Endayi ne dikima mu njila ya Yehowa
“Muena disanka mmuntu yonso udi utshina Yehowa, eu udi wenda mu njila yende.”—MUSAMBU WA 128:1.
1, 2. Miyuki ya mu Bible ya miaku ne bienzedi bia bantemu ba Yehowa ba kumpala idi ne diambuluisha kayi?
DÎYI dinsantu dia Yehowa ndiuwule tente ne miyuki idi yakula bua mateta ne masanka bia bamusadidi bende balamatshi ba mikenji. Malu akenzekela Nowa, Abrahame, Sara, Yoshua, Debora, Barake, Davidi, ne bakuabu mmalejibue patoke mu mabeji a mukanda eu. Buonso buabu mbantu balelela bavua ne tshintu kampanda tshia pa buatshi tshia muomumue. Bavua ne ditabuja kudi Nzambi ne bakenda ne dikima mu njila yende.
2 Miaku ne bienzedi bia bantemu ba Yehowa ba kumpala bidi mua kutukankamija bua kuenza madikolela bua kumona mua kuenda mu njila ya Nzambi. Kabidi, netuikale ne disanka bitualeja kanemu kuondoke kudi Nzambi ne kumuleja ditshina dikezuke dia dipanga kumusankisha. Ebi mbilelela nansha bituapeta mateta mu nsombelu, bualu mufundi wa misambu muenzeja kudi spiritu wa Nzambi wakimba ne: “Muena disanka mmuntu yonso udi utshina Yehowa, eu udi wenda mu njila yende.”—Musambu wa 128:1.
Tshidi dikima mene
3. Dikima ntshinyi?
3 Bua kuenda mu njila ya Yehowa, tudi ne bua kuikala ne dikima. Ke bua tshinyi Mifundu idi ilomba bena tshisamba tshia Nzambi bua kuleja tshikadilu etshi. Tshilejilu, Davidi mufundi wa misambu wakimba ne: “Ikalayi ne dikima, ne mutshima wenu wikale mukole, nuenu buonso badi bindila Yehowa.” (Musambu wa 31:24) Dikima “ndikandamana bikole, dikola dia muoyo kumpala kua njiwu, makenga a ku mubidi anyi a mu lungenyi.” (Le Grand Robert, Dictionnaire alphabétique et analogique de la langue française, 1991) Muntu muena dikima udi ne bukole, muena bukitu ne mmuntu wa mpolondo. Miaku ya mupostolo Paulo ivuaye muambile Timote, muenzejanganyi nende wa mudimu, idi ileja ne: “Nzambi ki mmutupeshe spiritu wa buowa, kadi spiritu wa bukole ne dinanga ne mmuenenu muimpe mu tshieledi tshia lungenyi.”—2 Timote 1:7.
4. Ng’umue mushindu kayi utudi mua kupeta dikima?
4 Mushindu kampanda wa kupeta dikima didi Nzambi ufila nkukonkonona mu masambila Dîyi dia Yehowa, Bible. Miyuki mivule idi mu Mifundu idi mua kutuambuluisha bua kulua bena dikima dikole. Nenku, tuanjibi kumona tshitudi mua kulongela ku miyuki idi mu Mifundu ya tshiena-Ebelu idi yakula bua bamue ba ku [bantu] bakenda ne dikima mu njila ya Yehowa.
Dikima bua kumanyisha mukenji wa Nzambi
5. Mmunyi mudi dikima dia Henoke mua kuikala ne dikuatshisha bua basadidi ba Yehowa ba mu matuku etu aa?
5 Dikima dia Henoke didi mua kuambuluisha basadidi ba Yehowa ba mu tshikondo tshietu etshi bua kumanyisha ne dikima mukenji wa Nzambi. Bangabanga ne Henoke kuledibua, “bakatuadija kubila dîna dia Yehowa.” Bamue bashikuluji ba Bible badi bamba ne: bakatuadija kubikila dîna dia Yehowa “mu mushindu mubule kanemu.” (Genese 4:25, 26; 5:3, 6) Pamu’apa bakinyika bantu, anyi mpingu, dîna dia Nzambi. Ke bua tshinyi, pakaledibua Henoke mu 3404 K.B.B., ntendelelu wa dishima uvua mu dilubuluka dikole. Pa nanku, mbimueneke se: amu yeye ke uvua ‘muende ne Nzambi,’ munanukile mu bienzedi biakane mu diumvuangana ne bulelela bua Yehowa busokolola.—Genese 5:18, 24.
6. (a) Mmukenji kayi mukole uvua Henoke mumanyishe? (b) Ndishindika kayi ditudi mua kuikala nadi?
6 Ne dikima dionso, Henoke wakamanyisha mukenji wa Nzambi, imue misangu pa kufila bumanyishi. (Ebelu 11:5; fuanyikija ne 2 Petelo 2:5.) “Monayi!” ke muakamba ntemu eu tshienda-nkaya, “Yehowa mmulue ne misumba yende minsantu ikena-kubadika, bua kukumbaja dilumbuluisha kudi buonso ne bua kutshimuna bapetudi ba Nzambi buonso ku bienzedi biabo bibi bivuabo benze, ne ku miaku mibole ivua bena mpekatu bapendi ba Nzambi bamudiwule nayi.” (Yuda 14, 15) Henoke uvua ne dikima bua kutumika ne dîna dia [Nzambi], Yehowa, pakamanyishaye mukenji eu uvua upiisha bapetudi ba Nzambi. Anu bu muvua Nzambi mupeshe Henoke dikima bua kumanyisha mukenji au mukole, bia muomumue, Yehowa mmupeshe Bantemu bende ba mu tshikondo etshi bukole bua kumanyisha Dîyi diende ne bukitu mu bumanyishi bua ku nzubu ne ku nzubu, mu tulasa ne miaba mikuabu.—Fuanyikija ne Bienzedi 4:29-31.
Dikima mu mateta
7. Nowa wakafila tshilejilu kayi tshia dikima?
7 Tshilejilu tshia Nowa tshidi mua kutuambuluisha bua kukumbaja midimu miakane ne dikima patudi mu mateta. Ne ditabuja pamue ne dikima, Nowa wakatumikila didimuija dia Nzambi divua ditangila mvula wa kabutu uvua ne bua kuloka pa buloba bujima ne “wakenza buatu bua kupandisha ba mu nzubu muende.” Ku bienzedi biende bia butumike ne biakane, Nowa wakapiisha bulongolodi bubule ditabuja bua bienzedi biabu bibi ne kuleja patoke se: bulongolodi abu buvua bukumbanyine kabutu. (Ebelu 11:7; Genese 6:13-22; 7:16) Pa kueleela meji pa nsombelu wa Nowa, basadidi ba Nzambi ba lelu badi bapeta dikima bua kukumbaja midimu miakane, bu mudi mudimu wa bena nkristo wa buambi.
8. (a) Ndutatu kayi luakatantamena Nowa “mumanyishi wa buakane” wa dikima? (b) Ntshinyi tshiatuenzela Yehowa bituikala bamanyishi ba buakane ba dikima?
8 Bituikala ne nsombelu muakane, kadi, katuyi bamanye mua kutantamena mateta, tusambile bua kupeta meji atuambuluisha bua kuatshimuna. (Yakobo 1:5-8) Dilamata dia Nowa ku mikenji ya Nzambi mu mateta didi dileja se: kudi mushindu wa kutantamena ntatu ne dikima ne lulamatu. Nowa wakatantamena buenzeji bua bulongolodi abu bubi kabidi ne bua banjelo babi bakadivuadika mibidi ya bantu ne bua ndelanganyi yabu ivua bidika. Eyowa, Nowa uvua “mumanyishi wa buakane” wa dikima munkatshi mua “bulongolodi bukulukulu” bufundila kabutu. (2 Petelo 2:4, 5; Genese 6:1-9) Wakakula ne bukitu, bu mutuadi wa mukenji wa Nzambi wa didimuija bantu bavuaku kumpala kua mvula wa kabutu, kadi, “kabakasunguluja bualu nansha bumue too ne pa kalua mvula wa kabutu ne kubabutula buonso.” (Matayi 24:36-39) Kadi, tuvulukayi se: nansha mudiku dikengeshibua ne dibenga kusankidila mukenji wetu mushindamena pa Bible, Yehowa neatukoleshe mu maboko anu muakakoleshaye Nowa mu maboko, bitualeja ditabuja ne dikima bia muomumue bu mutudi bamanyishi ba buakane.
Dikima bua kutumikila Nzambi
9, 10. Nku tshinyi kuvua Abrahame, Sara, ne Izake baleje patoke butumike ne dikima dionso?
9 “Mulunda wa Yehowa” Abrahame ntshilejilu tshilenga tshitambe tshia ditumikila Nzambi ne dikima. (Yakobo 2:23) Abrahame uvua ukengela ditabuja ne dikima bua kutumikila Yehowa ne kumbuka ku Ur, tshimenga tshia bena Kaldé, tshivua tshipetesha masanka mavule a bintu bia ku mubidi. Wakitabuja dilaya dia Nzambi dia se: “mêku wonso a pa buloba” neabeneshibue ku butuangaji buende ne ndelanganyi yende neyipeshibue ditunga. (Genese 12:1-9; 15:18-21) Ku ditabuja, Abrahame “wakasomba bu muenyi mu ditunga dia dilaya” ne kushala muindile “tshimenga tshidi ne bishimikidi bilelela”—Bukalenge bua Nzambi bua mu diulu, ne neabiishibue ku lufu bua kuikala ne muoyo pa buloba bukokesha kudi Bukalenge ebu.—Ebelu 11:8-16.
10 Sara, mukaji wa Abrahame, uvua pende ne ditabuja ne dikima bivua bikengedibua bua kumbuka ku Ur, kuya ne bayende ku ditunga dienyi, ne kunanukila mu nsombelu kayi yonso mikole ivua ne bua kubafikilaku. Mmushindu kayipu wakafutshibuaye bu muakatumikilaye Nzambi ne dikima dionso! Nansha muvuaye nkumba too ne ku bidimu 90 ne “mumane kupitshisha bidimu bia kuimita,” Sara wakapeshibua bukole ‘bua kuimita kankanunuina, bualu uvua utshinka se: Nzambi uvua mulaye mmuena lulamatu.’ Pashishe, wakalela Izake. (Ebelu 11:11, 12; Genese 17:15-17; 18:11; 21:1-7) Bidimu bivule pashishe, Abrahame wakatumikila Nzambi ne dikima ne “pa kuamba mene, wakalambula Izake.” Pamukandikile muanjelo, nkambua wakapeta muanende muena dikima ne butumike anu bu mupatula mu lufu, ne “bivua muanda wa tshimfuanyi.” Nenku, yeye ne Izake bakakumbaja mu mulayi, mudimu wa Yehowa uvua ne bua kufila Muanende, Yezu Kristo, bu mulambu wa tshia-bupikudi, bua aba buonso badi benza midimu ya ditabuja kudiye bapete muoyo wa kashidi. (Ebelu 11:17-19; Genese 22:1-19; Yone 3:16) Kabiyi mpata, ditumikila dia dikima dia Abrahame, Sara, ne Izake didi ne bua kutusaka bua kutumikila Yehowa ne kutungunuka ne kuenza disua diende.
Dikima bua kuditeka ku luseke lua tshisamba tshia Nzambi
11, 12. (a) Mmunyi muvua Mozese muleje dikima kumpala kua tshisamba tshia Yehowa? (b) Pa kumona dikima dia Mozese, nkonko kayi itudi ne bua kudiebeja?
11 Mozese wakaditeka ne dikima ku luseke lua tshisamba tshia Nzambi tshivua tshikengeshibua. Mu siekele wa 16 K.B.B., baledi ba Mozese buobo bine bakaleja dikima. Kabayi batshina diyi-dituma kudi mukalenge divua dilomba bua kushipa bana ba balume ba katoto buonso ba bena Ebelu, bakasokoka Mozese ne kumubuikidija mu tshisaka tshia ntupu, e kumuteka mu malenge ku kaala kua musulu wa Nile. Pakamusanganabu kudi nsongakaji wa Faraone, wakamukolesha anu bu muanende mulela, nansha muvuaye mutuadije kupeta dilongesha dia mu nyuma mu nzubu mua baledi bende. Bu muvuaye umue wa ku bena mu nzubu wa Faraone, Mozese “wakalongeshibua mu meji wonso a bena Ejipitu,” ne wakalua muntu wa “bukole mu ngakuilu ne bienzedi biende,” mbuena kuamba ne: bukole bua mu ngelelu wa lungenyi ne bua mubidi.—Bienzedi 7:20-22; Ekesode 2:1-10; 6:20.
12 Nansha muvuaye mu masanka a bintu bia ku mubidi mu nzubu wa mukalenge, Mozese wakasungula ne dikima dionso bua kuditeka ku luseke lua batendeledi ba Yehowa, bavua bakuatshibue ku bupika kudi bena Ejipitu. Pa kusungila muena Izalele kampanda, wakashipa muena Ejipitu kansanga, ne pashishe kunyemena mu ditunga dia Madiane. (Ekesode 2:11-15) Pabuipi ne bidimu 40 ku shòò, Nzambi wakatumika nende bua kupikula bena Izalele ku bupika. Mozese “wakumuka mu Ejipitu kayi utshina tshiji tshia mukalenge,” uvua umufunyina bua kumushipa bualu uvua muena-mpala wa Yehowa bua diakalenga dia bena Izalele. Mozese wakenda anu bu uvua umona ‘Eu ukêna-umueneka,’ Yehowa Nzambi. (Ebelu 11:23-29; Ekesode 10:28) Udiku pebe ne ditabuja dia mushindu’eu ne dikima bua kushala mulamate Yehowa ne tshisamba tshiende nansha mudiku mateta ne dikengeshibua anyi?
Dikima bua ‘kulonda Yehowa mu bionso kakuyi didikanda’
13. Mbilejilu kayi bia dikima bivua Yoshua ne Kalebe bafile?
13 Dikima dia Yoshua ne Kalebe diakajadika patoke se: tudi mua kuenda mu njila ya Nzambi. “Bakalonda Nzambi mu bionso kabayi badikanda.” (Nomba 32:12) Yoshua ne Kalebe bavua munkatshi mua balume 12 bakatumibua bua kutentekela Buloba bulaya. Pa kutshina bantu bavua bâsemu, batentekedi 10 bakateta mua kutekesha bena Izalele mu maboko bua kubuela mu Kanana. Kadi, Yoshua ne Kalebe bakamba ne dikima dionso ne: “Bikala Yehowa musanke bua bualu buetu, kabiyi mpata, neatubueje mu ditunga edi ne neatupeshedi, nditunga didi diuwule tente ne mabele ne buitshi. Tshidibi, kanutombokedi Yehowa to; ne kanutshinyi tshisamba tshia mu ditunga edi nansha kakese, bualu badi bu mampa buetu tuetu. Tshisokomenu tshiabu tshiakumbuka pa mutu pabo, kadi Yehowa udi netu. Kanubatshinyi to.” (Nomba 14:8, 9) Bua dipanga dikima ne ditabuja, bena Izalele ba tshipungu atshi kabakabuela mu ditunga dilaya. Kadi, Yoshua ne Kalebe, bakabuelamu pamue ne bena tshipungu tshipiatshipia.
14, 15. (a) Bu muvua Yoshua mutumikile miaku idi mu Yoshua 1:7, 8, ntshinyi tshiakamufikila, yeye ne bena Izalele kabidi? (b) Ndilongesha kayi dia dikima ditudi tupeta kudi Yoshua ne Kalebe?
14 Nzambi wakambila Yoshua ne: “Ikala ne dikima ne bukole menemene, bua kutabalela bua kuenza malu bilondeshile Mikenji ivua Mozese, musadidi wanyi, mukutumine dîyi. Kuyisesuki ku dia bakaji anyi ku dia balume, bua umone mua kuenza malu ne meji muaba wonso uwaya. Mukanda eu wa Mikenji kawena ne bua kumbuka mukana muebe, udi ne bua kuubala ne dîyi dia panshipanshi butuku ne munya, bua utabalela mua kuenza malu bilondeshile bionso bidi bifundamu; bualu [biwenza nunku], apo neulubuluje njila webe ne newenze malu ne meji.”—Yoshua 1:7, 8.
15 Bu muakatumikila Yoshua mêyi aa, Yeriko ne bikuabu bimenga biakapona mu bianza bia bena Izalele. Ku Gabaone, Nzambi wakimanyika dîba bua kushaladi dikenka too ne pavua Izalele ne bua kutshimuna. (Yoshua 10:6-14) Pakamupulumukila basalayi baluishi bavua badisangishe bua kubaluisha ne bavua pabo “bungi buvule butambe bu tutete tua lusenge tudi ku muelelu wa mbuu,” Yoshua wakenza malu ne dikima, ne tshiakabidi Yehowa wakapetesha bena Izalele ditshimuna. (Yoshua 11:1-9) Nansha mutudi bantu bapange bupuangane anu bu Yoshua ne Kalebe, tudi mua kulonda Yehowa mu bionso katuyi tudikanda, ne Nzambi udi mua kutupesha bukole bua kuenda ne dikima mu njila yende.
Dikima bua kueyemena Nzambi
16. Mmu mishindu kayi muvua Debora, Barake, ne Jaele baleje dikima?
16 Aba badi beyemena Nzambi ne dikima badi bafutshibua, anu bu mudibi bimuenekela ku mianda yakenzeka mu tshikondo tshivua ba-nzuji balumbuluisha mu Izalele. (Luta 1:1) Tshilejilu, mulumbuluishi Barake ne muprofete mukaji Debora bakeyemena Nzambi ne dikima dionso. Jabine, mukalenge wa Kanana uvua ukengesha bena Izalele bikole bitambe katshia bidimu 20 pakatuma Yehowa dîyi, ku butuangaji bua Debora, kudi Barake bua kusangisha bantu 10 000 ku mukuna wa Tabore. Sisera, mfumu wa biluilu bia Jabine wakaya ne lukasa luonso mu tshibanda tshia Kischon, ne dishindika dia se: pa tshipapu etshi tshia buloba tshibatame, bena Izalele kabakukumbana bua kuakamangana ne basalayi bende ne matempu ende a mvita 900 avua ne biamu bisakisha ku nkata yawu. Bena Izalele pakabuelabu mu tshibandabanda-mpata, Nzambi wakabasungila, ne mvula wa tshimpitshimpi wakavuija muaba au bitotshibitotshi, e kujamijabi matempu a mvita a Sisera. Bantu ba Barake bakatshimuna, nenku, “bena tshitudilu buonso ba Sisera bakabutudibua ku muele wa mvita.” Sisera wakanyema too ne ku ntente wa Jaele, kadi, pavua Sisera mulale tulu, mukaji eu wakapeta dikima bua kumushipa pa kumubueja tshipanda tshia ntente mu mpuipu ya matshi. Bilondeshile miaku ya buprofete ivua Debora mumanyishe Barake, nenku, “tshintu tshilengele” tshia ditshimuna edi tshiakaya kudi mukaji. Ku diambuluisha dia dikima divua Debora, Barake ne Jaele baleje pa kueyemena Yehowa, Izalele “wakashala mu ditalala munkatshi mua bidimu 40.”—Balumbuluishi 4:1-22; 5:31.
17. Ntshilejilu kayi tshia dieyemena Yehowa ne dikima tshivua nzuji Gédéon mufile?
17 Nzuji Gédéon wakeyemena Yehowa Nzambi ne dikima dionso pakalua bena Madiane, bavua badisangishe ne bena bisamba bikuabu, kuluisha Izalele. Nansha muvuabu bungi bukese pa kufuanyikija ne baluishi babu bavua pabuipi ne bantu 135 000, basalayi ba bena Izalele 32 000 bavua mua kusanka bua ditshimuna dikavua Nzambi pa kubapesha bilondeshile bukitu buabu. Nunku, ku dîyi diakatuma Yehowa, Gédéon wakaabuluja biluilu biende mu bisumbu bisatu bia bantu 100 ku tshisumbu tshionso. (Balumbuluishi 7:1-7, 16; 8:10) Bantu aba 300 bakanyungulula tshitudilu tshia bena Madiane butuku, muntu yonso uvua muambule mpungi ne kalondo ka mâyi ne tshimunyi munda muaku. Pakafilabu tshimanyinu, buonso buabo bakela mpungi, kushipa tulondo, kuela bimunyi bitemesha kapia muulu ne kuelabo mbila ne: “Muele wa mvita wa Yehowa ne Gédéon!” (Balumbuluishi 7:20) Bena Madiane bakakatamuka ne buowa, kutuadija kunyema ne bakatshimunyibua. Mianda ya mushindu’eu idi ne bua kututuisha se: bitueyemena Nzambi ne dikima dionso, tuetu petu netufutshibue lelu’eu.
Dikima bua kutumbisha Yehowa ne kuluila ntendelelu mukezuke
18. Pakashindaye Goliate, ntshinyi tshiakenza Davidi ne dikima dionso?
18 Bimue bilejilu bia mu Bible bidi bitupetesha dikima bua kutumbisha Yehowa ne kuluila ntendelelu mukezuke. Nsongalume Davidi, wakasungila ne bukitu mikoko ya tatuende, wakaleja dikima kumpala kua Goliate muena Filistia wa mpolondo. “Udi ulua kundi ne muele wa mvita, ne difuma ne difuma dia kabenda,” ke muakamba Davidi, “kadi, meme, ndi mvua kuudi ne dîna dia Yehowa wa biluilu, Nzambi wa milongo ya bena mvita ba Izalele, uudi muyobole. Mu dituku edi, Yehowa neakufile mu tshianza tshianyi, ne bushuwa nenkushinde ne nenkose mutu webe; . . . ne bantu pa buloba bujima nebamanye se: Nzambi wa bena Izalele udiku. Ne tshisumbu etshi tshionso netshimanye se: ki nku muele wa mvita anyi ku difuma kudi Nzambi upandisha, bualu mvita n’ya Yehowa.” (1 Samuele 17:32-37, 45-47) Ne diambuluisha dia kudi Nzambi, Davidi wakatumbisha Yehowa ne dikima; wakashinda Goliate ne kukumbaja mudimu munene pa kumbusha njiwu ya kudi bena-Filistia pa ntendelelu mukezuke.
19. Mbua programme kayi wa mudimu buvua Solomo ukengela dikima, ne mmunyi mutudi mua kumuidikija mu matuku etu aa?
19 Pakavua muanende, Solomo, pabuipi ne kuibaka ntempelo wa Nzambi, mukalenge Davidi ukavua mukulakaje wakamukankamija ne: “Ikala ne dikima ne bukole ne utumike. Kutshinyi ne kukuatshiki buowa, bualu Yehowa Nzambi, Nzambi wanyi, udi nebe. Kakukulekela nansha kakese anyi kakukuimansha, too ne pajika mudimu wonso wa nzubu wa Yehowa.” (1 Kulondolola 28:20) Pa kuenza malu ne dikima, Solomo wakajikija ntempelo bimpe. Patudi lelu’eu tupeta ntatu mu dikumbaja programme wa luibaku bua midimu ya Bukalenge bua Nzambi, tuvulukayi miaku ya Davidi eyi: “Ikala ne dikima ne bukole ne utumike.” Mmushindu kayipu bulenga wa kutumbisha Yehowa ne kulubuluja ntendelelu mukezuke!
20. Mmu muanda kayi muvua mukalenge Asa muleje dikima?
20 Bu muvuaye ne dijinga dia kutumbisha Nzambi ne kulubuluja ntendelelu mukezuke, mukalenge Asa wakumbusha mpingu ne balume bendi ba masandi ku ntempelo mu ditunga dia Yuda. Wakatonkola kabidi kakuende-mukaji mutontolodi pa muanzu wende mubandile ne kuosha “lupingu luende lukuate buowa.” (1 Bakalenge 15:11-13) Eyowa, Asa “wakapeta dikima ne kumbusha bintu bionso bia bukoya mu ditunga dijima dia Yuda ne dia Benjamin, kabidi ne mu bimenga biakatshimunaye ne kukokesha kumbukila ku mikuna ya rejon wa Efrayime, ne wakaasulula tshioshelu tshia Yehowa, tshivua kumpala kua mbalanda wa ku tshiibi tshia [nzubu] wa Yehowa.” (2 Kulondolola 15:8) Utuku pebe wimansha butontolodi ne dikima dionso ne uluila ntendelelu mukezuke anyi? Utuku utumika ne bintu biebe bia ku mubidi bua kulubuluja midimu ya Bukalenge anyi? Ne utuku ukeba mua kutumbisha Yehowa pa kudifila pa tshibidilu mu bumanyishi bua lumu luimpe lua Bukalenge anu mudi Bantemu bende ne bua kuenza anyi?
21. (a) Mmunyi mudi miyuki ya bantu bena muoyo mutoke ba mu tshikondo tshia kumpala kua bena-nkristo mua kutuambuluisha? (b) Ntshinyi tshituakonkonona mu tshiena-bualu tshidi tshilonda?
21 Ndianyisha kayipu ditudi nadi bua mudi Nzambi mukube miyuki eyi mu Mifundu idi yakula bua bantu bena dikima ne bena muoyo mutoke ba mu tshikondo tshia kumpala kua bena nkristo! Kabiyi mpata, bilejilu biabu bilenga bidi mua kutuambuluisha bua kukumbajila Yehowa mudimu munsantu ne dikima, ditshina dia Nzambi ne buowa bukole. (Ebelu 12:28) Kadi, Mifundu ya bena nkristo ya tshiena-Greke, idi payi ne bilejilu bia ditshina dia Nzambi bidi ne buenzeji bukole. Mmunyi mudi imue ya ku miyuki eyi mua kutuambuluisha bua kuenda ne dikima mu njila ya Yehowa?
Mmunyi muwandamuna?
◻ Dikima ntshinyi?
◻ Mmunyi muvua Henoke ne Nowa baleje dikima?
◻ Mmushindu kayi uvua Abrahame, Sara, ne Izake benze malu ne dikima?
◻ Mbilejilu kayi bia dikima biakafila Mozese, Yoshua ne Kalebe?
◻ Mmunyi muvua bakuabu bantu baleje bua se: bavua ne dikima bua kueyemena Nzambi?
[Tshimfuanyi mu dibeji 15]
Gédéon ne kasumbu kende kakese ka bena mvita bakeyemena Yehowa ne dikima