kulamata dîyi didi mua kueyemenyibua’ padiye ulongesha. (Tito 1:9) Muena Kristo udi mua kuangata dipangadika dinene kunyima kua mukulu mumane kumupesha mubelu. Ke bualu kayi mubelu au udi ne tshia kuikala muashila pa Mukanda wa Nzambi. Padi mukulu ukuata mudimu bimpe ne Bible, bana betu bakuabu nebamuidikije.