MUA KUBANGA KUYUKILA NE MUNTU
DILONGESHA 2
Diakula bu pa tshibidilu
Dîyi dia kulonda: “Dîyi diamba mu tshikondo tshiakane ndimpe be!”—Nsu. 15:23.
Tshivua Filipo muenze
1. Tangila FILME, anyi bala Bienzedi 8:30, 31. Pashishe welangane meji a nkonko idi ilonda eyi:
Mmunyi muvua Filipo mubangishe muyuki?
Bua tshinyi ngakuilu wende au uvua mukumbane bua kubanga nende muyuki ne kulongesha muntu au malu makuabu?
Dilongesha
2. Tuetu tudienzeja bua kuakula ne muntu mututu tuakula pa tshibidilu, pamuapa neakule mudilekelele, yeye kuitaba bua kuyikila netu.
Idikija Filipo
3. Ikala utangila ne lubatshi. Tshilunji tshiende tshia mpala ne jeste yende bidi mua kukuambila malu a bungi. Muntu udi umueneka ne: mmusue kuyukila nebe anyi? Bua kutuadija kuakula nende bualu bua mu Bible udi mua kumuebeja nansha ne: “Udi mumanye ne: . . ?” Kuenzeji muntu udi kayi musue anu bua ne: nuyikile nende to.
4. Ikala ne lutulu. Kuedi meji ne: udi muenzejibue bua kuambila muntu bualu bua mu Bible diakamue anu panudi nubanga nende muyuki to. Indila tshikondo tshimpe tshidi bualu abu mua kubuela mu tshialu anu mutubi bienzeka patu bantu bayukila pa tshibidilu. Misangu mikuabu, bidi mua kulomba bua windile too ne panuayukila nende musangu walonda.
5. Yisha muntu bilondeshile muudi mumusangane. Muntu udi mua kutuadija kuakula bualu buuvua kuyi mutekemene to. Nanku itaba umuleje bualu kampanda bua mu Bible budi bumvuangana ne tshidiye wamba atshi nansha buobu bushilangane ne buuvua mulongolole bua kumuambila.