Nshapita wa 15

“Nnganyi udi muakanyine bua kuvungula muvungu?”

1. Mmianda kayi idi Yone umona mpindieu mu tshikena-kumona?

TSHILENGA TSHIPUE! TSHIA KUKEMA! Ngikadilu eyi mmikumbanyine bimpe tshikena-kumona tshia dikema tshia nkuasa wa bumfumu wa Yehowa munkatshi mua miendu ya kapia, mua bakeluba, mua bakulu 24 ne mua mbuu wa lumuenu. Kadi Yone, ntshinyi tshiudi umona pashishe? Yone udi ujalamija mêsu munkatshi mua muanda eu wa mu diulu, pashishe utuambila ne: “Ne meme kumona mu tshianza tshia balume tshia Eu udi musombe pa nkuasa wa bumfumu, muvungu mufunda munda ne pa nyima, mutua bikangilu muanda-mutekete. Ne meme kumona muanjelu kampanda wa-bukole umanyisha ne dîyi dikole ne: ‘Nnganyi udi muakanyine bua kuvungula muvungu ne kulamuna bikangilu biawu?’ Kadi, muntu nansha umue, mu diulu nansha pa buloba anyi muinshi mua buloba, kavua mua kuvungula muvungu peshi kutangila munda muawu. Ne mvua ndila bikole bualu muntu nansha umue kavua musanganyibue muakanyine bua kuvungula muvungu ne kutangila munda muawu.”​—Buakabuluibua 5:1-4.

2, 3. (a) Bua tshinyi Yone udi utamba kujinga bua se: muntu kampanda apetshibue bua kuvungula muvungu, kadi, mbipepele bua kupeta eu udi ukengedibua anyi? (b) Mu tshikondo tshietu etshi, ntshinyi tshivua basadidi ba Nzambi bela manyi a spiritu bindile ne muoyo kulu-kulu?

² Yehowa nkayende, Mukalenge Mutambe bunene wa bifukibua bionso, ke udi wolola tshianza bua kufila muvungu eu. Muine eu udi ne bua kuikala muwule tente ne mamanyisha a mushinga mukole, bualu mmufunda munda ne pa nyima. Ke tshidi tshitabuluja dijinga dietu dia kumanya bidimu. Mmalu kayi adi mu muvungu eu? Tutshidi bavuluke dibikila edi divua Yehowa mutumine Yone ne: “Banda kuneku, nenkuleje malu adi ne bua kuenzeka.” (Buakabuluibua 4:1) Nenku, tudi bindile ne muoyo kulu-kulu tshikondo tshituavua kumanya malu aa wonso. Kadi, bakuetu, muvungu mmujingila bimpe ne mutua bikangilu muanda-mutekete!

³ Muanjelu wa bukole neapete muntu udi muakanyine bua kuvungula muvungu anyi? Bilondeshile nkudimuinu kampanda (Kingdom Interlinear), muvungu udi “pa tshianza tshia balume” tshia Yehowa. Mêyi aa adi asua kumvuija ne: Yehowa udi uwufila muteka mu tshianza tshiende tshiolola. Kadi mbimueneke se: muntu nansha umue, mu diulu nansha pa buloba, ki mmuakanyine bua kuangata muvungu eu ne kuwuvungula. Nansha muinshi mua buloba mene, munkatshi mua basadidi ba Nzambi ba lulamatu bakadi bafue, kakuena muntu kampanda udi ukumbaja malu malomba bua kupeta lumu elu lunene. Kabiena bikemesha bua muvua Yone mupampakane bikole! Imue misangu, kakupeta mushindu wa kumanya “malu adi ne bua kuenzeka.” Mu matuku etu aa kabidi, basadidi ba Nzambi bela manyi a spiritu bavua bindile ne muoyo kulu-kulu bua Yehowa kutumaye butoke buende ne bulelela buende pa mukanda wa Buakabuluibua. Wakangata dipangadika dia kuenza nenku ku kakese ku kakese ne mu tshikondo tshijadika bua dikumbana dia mulayi eu, bua kulombola tshisamba tshiende mu njila wa “lupandu lulenga.”​—Musambu wa 43:3, 5.

Eu udi muakanyine

4. (a) Nnganyi wavu kumanyika bu udi muakanyine mua kuvungula muvungu ne kulamuna bikangilu biawu? (b) Ndifutu kayi ne ndisanka kayi bidi nabi bena mu kasumbu ka Yone ne bena nkristo nabo?

⁴ Eyowa, muntu kampanda mmuakanyine bimpe bitambe bua kuvungula muvungu. Yone udi wamba ne: “Kadi, umue wa ku bakulu e kungambila ne: ‘Lekela kudila. Mona, Ntambue wa mu tshisa tshia Yuda, muji wa Davidi, watshimunyi mushindu wa kuvungulaye muvungu ne bikangilu biawu muanda-mutekete.’” (Buakabuluibua 5:5) Nanku, wewe Yone kamishaku binsonji biebe! Mu matuku etu aa, kasumbu ka Yone ne bena mudimu naku ba lulamatu mbananukile pabu mu matetshibua makole munkatshi mua makumi a bidimu, eku bindila ne muoyo kulu-kulu bua kupeta mumvuija mapiamapia peshi butoke pa Buakabuluibua. Ndifutu kayipu didi ditupesha mpindieu bua kujingulula tshikena-kumona etshi, ne ndisanka kayipu didi ditupetesha bua kudifila ku dikumbana diatshi pa kumanyisha mukenji udi munda muatshi!

5. (a) Mmulayi kayi uvua muenzela Yuda, ne mmuaba kayi uvua ndelanganyi ya Yuda ikokeshila? (b) Shiloh nnganyi?

⁵ Akia, “ntambue wa mu tshisa tshia Yuda”! Yone mmumanye bimpe mulayi uvua Yakoba, nkambua wa tshisa tshia Yuda, muambe pa bidi bitangila muanende wa balume muinayi, Yuda, ne: “Yuda, mmuana wa nyama wa ntambue! Ku nyama mushipa, muananyi, neubande bushuwa. Wakakobama, wakadiolola bu nyama wa ntambue, ne bu nyama wa ntambue, nnganyi udi uteta mua kumubisha? Dikombo kadiakumuka kudi Yuda nansha, anyi tshibonge tshia bumfumu munkatshi mua makasa ende, too ne palua Shiloh; ne kudiye ke kuikala butumike bua bisamba.” (Genese 49:9, 10) Mulongolongo wa bakalenge ba tshisamba tshia Nzambi bavua baledibue mu tshisa tshia Yuda. Biangatshile kudi Davidi, bakalenge buonso bakakokesha ku Yeruzaleme too ne ku dibutudibua dia tshimenga etshi kudi bena Babilone, bavua ndelanganyi ya Yuda. Kadi, nansha umue wa kudibo kavua mudisunguluje bu Shiloh uvua Yakoba mumanyishe. Shiloh udi umvuija: “Eu udi [ne bukenji].” Mu mulayi, dîna edi divua difunkuna Yezu, eu udi mupiane mpindieu bukalenge bua Davidi bua kashidi.​—Yehezekele 21:25-27; Luka 1:32, 33; Buakabuluibua 19:16.

6. Mmu ngumvuilu kayi muvua Yezu muikale “lutonga lukese” lua Jessé ne “muji wa Davidi”?

⁶ Diakamue, Yone udi usunguluja eu udibo bafunkune ku miaku eyi: “muji wa Davidi.” Mu mulayi, Masiya mulaya udi ubikidibua ne: “lutonga lukese lua ku tshikuuku tshia Jessé [tatuende wa mukalenge Davidi] . . . katamba,” kabidi ne: “muji wa Jessé, wajuka bu tshimanyinu bua bisamba.” (Yeshayi 11:1, 10) Bu muvuaye muledibue mu dîku dia bukalenge bua Davidi, muana wa Jessé, Yezu uvua lutonga lukese lua Jessé. Kabidi, bu muvuaye muji wa Jessé, Yeye ke wakatolokesha tshiakabidi bukalenge bua ndelanganyi ya Davidi, pa kubufululula ne pa kubutua nyama ku mikolo bua kashidi.​—2 Samuele 7:16.

7. Bua tshinyi Yezu mmuakanyine bua kuangata muvungu mu tshianza tshia Eu udi musombe mu nkuasa wa bumfumu?

⁷ Kupita muntu kayi yonso, muntu mupuangane Yezu wakasadila Yehowa pa kudileja muena muoyo mutoke nansha muvuaku matetshibua makole. Wakafila diandamuna dijima ku diyobola dia Satana. (Nsumuinu 27:11) Butuku bua muladilu wa lufu luende lua mulambu, wakamba ne: “Ngatshimunyi bena mu bulongolodi ebu.” (Yone 16:33) Ke bua tshinyi, kunyima kua yeye mumane kumubiisha ku lufu, Yehowa wakamupesha “bukokeshi buonso . . . mu diulu ne pa buloba.” Ku basadidi buonso ba Nzambi, Yezu nkayende ke udi muakanyine bua kuangata muvungu bua kumanyisha mukenji wa mushinga mukole mutambe udimu.​—Matayi 28:18.

8. (a) Mmalu kayi adi atangila Bukalenge adi aleja ne: Yezu mmuakanyine bua kuvungula muvungu? (b) Bua tshinyi mbikumbanyine bua umue wa ku bakulu 24 kusokoluela Yone muntu udi muakanyine bua kuvungula muvungu?

⁸ Mbiakanyine menemene bua Yezu kuikala eu udi uvungula muvungu. Kubangila ku 1914, ukadi mubanjija mu muanzu wende wa Mukalenge wa Bukalenge bua Masiya bua Nzambi; pabi, muvungu eu udi usokolola malu mavule pa Bukalenge ne makuabu akumbajabu. Yezu wakafila ne lulamatu bumanyishi pa bulelela budi butangila Bukalenge patshivuaye ne muoyo pa buloba. (Yone 18:36, 37) Wakalongesha balongi bende mua kusambila bua dilua dia Bukalenge ebu. (Matayi 6:9, 10) Ku ntuadijilu wa tshikondo tshia buena-nkristo, wakabanjija dimanyisha dia lumu luimpe lua Bukalenge ne wakamanyisha ne: mudimu eu neutambe kumuangalaka mu tshikondo tshia ku nshikidilu. (Matayi 4:23; Mako 13:10) Mbiakanyine kabidi bua umue wa ku bakulu 24 kusokoluelaye Yone ne: Yezu ke walamuna bikangilu. Mbua kabingila kayi? Bualu bakulu aba, mbasombe pa nkuasa ya bumfumu ne mbase bifulu bia butumbi ku mutu, mbapianyi pamue ne Kristo mu Bukalenge buende.​—Lomo 8:17; Buakabuluibua 4:4.

‘Muan’a mukoko wakakoshibua muminu’

9. Pamutu pa ntambue, nnyama kayi udi Yone umona muimane “munkatshi mua nkuasa wa bumfumu,” ne ndiumvuija kayi didiye ufila bua muine nyama eu?

⁹ Yone udi ukeba ne mêsu “Ntambue eu wa mu tshisa tshia Yuda.” Kadi, mbualu kayipu bua dikema! Tshifuanyikijilu tshishilangane ke tshidi tshimueneka: “Ne meme kumona munkatshi mua nkuasa wa bumfumu ne mua bifukibua binayi bidi ne muoyo ne mua bakulu, muan’a mukoko muimane bu mukosa muminu, muikale ne nsengu muanda-mutekete ne mêsu muanda-mutekete, mêsu mine adi aleja spiritu muanda-mutekete ya Nzambi ivua mitumibue pa buloba bujima.”​—Buakabuluibua 5:6.

10. Nnganyi udi “muan’a mukoko” mumona kudi Yone, ne bua tshinyi tshimfuanyi etshi ntshikumbanyine?

¹⁰ Munkatshi menemene, pabuipi ne nkuasa wa bumfumu, munkatshi mua bijengu bienza kudi bifukibua binayi bidi ne muoyo ne bakulu 24, mudi muan’a mukoko! Diakamue, kabiyi mpata, Yone udi usunguluja muan’a mukoko eu bu “Ntambue wa mu tshisa tshia Yuda” ne “muji wa Davidi.” Mmumanye bimpe ne: bidimu 60 kumpala, Yone mubatiji uvua muleje Yezu kudi bena Yuda bavuapu bu “muan’a mukoko wa Nzambi udi ujimija mpekatu ya bukua-bantu.” (Yone 1:29) Mu matuku wonso a muoyo wende pa buloba, Yezu kavua mudinyangishe kudi bena mu bulongolodi ebu nansha​—wakashala bu muan’a mukoko udi kayi ne katoba—​bua kufilaye muoyo wende ukena-kubanda mu bubi bu mulambu bua bukua-bantu.​—1 Kolinto 5:7; Ebelu 7:26.

11. Bua tshinyi kuleja Yezu mutumbisha bu “muan’a mukoko, mukosa muminu” ki ndipanga kanemu kudiye?

¹¹ Kadi, ki nkupuekesha Yezu mushinga, yeye ukadi mutumbisha mpindieu, peshi ki nkupanga kumupa kanemu pa kumuleja mufuane “muan’a mukoko muimane bu mukosa muminu” anyi? Kabiena nanku nansha. Lulamatu luvua Yezu muleje too ne ku lufu, luvua ndikuluka dia dikema bua Satana ne ditshimuna dia lumu bua Yehowa Nzambi. Tshifuanyikijilu etshi tshiangata bua kuleja Yezu tshidi tshiumvuija patoke ditshimuna diende pa bulongolodi bua Satana ne tshidi tshivuluija dinanga diondoke didi nadi Yehowa ne Yezu bua bukua-bantu. (Yone 3:16; 15:13; fuanyikija ne Kolosai 2:15.) Nenku, Yezu mmulejibue bu Dimiinu dilaya, muikale ne ngikadilu yonso milomba bua kuvungula muvungu.​—Genese 3:15.

12. Nsengu muanda-mutekete ya Muan’a mukoko ntshimfuanyi tshia tshinyi?

¹² Ntshinyi tshikuabu tshidi ne bua kuvudija kanemu ketu kudi “muan’a mukoko” eu? Udi ne nsengu muanda-mutekete. Mu Bible, nsengu ntshimfuanyi tshia bukole anyi bukokeshi, ne tshishiferi muanda-mutekete tshidi tshileja tshiuwidi peshi bujima bua tshintu kampanda. (Fuanyikija ne 1 Samuele 2:1, 10; Misambu 112:9; 148:14.) Nanku, nsengu muanda-mutekete ya Muan’a mukoko idi ileja tshiuwidi peshi bujima bua bumfumu budi Yehowa mupeshe Yezu. Muine eu udi “ku mutu menemene kua mbulamatadi yonso, kua bukokeshi buonso, kua bukole buonso, kua bukalenge buonso, ne kua dîna dionso didi ditedibua, kabiyi anu mu bulongolodi ebu bua malu, kadi, ne mu ebu butshilualua kabidi.” (Efeso 1:20-23; 1 Petelo 3:22) Yezu mmutuadije nangananga kutumika ne bukokeshi buende, bukokeshi bua mbulamatadi, kubangila mu 1914, pakamubanjija Yehowa bu Mukalenge mu diulu.​—Musambu 2:6.

13. (a) Mêsu muanda-mutekete a Muan’a mukoko adi tshimfuanyi tshia tshinyi? (b) Ntshinyi tshidi Muan’a mukoko wenza mpindieu?

¹³ Kabidi, Yezu mmuwule tente ne spiritu munsantu; ke tshidi mêsu muanda-mutekete a Muan’a mukoko umvuija, adi “aleja spiritu muanda-mutekete ya Nzambi.” Ku butuangaji bua Yezu, Yehowa udi umuangalaja bukole buende buenzeji mu tshiuwidi tshiabu pa basadidi bende ba pa buloba. (Tito 3:6) Mbimueneka se: ku diambuluisha dia muine spiritu eu ke kudi, biangatshile mu diulu, Yezu umona malu wonso adi enzeka panshi pa buloba apa. Anu bu Tatuende, udi ne busunguluji bupuangane. Kakuena tshintu nansha tshimue tshidiye upanga kumanya. (Fuanyikija ne Musambu wa 11:4; Zekayi 4:10.) Kabiyi mpata, Muana eu​—muntu wa muoyo mutoke wakatshimuna bena mu bulongolodi ebu; Ntambue wa mu tshisa tshia Yuda; muji wa Davidi; yeye wakalambula muoyo wende bua bukua-bantu; yeye udi ne bukokeshi bujima, ne spiritu munsantu mu tshiuwidi tshiende, ne busunguluji bupuangane bua kudi Yehowa Nzambi—​eyowa, Muana eu mmuakanyine menemene bua kuangata muvungu mu tshianza tshia Yehowa. Udiku mua kujanguluka bua kuitaba bukenji ebu munkatshi mua bulongolodi bua butumbi bua Yehowa anyi? Tòo! Kadi, “diakamue, e kuyaye kuwangata [muvungu] mu tshianza tshia balume tshia Eu udi musombe mu nkuasa wa bumfumu.” (Buakabuluibua 5:7) Ntshilejilu kayipu tshilenga tshia dikokela dia tshimpitshimpi!

Misambu ya kusamuna nayi

14. (a) Ntshinyi tshidibu benza kudi bifukibua binayi bidi ne muoyo ne bakulu 24 padi Yezu wangata muvungu? (b) Pa bidi bitangila bakulu 24, nku tshinyi kudi mamanyisha adibu bapeshe Yone aleja kudibu bafumine ne tshidibu?

¹⁴ Ntshinyi tshidibo benza kudi bakuabu badi pabo kumpala kua nkuasa wa bumfumu wa Yehowa? “Pakangataye muvungu, bifukibua binayi bidi ne muoyo ne bakulu makumi abidi ne banayi bakinamina kumpala kua Muan’a mukoko, yonso wa kudibo muikale ne lunzenze ne bibakudi bienza ne ngolo biuwule tente ne musenga wa kamonya, musenga wa kamonya udi uleja masambila a bansantu.” (Buakabuluibua 5:8) Anu bu bifukibua binayi bidi ne muoyo, bakeluba banayi, bidi bimane kumpala kua nkuasa wa bumfumu wa Nzambi, bakulu 24 badi binama kumpala kua Yezu, baleja dianyisha diabu bua bukokeshi buende. Kadi, anu bakulu aba nkayabu ke badi ne nzenze ne bibakudi bia musenga wa kamonya.a Anu buobo nkayabu kabidi ke badi bimba mpindieu musambu mupiamupia. (Buakabuluibua 5:9) Nenku, mbafuanangane ne bansantu 144 000 bena mu “Izalele wa Nzambi,” badi pabu ne nzenze ne biimba musambu mupiamupia. (Galatia 6:16; Kolosai 1:12; Buakabuluibua 7:3-8; 14:1-4) Kabidi, bakulu 24 mbaleja bu badi bakumbaja mudimu wa buakuidi mu diulu. Mudimu eu uvua mudianjila kuleja mu mundidimbi kudi mudimu wa bakuidi ba mu Izalele wa kale, bavua buosha musenga wa kamonya kumpala kua Yehowa mu ntenta wa ntendelelu​—mudimu eu wakajika pa buloba pakumbushabo Mikenji ya Mozese kudi Nzambi mu njila pa kuyipopela ku mutshi wa tshinyongopelu wa Yezu. (Kolosai 2:14) Abi bidi bitufikisha ku nkomenu kayi? Mvese eu udi umvuija mushindu udi batshimunyi bela manyi a spiritu benda bakumbaja mudimu wikalabu ne bua kubapesha, mudimu wa ‘bakuidi ba Nzambi ne ba Kristo, bakokesha nende munkatshi mua bidimu tshinunu.’​—Buakabuluibua 20:6.

15. (a) Mu Izalele, nnganyi uvua ne bukenji amu yeye nkayende bua kubuela mu Mutambe-Bunsantu wa ntenta wa ntendelelu? (b) Bua tshinyi bivua bia mushinga mukole bua muakuidi munene kuosha musenga wa kamonya pavuaye ubuela mu Mutambe-Bunsantu?

¹⁵ Mu Izalele wa kale, amu muakuidi munene ke uvua ubuela mu Mutambe-Bunsantu, kumpala kua Yehowa kua mu tshimfuanyi. Buende yeye, kuikala ne musenga wa kamonya mu tshikondo bu nunku kuvua kumvuija lufu anyi muoyo. Mukenji kampanda wa Yehowa udi wamba ne: “[Arona] udi ne bua kuangata bibakudi bia kapia biuwuja tente ne makala a kapia kakole pa tshilambuilu kumpala kua Yehowa, ne musenga menemene wa kamonya wa dipembu muwule tente mu bianza biende bibidi, ne udi ne bua kuya nabi dia muamua dia ridó. Nenku, neele kabidi musenga wa kamonya mu kapia kumpala kua Yehowa, ne divuba dia muishi wa musenga wa kamonya nedibuikile tshibuikidiji tshia Mushete, udi pa Tshimanyishilu, bua kafu biende.” (Lewitiki 16:12, 13) Kabiyi bua kuosha musenga wa kamonya, muakuidi munene kavua mua kubuela mu Mutambe-Bunsantu ne kushala ne muoyo.

16. (a) Mu bulongolodi bua bena nkristo, mbanganyi badi babuela mu Mutambe-Bunsantu wa mu tshimfuanyi? (b) Bua tshinyi bena nkristo bela manyi badi ne bua ‘kuosha musenga wa kamonya’?

¹⁶ Mu bulongolodi bua malu bua bena nkristo, ki ng’amu Muakuidi Munene uvuabu badianjile kuleja mu tshimfuanyi, Yezu Kristo, kadi, pamue ne yonso wa ku bakuidi bambuluishi 144 000 badi babuela pabo nende mu Mutambe-Bunsantu mudianjila kuleja mu tshimfuanyi, muine muaba udi Yehowa usanganyibua mu diulu. (Ebelu 10:19-23) Bakuidi aba, baleja apa kudi bakulu 24, kabena mua kubuela mu muaba eu Mutambe-Bunsantu, anu ‘bioshabu musenga wa kamonya,’ mbuena kuamba ne: pikalabu batungunuka ne kulambula masambila ne misengelelu kudi Yehowa.​—Ebelu 5:7; Yuda 20, 21; fuanyikija ne Musambu wa 141:2.

Musambu mupiamupia

17. (a) Mmusambu kayi mupiamupia udibu bimba kudi bakulu 24? (b) Mmu ngumvuilu kayi mudibu batumika pa tshibidilu ne miaku “musambu mupiamupia” mu Bible?

¹⁷ Mpindieu, tshiona tshia musambu mulenga tshidi tshiumvuika. Mmuimbila Muan’a mukoko bua butumbi buende kudi bakulu 24, bakuidi badi basangishibue kudiye: “Ne badi bimba musambu mupiamupia, bamba ne: ‘Udi muakanyine bua kuangata muvungu ne bua kulamuna bikangilu biawu, bualu, wakakoshibua muminu ne wakasumbila Nzambi bantu ba tshisa tshionso, muakulu wonso, tshisamba tshionso ne ditunga dionso ku mashi ebe.’” (Buakabuluibua 5:9) Miaku eyi “musambu mupiamupia” idi imueneka misangu mivule mu Bible. Pa tshibidilu, itu ifunkuna misambu ya kusamuna nayi mimbila Yehowa bua umue wa ku midimu yende ya bukole ya bupikudi. (Misambu 96:1; 98:1; 144:9) Nenku, musambu eu mmupiamupia, bualu, kangimba udi mpindieu mua kumanyisha midimu mipiamipia ya dikema ya Yehowa ne kuleja kakuabu kanemu kuondoke bua dîna Diende dia butumbi.

18. Mbua mabingila kayi budi bakulu 24 basamuna Yezu ne musambu mupiamupia?

¹⁸ Kadi, apa bakulu 24 badi bimba musambu mupiamupia kumpala kua Yezu apo ki nkumpala kua Yehowa nansha. Kadi, diumvuija ndia muomumue. Badi basamuna Yezu bua bintu bipiabipia bidiye muenze, yeye Muana wa Nzambi, bua diakalenga diabu. Ku mashi ende, wakalua mutuangaji wa tshiovo tshipiatshipia, nunku, e kukumbajaye tshivua tshikengedibua bua diledibua dia ditunga dipiadipia didi bumpianyi bua pa buabu bua Yehowa. (Lomo 2:28, 29; 1 Kolinto 11:25; Ebelu 7:18-25) Bena mu ditunga edi dipiadipia dia mu nyuma badi bafumina mu matunga mavule a pa buloba, kadi Yezu mmubasangishe mu tshisumbu tshimue bu ditunga dimu’epele.​—Yeshayi 26:2; 1 Petelo 2:9, 10.

19. (a) Bua dipanga diadi dia lulamatu, ndibenesha kayi diakadipangisha ditunga dia Izalele wa ku mubidi? (b) Ndibenesha kayi didi ditunga dipiadipia dia Yehowa dikumbane mua kupeta?

¹⁹ Pakasangisha Yehowa bena Izalele mu ditunga dimue mu matuku a Mozese, wakadia nabu tshiovo e kubalaya ne: nebavue bukalenge buende bua bakuidi biashalabu ne lulamatu ku tshiovo etshi. (Ekesode 19:5, 6) Kadi, bena Izalele kabakashala ne lulamatu nansha; nenku bakapangila bua dilaya edi kubakumbanyinadi. Kadi, ditunga dipiadipia diashila pa bishimikidi bia tshiovo tshipiatshipia, tshidi ne Yezu bu mutuangaji watshi, ndishale diodi ne lulamatu. Nanku, benamu badi mua kukokesha pa buloba ne kusadila bu bakuidi, pa kuambuluisha bantu bakane bua kupungabu ne Yehowa. (Kolosai 1:20) Ke tshidi musambu eu mupiamupia umvuija mu mêyi aa: “Ne wakabavuija bukalenge ne bakuidi bua Nzambi wetu, ne nebakokeshe pa buloba.” (Buakabuluibua 5:10) Ndisanka kayipu bua bakulu aba 24 bua kuimbila Yezu mutumbisha musambu eu mupiamupia wa dimusamuna nawu!

Musumba wa tungimba mu diulu

20. Mmusambu kayi wa kusamuna nawu udibu bimbila Muan’a mukoko mpindieu?

²⁰ Ntshinyi tshidibu benza kudi bakuabu bena mu bulongolodi bualabale bua mu diulu bua Yehowa padibu bumvua bimba musambu eu mupiamupia? Yone udi ukema bikole pa kubamona balonda ngenzelu wa muomumue ne muoyo mujima: “Meme kumona, ne kumvua dîyi dia banjelo bavule bavua banyunguluke nkuasa wa bumfumu ne bifukibua binayi bidi ne muoyo ne bakulu, ne bungi buabu buvua mbombo ne mbombo, binunu ne binunu, bamba ne dîyi dikole ne: ‘Muan’a mukoko uvua mukosa muminu mmuakanyine bua kupeta bukokeshi, bubanji, meji, bukole, lumu, butumbi ne dibenesha.’” (Buakabuluibua 5:11, 12) Mmusambu kayipu wa dikema wa kusamuna nawu!

21. Disamunyibua dia Muan’a mukoko didi diumvuija dinyenga bumfumu peshi muaba wa Yehowa anyi? Umvuija.

²¹ Abi bidi bisua kumvuija ne: bituadije ku mpindieu, Yezu mmuangate muaba wa Yehowa ne bifukibua bionso mbituadije kumusamuna yeye, pamutu pa Tatuende anyi? Kabiena nanku nansha! Musambu eu wa kusamuna nawu, kabiyi mpata, udi mu diumvuangana ne mêyi aa a mupostolo Paulo a ne: “Nzambi wakamuteka [Yezu] pa muaba mubandile, e kumupesha ku budisuile, dîna didi ku mutu kua dîna dikuabu kayi dionso, bua mu dîna dia Yezu, aba buonso badi mu diulu, badi pa buloba ne badi muinshi mua buloba batue binu panshi ne muakulu wonso witabe patoke se: Yezu Kristo udi Mukalenge bua butumbi bua Nzambi Tatu.” (Filipoi 2:9-11) Apa, mbatumbishe Yezu bua kuditeka kuende mu mulongo wa kumpala kua bifukibua bionso bua kujikija tshilumbu tshitambe bikuabu bunene​—dibingisha bumfumu buakane bua Yehowa. Bushuwa, mbutumbi kayipu budi ngenzelu wende mupeteshe Tatuende!

Didiunda dia musambu

22. Mêyi mafume pa buloba avua adisangisha ku tshiona tshia musambu kayi?

²² Mu muanda eu udi Yone mumvuije, bifukibua bia mu diulu bungi kabuyi kubala bidi bipunguluja misambu milenga ya disekelela nayi Yezu bua kuleja dianyisha diabi bua lulamatu luende ne bukokeshi buende mu diulu. Misambu eyi ya disekelela mmikolesha tshiona kudi mêyi adi afuma pa buloba, mêyi adi asamuna Tatu pamue ne Muana. Anu mudi nkomenu wa midimu mienza kudi muana wa muntu pa buloba mua kupetesha baledi bende lumu lunene, bia muomumue, mu bifukibua bionso, lulamatu lua Yezu ludi “bua butumbi bua Nzambi Tatu.” Ke bua tshinyi Yone udi utungunuka ne: “Ne bifukibua bionso bidi mu diulu, ne pa buloba, ne muinshi mua buloba, ne pa mbuu, ne bintu bionso bidimu, meme kubiumvua biamba ne: ‘Dibenesha, lumu, butumbi ne bukole bikale kudi Eu udi musombe mu nkuasa wa bumfumu ne kudi Muan’a mukoko kashidi ne kashidi.’”​—Buakabuluibua 5:13.

23, 24. (a) Mmunyi mutudi mua kumanya dîba divua musambu eu ne bua kutuadija mu diulu, ne divuawu ne bua kutuadija pa buloba? (b) Mmunyi mudi musambu eu wenda ukola tshiona mu kupita kua bidimu?

²³ Ndîba kayi divua musambu eu mulengele ne bua kuimbibua? Bakatuadija kuwimba ku ntuadijilu wa dituku dia Mukalenge. Kunyima kua Satana ne ba-demon bende bamane kuipatshibua mu diulu, “bifukibua bionso bidi mu diulu” biakimba diatshimue musambu eu wa kusamuna nawu. Kabidi, anu mudi mianda ibileja kubangila ku 1919, misumba ya bifukibua bia pa buloba mmisangishe payi mêyi ayi bua kusamuna Yehowa. Bungi buayi buakavula e kupita pa miliyo isambombo, ku ntuadijilu wa tshidimu tshia 2005.b Pabutudibua bulongolodi bua pa buloba bua Satana, “bifukibua bionso bidi . . . pa buloba” nebimbe misambu ya disamuna nayi Yehowa ne Muanende. Pakumbana tshikondo tshijadika kudi Yehowa, dibiishibua ku lufu dia miliyare ya bafue nedituadije, ne “bifukibua bionso bidi . . . muinshi mua buloba” ne bidi Nzambi mulame mu lungenyi bua kuvuluka nebipete pabi mushindu wa kusangisha abi mêyi ku musambu eu.

²⁴ ‘Biangatshile ku mfudilu wa buloba, wa mbuu ne wa bidiila,’ miliyo ya bantu bakadi bimba musambu mupiamupia pamue ne bulongolodi bua bukua-bifukibua bua Yehowa. (Yeshayi 42:10; Musambu wa 150:1-6) Misambu eyi ya disanka ya disamuna nayi neyitambe kukola ku ndekelu kua Mileniuma, pafikishibua bukua-bantu ku bupuangane. Pashishe, nyoka wa ku tshibangidilu, mudingianganyi munene, Satana muine, neabutudibue, ke tshiakumbaja kashidi mulayi wa mu Genese 3:15. Nkomenu eu wa katshimu neasake bifukibua bionso bidi ne muoyo, bia mu nyuma ne bantu, ku dimba diatshimue ne: “Dibenesha, lumu, butumbi ne bukole bikale kudi Eu udi musombe mu nkuasa wa bumfumu ne kudi Muan’a mukoko tshiendelele.” Dîyi nansha dimue dia buntomboji kadiakumvuika mu bukua-bifukibua bionso nansha.

25. (a) Dibala dia muyuki wa Yone udi utangila musambu eu muimba kudi bukua-bifukibua, didi ditusaka ku tshinyi? (b) Bu mukadi tshikena-kumona ku ndekelu watshi, ntshilejilu kayi tshilenga tshidibu batupeshe kudi bifukibua binayi bidi ne muoyo ne bakulu 24?

²⁵ Nebikale tshikondo kayipu tshia disanka! Kabiyi mpata, malu adi Yone mutumvuije apa mmuwuje mitshima yetu ne disanka ne adi atusaka ku didisangisha ne tungimba tua mu diulu bua kuimba ne muoyo umue misambu ya kusamuna nayi Yehowa Nzambi ne Yezu Kristo. Katuenapu bangate dipangadika dikole, kupita kumpala, bua kutungunuka ne kuenza midimu mimpe ne dinanukila anyi? Pikalabi nanku, tudi mua kutekemena bua kuikala bamonyi ba nkomenu eu wa disanka wa tshikena-kumona ne etu abidi ku diambuluisha dia Yehowa; nanku, netusangishe dietu dîyi ku musambu wa kusamuna nawu wimbabu kudi bukua-bifukibua. Bifukibua binayi bidi ne muoyo, peshi bakeluba, ne bena nkristo bela manyi babiishibue ku lufu badi mpindieu mu buobumue bupuangane, bualu, tshikena-kumona tshidi tshijika ne diumvuija edi: “Ne bifukibua binayi bidi ne muoyo bivua biamba ne: ‘Amen!’ Ne bakulu bakinamina e kutendelela.”​—Buakabuluibua 5:14.

26. Tudi ne bua kuenza midimu ya ditabuja mu tshinyi, ne Muan’a mukoko udi udilongolola bua kuenza tshinyi?

²⁶ Nenku, mubadi musuibue, udiku mua kuenza midimu ya ditabuja mu mulambu wa Muan’a mukoko​—‘eu udi muakanyine’—​ne ubeneshibue mu madikolela awudi wenza ne didipuekesha bua kutendelela ne kusadila Yehowa​—“Eu udi musombe mu nkuasa wa bumfumu.” Ubabidile diambuluisha didi difuma kudi bena mu kasumbu ka Yone badi bafila lelu’eu “tshitupa tshia biakudia [bia mu nyuma]” tshidi tshikengedibua “mu tshikondo tshiakanyine.” (Luka 12:42) Kadi, tangila! Muan’a mukoko udi udilongolola bua kulamuna bikangilu muanda-mutekete. Mmasokolola kayipu a dikema adibu batulamine mpindieu?

[Mêyi adi kuinshi]

[Tshimfuanyi dibeji dijima mu dibeji 86]