Bua tshinyi kutshina Nzambi mulelela mpindieu?

“Utshine Nzambi mulelela ne ulame mêyi-matuma ende. Bualu ke tshionso tshidi muntu mulombibue bua kuenza.”​—MUAMBI 12:13, NW.

1, 2. Bua tshinyi ditshina diakane dia Nzambi ndiakanyine?

DITSHINA dia Nzambi diakane ne dia kanemu kuondoke ndimpe bua muntu. Eyowa, nansha mudi ditshina dia bantu bavule dilubakaja tshieledi tshia lungenyi, anyi mene dinyanga dikala dietu dimpe, mbimpe bua tuetu kutshina Yehowa Nzambi.​—Musambu wa 112:1; Muambi 8:12.

² Mufuki mmumanye bualu ebu. Musaka kudi dinanga bua bifukibua biende, udi utumina buonso dîyi bua kumutshina ne kumutendelela. Tudi tubala ne: “Meme kumona muanjelu mukuabu ubuuka munkatshi mua diulu, uvua ne lumu luimpe lua kashidi lua kumanyisha bu mukenji wa disanka kudi aba badi basombe pa buloba, ne kudi ditunga dionso ne tshisa tshionso ne muakulu wonso ne tshisamba tshionso, wamba ne dîyi dikole ne: ‘Tshinayi Nzambi ne numupe butumbi, bualu dîba dia dilumbuluisha kudiye diafiki, ne tendelelayi Eu udi muenze diulu ne buloba.’”​—Buakabuluibua 14:6, 7, NW.

3. Ntshinyi tshiakenza Mufuki bua baledi betu ba kumpala?

³ Bushuwa katuena ne bua kubenga kumanya Mufuki wa bintu bionso, Mpokolo wa muoyo, bualu tuetu ne dibulunge-buloba edi tudi mu bianza biende. (Musambu wa 24:1) Mu dileja dinanga diende dinene, Yehowa wakapesha bana bende ba pa buloba muoyo ne kubapetesha muaba wa dikema wa kusombela​—mparadizu mulengele. Kadi, tshipedi etshi tshia kuanyina katshivua tshifila patupu. Bulelela, tshiakafidibua bu tshintu tshieyeka. Baledi betu ba kumpala bavua ne bua kutabalela tshisombedi tshiabu ne kutshialabaja too ne pavuabu ne bua kuuja ne kukokesha buloba bujima. Bavua ne masanka a mudimu ne majitu adi atangila nyama idi pa buloba buume, nyunyu, ne mishipa​—bifukibua bikuabu bionso bidi ne muoyo bivua ne bua kuikala nabu ne ndelanganyi yabu pa buloba. Bua tshintu tshinene etshi tshimueyeka, muntu uvua ne bua kuandamuna kudi Nzambi.

4. Ntshinyi tshidi muntu muenzele bufuki bua Nzambi?

⁴ Nansha muvuaku ntuadijilu au wa kuanyina, tangila tshidi muntu muenze bua kunyanga buloba, tshisombedi tshiende tshilengele! Ku dilengulula ne kapeja tshilenga etshi tshia Nzambi, bantu mbavuije buloba bûle tente ne bukoya. Dinyanga ndifike too ne ku diteka mu njiwu dikalaku dia mishindu mivulavulayi ya nyama, nyunyu, ne mishipa. Nzambi wetu muakane ne muena dinanga kakulekelela bualu ebu tshiendelele. Dinyanga ku bukole dia buloba didi dilomba diandamuna kudi Nzambi, dìdì bantu ba bungi ne kabingila ka kutshinyina. Ku luseke lukuabu, bua aba badi beyemena Nzambi ne kanemu kuonso, bidi bikolesha ku muoyo pa kumanya tshienzeka. Yehowa nealombe diandamuna kudiye, ne buloba nebuakajuludibue. Ebi bulelela bidi ngumu ya disanka bua bantu buonso bena mitshima miakane badi pa buloba.

5, 6. Mmunyi mualua Yehowa kuandamuna ku tshidi muntu muenzele bufuki Buende?

⁵ Nku butuangaji bua nganyi kuakumbaja Nzambi dilumbuluisha diende? Nku butuangaji bua Yezu Kristo, ukadi musombesha mu nkuasa bu Mukalenge wa Bukalenge bua Nzambi bua mu diulu. Ku butuangaji bua Muanende eu wa mu diulu, Yehowa neafikishe ndongoluelu eu wa bukoya, mutomboke, ku nshikidilu. (2 Tesalonike 1:6-9; Buakabuluibua 19:11) Mu mushindu eu neapeteshe disulakana kudi aba badi bamutshina ne, kabidi, neapikule ku njiwu ne kukuba buloba, tshisombedi tshietu.

⁶ Mmunyi muapitabi? Bible udi wakula bua dikenga dinene ditshilualua diafika ku nkomenu wadi ku mvita ya Armagedon. (Buakabuluibua 7:14; 16:16) Ebi nebikale dilumbuluisha dia Nzambi pa ndongoluelu eu wa malu munyanguke ne bamunyangi bende. Nekuikale bantu bashala ne muoyo anyi? Eyowa! Nebikale aba badi baleja, ki nditshina dia Nzambi dibi, dia lufu, kadi dimutshina dia kanemu kuondoke. Nebapandishibue.​—Nsumuinu 2:21, 22.

Dileja bukole didi dikemesha

7. Bua tshinyi Nzambi wakaluila Izalele mu matuku a Mozese?

⁷ Muanda eu wa dikema kudi Yehowa Nzambi wakadianjila kulejibua ku tshienzedi kampanda tshia bukole tshiakenzelaye bamutendeledi bende kukadi bidimu bu 1 500 kumpala kua Bikondo Bietu. Ditunga dia tshiluilu tshikole dia Ejipitu divua dikuate ku bupika bua dienzeja benyi baadi bena Izalele mudimu mukole, kutetadi too ne mushindu kampanda wa dibutula [bena Izalele] pakatuma mfumu wadi, Faraone, dîyi bua kushipa bana ba tutoto buonso bena Izalele ba balume bavua baledibua. Ditshimuna dia Nzambi pa Ejipitu divua ne bua kupetesha dipikudibua dia Izalele ku ndongoluelu au wa malu a tshididi mukengeshanganyi, eyowa, budikadidi ku ditunga dinyanga ne ntendelelu wa nzambi mivule.

8, 9. Mmunyi muakandamuna Mozese ne bena Izalele ku tshienzedi tshia diluila tshia Nzambi?

⁸ Ekesode nshapita wa 15 udi ulonda ngandamuinu wa Izalele ku dipikudibua mu Ejipitu. Dikonkonona muyuki eu nedituambuluishe bua kuanyisha mushindu udi bena nkristo mua kupikudibua ku ndongoluelu eu wa mpindieu udi munyanguke mu nyuma ne ku mubidi. Tuanji kutangila Ekesode nshapita wa 15, pa kushindamija ntema yetu pa imue mvese misungula bua kujingulula bua tshinyi tudi ne bua kusungula bua kutshina Yehowa, Nzambi mulelela. Tudi tutuadija ne mvese 1 ne 2:

⁹ ‘Mozese ne Bena Izalele bakimbila Yehowa musambu eu, bakamba ne, Nengimbile Yehowa musambu, bualu bua yeye wakatamba bukole ne butumbi buende. Yeye wakela kabalu ne muntu uvua wenda pa nyima paku mu bunene bua mai manene. Yehowa udi bukole buanyi ne musambu wanyi; yeye walu lupandu luanyi.’

10. Ntshinyi tshiakafikisha ku kabutu ka kudi Nzambi pa tshiluilu tshia Ejipitu?

¹⁰ Bantu pa buloba mbamanye muyuki eu bimpe pa mushindu uvua Yehowa mupikule Izalele mu Ejipitu. Wakavuija bipupu pa bukokeshi bukole abu bua buloba bujima too ne pakafika ndekelu wa bionso Faraone ku dilekela bena Izalele bua kuyabu. Kadi pashishe biluilu bia Faraone biakatua tshisamba etshi tshikena tshiluilu munyima ne biakamona se: nebibakuate mu buteyi ku muelelu wa Mbuu Mukunze. Nansha muakamuenekabi se: bana ba Izalele bavua mua kujimija ne lukasa luonso budikadidi buabu butshivuabu bafuma ku dipeta, Yehowa uvua ne bualu bukuabu mu tshieledi tshiende tshia lungenyi. Wakunzulula mu tshishima njila munkatshi mua mbuu ne kukuba tshisamba tshiende. Pakalonda bena Ejipitu, wakabuikidija Mbuu Mukunze pa mutu pabu ne kushipa mu mâyi Faraone ne makole ende a basalayi.​—Ekesode 14:1-31.

11. Tshienzedi tshia Nzambi pa Ejipitu tshiakapatula bipeta kayi?

¹¹ Dibutudibua dia makole a basalayi a bena Ejipitu kudi Yehowa diakamuzangamika ku mêsu kua bamutendeledi bende ne diakalabajija kumanyika kua dîna diende. (Yoshua 2:9, 10; 4:23, 24) Eyowa, dîna diende diakatumbuka kupita nzambi ikena bukole, ya mashimi ya Ejipitu, eyi yakapanga bua kusungila batendeledi bayi. Dieyemena mu nzambi yabu ne mu muntu ufuafua ne mu bukole bua masalayi diakafikisha ku tshipeta tshibi tshia dibungama. (Musambu wa 146:3) Kabiena bikemesha muakasakibua bena Izalele bua kuimba misambu yakaleja ditshina diakane dia Nzambi udi ne muoyo, wakasungila ne bukole buonso tshisamba tshiende!

12, 13. Ntshinyi tshitudi ne bua kulongela ku ditshimuna dia Nzambi ku Mbuu Mukunze?

¹² Bia muomumue, tudi ne bua kumanya se: nzambi ya dishima ya mu tshikondo tshietu etshi ne makokeshi makole, nansha aa adi ne bia-lufu bia nikleere, kabiena mua kuakanangana ne Yehowa. Mmukumbane kusungila ne neasungile tshisamba tshiende. ‘Yeye utu wenza mudiye musue munkatshi mua misumba ya ba mu diulu ne munkatshi mua ba pa buloba; kakuena muntu udi mua kukanda tshianza tshiende, anyi kumuebeja ne, Udi wenza tshinyi?’ (Danyele 4:35) Patudi tujingulula ngumvuilu wa mêyi aa, tudi petu tusakibua bua kuimba ne disanka misambu ya dimusamuna nayi.

¹³ Musambu wa ditshimuna ku Mbuu Mukunze udi utungunuka ne: ‘Yehowa udi muena mvita; Yehowa ndîna diende.’ Nunku, Muena mvita eu kayi butshimunyi kêna tshintu kampanda tshikena tshimanyike tshia ku difuikakaja dia muntu. Udi ne dîna! Udi ‘Eu udi uvuija,’ Muenji Munene, Eu [udi] ‘muidika dîna dia Yehowa, . . . Mutambe Bunene wa pa mutu pa buloba bujima.’ (Ekesode 3:14; 15:3-5; Musambu wa 83:18) Kuenaku witaba se: bivua mua kuikala bia meji bua bena Ejipitu ba kale abu kuikalabu ne mmuenenu mutshintshikidi ne wa kanemu wa ditshina dia Wa-Bukole-Buonso pamutu pa kumuyobola anyi?

14. Mmunyi muakalejibua mushinga wa ditshina Nzambi ku Mbuu Mukunze?

¹⁴ Bu mudiye Mufumbi wa buloba, Muenji wa mbuu mmukumbane tshishiki bua kukontolola mâyi wonso. (Ekesode 15:8) Pa kutumika kabidi ne bukokeshi buende pa lupepele, wakenza tshivua tshimueneka bu tshidi katshiyi mua kuenzeka. Wakapandulula mâyi aa mu buondoke buawu pa muaba kampanda ne kuasakila eku ne kuaka bua kupatula njila muenza ne bimanu bia mâyi bua bantu bende kupitabu muaba eu. Anji kufuanyikija dibandila muanda eu: miliyo ne miliyo ya tone ya mâyi a mbuu mimanakane tende bu bimanu bitumbuke bikena bituangana, biunzulula njila wa kunyemena wa bukubi bua Izalele. Eyowa, aba bakaleja ditshina diakane dia Nzambi bakapeta dikubibua. Pashishe Yehowa wakalekelela mâyi, pa kuavuija a bungi diakamue bu mvula wa kabutu mukole, pa kuinyisha makole a Faraone ne bintu biabu bia mvita. Ndileja kayipu dia bukole bua Nzambi pa ba-nzambi ba tshianana ne pa bukole bua masalayi a bantu! Bushuwa, Yehowa ke utudi ne bua kutshina, ki mmuomu anyi?​—Ekesode 14:21, 22, 28; 15:8.

Tuleje ditshina dietu dia Nzambi

15. Nngandamuinu kayi utudi ne bua kuikala nende ku bienzedi bia bukole bia dipandisha bia Nzambi?

¹⁵ Bu tuetu mua kukubibua pamue ne Mozese, bushuwa tuvua mua kusakibua bua kuimba ne: “Nganyi udi bu wewe Yehowa, munkatshi mua nzambi mikuabo? Nganyi udi bu wewe, udi ne butumbi bua tshijila, udi utshinyisha bantu ne bienzedi bia butumbi, udi wenza malu a kukema?” (Ekesode 15:11) Nyanji ya mushindu’eu mmiambulula mu kupita kua siekele mivule kutuadija tshikondo atshi. Mu mukanda wa ndekelu wa mu Bible, mupostolo Yone udi ufila diumvuija pa tshisumbu kampanda tshia basadidi ba lulamatu bela manyi ba Nzambi ne: “Badi bimba musambu wa Mozese mupika wa Nzambi ne musambu wa Muan’a mukoko.” Mmusambu kayi munene eu? “Midimu yebe idi minene ne ya dikema, Yehowa Nzambi, Wa-Bukole-Buonso. Njila yebe idi miakane ne milelela, Mukalenge wa tshiendelele. Nenku, nnganyi wabenga kukutshina bushuwa, Yehowa, ne wapanga kutumbisha dîna diebe, bualu, wewe nkayebe udi mulamatshi wa mikenji?”​—Buakabuluibua 15:2-4, NW.

16, 17. Mmalu kayi a mpatshi atudi tumona enzeka matuku aa?

¹⁶ Nunku lelu’eu kabidi kudi batendeledi bapikudibue badi banyisha kabiyi anu midimu ya bufuki ya ku bianza bia Nzambi apu kabidi ne mikenji yende. Bantu ba mu matunga wonso mbapikudibue, mbabuludibue mu nyuma ku bulongolodi ebu bunyanguke bualu badi banyisha ne batumikila mikenji miakane ya Nzambi. Ku tshidimu tshionso, bantu binunu nkama badi banyema bulongolodi ebu bunyanguke bua kubuela mu bulongolodi bukezuke, bua buakane buenza ne batendeledi ba Yehowa. Mu katupa kîpi emu, pikala malumbuluisha a kabutu a Nzambi pa ntendelelu ya dishima ne bishadile bia ndongoluelu eu mubi makumbajibue, nebikale ne muoyo bua kashidi mu bulongolodi bupiabupia buakane.

¹⁷ Mu diumvuangana ne Buakabuluibua 14:6, 7, bukua-bantu budi mpindieu bumvua mukenji wa didimuija wa dilumbuluisha udibu bamanyisha kudi Bantemu ba Yehowa ku bulombodi bua banjelu. Mu matunga mapite pa 230 tshidimu tshishale, Bantemu batue ku miliyo itanu bavua bamanyishe lumu luimpe lua Bukalenge bua Nzambi ne dîba diende dia dilumbuluisha. Bua kulongesha bantu nabu bua lupandu, Bantemu bavua benze makumbula a ku musangu ku musangu kumbelu ya bantu, pa kulombola malonga a Bible kaayi difutu. Bantu binunu nkama ku tshidimu tshionso badi nunku balonga bivule bua kutshina Nzambi mulelela ne meji, balambula mioyo yabu kudiye, ne batambushibua. Mmushindu kayipu udibi bisankisha bu mudi bantu ba mushindu’eu bafike ku ditshina Nzambi mulelela!​—Luka 1:49-51; Bienzedi 9:31; fuanyikija ne Ebelu 11:7.

18. Ntshinyi tshidi tshileja se: banjelu badi batuambuluisha mu buambi buetu?

¹⁸ Bidi bilelela se: banjelu badi ne dikuatshisha mu mudimu eu wa bumanyishi anyi? Eyo, bidi bushuwa bimueneka patoke se: buludiki bua banjelu butu misangu mivule bufikisha Bantemu ba Yehowa ku nzubu kampanda kuvua anyima kansanga mu dikengakana uvua ujinga bikole, ne nansha usambila mene, bua kupeta diambuluisha dia mu nyuma! Tshilejilu, Bantemu ba Yehowa babidi bavua ne muana mukese wa balume bavua bamba lumu luimpe mu tshidiila kampanda tshia Caraïbes. Bu mukavuabi dia mujalamu, bakulumpe babidi aba bakapangadika bua kuimanyika buambi bua dituku adi. Kadi muana uvua amu ne dijinga dikena dia pa tshibidilu dia kukumbula nzubu uvua ulonda. Pakamonaye ne: bakulumpe kabavua basua kuenza nunku dîba adi, wakaya nkayende ne kukokola ku tshiibi. Nsongakaji kampanda e kunzulula tshiibi. Pakamona bakulumpe nunku, bakasemena ne kuakula ne nsongakaji eu. Wakabakidila mu nzubu, pa kubumvuija ne: amu dîba diakumvuaye bakokola ku tshiibi, uvua ufuma ku disambila bua Nzambi amutumine Bantemu bua bamulongeshe Bible. Bakumvuangana amu apu bua dilonga dia Bible.

19. Ntshinyi tshitudi mua kufunkuna bu tshipeta tshia ku ditshina Nzambi?

¹⁹ Bu mutudi tumanyisha ne lulamatu luonso mukenji wa dilumbuluisha wa Nzambi, tudi kabidi tulongesha mêyi ende makane. Padi bantu baatumikila mu nsombelu yabu, kudi kupeteka mabenesha a ku mubidi ne a mu nyuma. Tshilejilu, Bible mmuleje patoke dipiishibua dia tshiendenda tshionso tshia masandi. (Lomo 1:26, 27, 32) Lelu’eu mêyi-makulu a Nzambi kaena atamba kuangatshibua ne mushinga pa buloba bujima. Ntshipeta kayi tshidiku? Mabaka adi enda ashipibua. Dibunda bibawu didi dienda didiunda. Masama adi atekesha mubidi adi asambulukilangana ku bitupa bia lulelu, adi malue tshiambu tshikole mu siekele eu wa 20, adi enda atangalaka. Bushuwa, disama dia SIDA didi dikuatshisha buôwa didi ditamba kuambulukila bantu ku tshiendenda. Kadi ditshina dia kanemu dia Nzambi kadiena bukubi bunene bua batendeledi balelela anyi?​—2 Kolinto 7:1; Filipoi 2:12; tangila kabidi Bienzedi 15:28, 29.

Bipeta bidi bifuma ku ditshina Nzambi mpindieu

20. Ntshinyi tshidi tshileja se: bantu bakuabu mbamanye nsombelu wa tshitembu wa Bantemu ba Yehowa?

²⁰ Mabenesha mmabodiame bua aba badi batshina Nzambi ne balonda mêyi ende. Tangila bualu kampanda buenzeke budi buleja dianyisha didi dienda amu divula dia se: Bantemu ba Yehowa mbenze buena muntu bua ditalala bua bena nkristo bakane mu malu a nsombelu wa tshitembu. Bungi kampanda bua Bantemu, bakaya mu mpuilu wa bukua-matunga mu Amerike wa ku Sud, bavua ku nzubu wa tshilala-benyi kampanda kuvuabu bakidile kabidi butuku bumue abu bena tshisangilu tshikena tshia Bantemu bavua ne bua kuyukila ne mfumu wa ditunga. Kasumbu ka mudimu wa bukubi kavua kabueja mfumu wa ditunga lukasa lukasa mu tshibandilu tshia nzembu, pakabuelamu Ntemu umue kayi mumanye uvuabu babandisha nunku mu tshibandilu tshia nzembu, ne bantu bena mudimu wa bukubi bakakema! Pa kujingulula tshivuaye muenze, Ntemu eu wakalomba luse bua dibuela diende. Wakaleja kamanyinu kende kalamika pa tshiadi kavua kamusunguluja bu Ntemu ne kuambaye ne: kavua njiwu bua mfumu wa ditunga. Ne mimuemue, muena mudimu wa bukubi umue wakamba ne: “Bu bantu buonso bikale bu Bantemu ba Yehowa, katuvua mua kukengela mudimu wa bukubi wa mushindu’eu.”​—Yeshaya 2:2-4.

21. Nnjila kayi ya kulonda idi miunzuluila bantu lelu’eu?

²¹ Bantu ba mushindu’eu ke badi Yehowa usangisha mpindieu ne ulongolola bua ‘kupitabu ku dikenga dinene’ diatuisha ndongoluelu eu ku ndekelu. (Buakabuluibua 7:9, 10, 14) Lupandu lua mushindu’eu kaluakuikala muanda wa ku mpukapuka. Bua kuikala mupanduki, muntu udi ne bua kutshina Yehowa, kumuanyisha bu Mukalenge muakane udi ku mutu kua bionso, ne kuditshipa kudiye. Kadi, bualu budiku mbua se: bavule kabakudima ditshina didi diakanyine bukubi. (Musambu 2:1-6) Bilondeshile bijadiki bionso bidiku, Mukokeshi musungula wa Yehowa, Yezu Kristo, mmutuadije kukokesha bu Mukalenge kutuadija mu tshidimu tshikole tshia 1914. Ebi bidi biumvuija ne: tshikondo tshidi tshishale tshidi tshinyema ne lukasa, bikengela bua bantu kulubuluja ne kuleja ditshina diakane dia Yehowa. Nansha nanku, Mutufuki udi upetesha bantu, nansha aba badi ne mianzu minene, mushindu wa kuandamuna: ‘Nunku, nuenu bakalenge, nuikale ne meji; nuyishibue, nuenu bakokeshi ba pa buloba. Nukuatshile Yehowa mudimu ne ditshina, nusanke nende ne nuzakale diatshimue. Nutuangane mishiku ne muana wende wa balume, bua yeye kikadi ne tshiji, ne bua nuenu kanujiminyi mu njila. Bualu bua tshiji tshiende tshidi tshitemeshibua lukasa. Disanka didi kudi bonso badi bamueyemena!’​—Musambu 2:7-12.

22. Matuku atshilualua neatuadile aba badi batshina Nzambi mpindieu tshinyi?

²² Suayi tuikale munkatshi mua aba basamuna Mufuki wetu bu Eu wakatupikula. Nunku, ebi bidi bitulomba bua kutshina Nzambi mulelela mpindieu! (Fuanyikija ne Musambu 2:11; Ebelu 12:28; 1 Petelo 1:17.) Tudi ne bua kutungunuka ne kulonga mêyi ende makane ne kuatumikila. Musambu wa Mozese ne wa Muan’a mukoko, mufunda mu Buakabuluibua 15:3, 4 (NW), neubandishibue menemene tshikondo tshidi Yehowa umbusha bubi buonso pa buloba ne utuadija kuondapa muntu ne buloba, tshisombedi tshiende, ku buenzeji bunyangi bua mpekatu. Pashishe, ne mutshima wetu mujima, netuimbe ne: “Midimu yebe idi minene ne ya dikema, Yehowa Nzambi, Wa-Bukole-Buonso. Njila yebe idi miakane ne milelela, Mukalenge wa tshiendelele. Nenku, nnganyi wabenga kukutshina bushuwa, Yehowa, ne wapanga kutumbisha dîna diebe?”

Utshidi muvuluke anyi?

◻ Bua tshinyi Yehowa mmuakanyine ditshina dietu diakane?

◻ Ntshinyi tshiakalejibua patoke kudi bienzedi bia Nzambi ku Mbuu Mukunze?

◻ Mbipeta kayi bimpe bidi bifumina ku ditshina dietu dia kanemu dia Yehowa?

◻ Aba badi batshina Nzambi mulelela mpindieu badi ne ditekemena kayi bua matuku atshilualua?