TSHIBUTSHILU TSHIA MIKANDA TSHIA KU ENTERNETE tshia Watchtower
TSHIBUTSHILU TSHIA MIKANDA TSHIA KU ENTERNETE
tshia Watchtower
Tshiluba
  • BIBLE
  • MIKANDA
  • BISANGILU
  • ie dib. 17-18
  • Kutudi mua kutangila bua kupeta mandamuna

Kakuena filme nansha umue mu tshitupa etshi to.

Tshilema ntshienzeke mu diambula dia filme.

  • Kutudi mua kutangila bua kupeta mandamuna
  • Ntshinyi tshidi tshitufikila patudi tufua?
  • Tumitu tua bualu
  • Bintu bia muomumue
  • Sianse ne nkindi
  • Mpokolo wa pa buende wa mandamuna
  • Bantu batu bamba tshinyi bua tshitu tshienzeka kunyima kua lufu?
    Tshibumba tshia Nsentedi tshidi tshimanyisha Bukalenge bua Yehowa—1999
  • Kudi muoyo kunyima kua lufu anyi?
    Ntshinyi tshidi tshitufikila patudi tufua?
  • Lungenyi elu ludi lubuela mu Buena-Yuda, Bukua-buena-nkristo ne Islame
    Ntshinyi tshidi tshitufikila patudi tufua?
  • Ntshinyi tshidi Bible wamba bua muoyo kunyima kua lufu?
    Tshibumba tshia Nsentedi tshidi tshimanyisha Bukalenge bua Yehowa—1999
Tangila bikuabu
Ntshinyi tshidi tshitufikila patudi tufua?
ie dib. 17-18

Kutudi mua kutangila bua kupeta mandamuna

“Dilongesha dia dikenga dia kashidi kadiena diumvuangana ne ditabuja dia se: Nzambi udi ne dinanga bua bifukibua. . . . Kuitabuja dinyoka dia tshiendelele dia anyima bua bilema bia bidimu bikese, kakuyi dimupesha mushindu wa kuenza dilongolola, ndiya mu njila mubengangane ne mêyi-maludiki onso a lungenyi.” —NIKHILANANDA, MUENA NKINDI WA BENA HINDU.

ANU bu Nikhilananda, muena nkindi wa bena Hindu, bantu ba bungi lelu’eu badi batata mu lungenyi bua dilongesha edi dia dikenga dia tshiendelele. Bua kabingila kamuekamue aka, bakuabu badi ne lutatu bua kujingulula ngenyi bu mudi difika ku Nirvana ne dikala tshintu tshimue ne Tao.

2 Pabi, bu mudiku lungenyi lua se: anyima katu ufua, bitendelelu bia ku Est ne bia ku Ouest mbipatule mulongolongo wa mitabuja adi alubakaja pa bidi bitangila Muoyo wa kunyima kua panu. Tudiku mua kumanya bulelela pa tshidi tshitufikila patudi tufua anyi? Anyima katu bushuwa ufua anyi? Nkuepi kutudi mua kutangila bua kupeta mandamuna?

Sianse ne nkindi

3 Sianse anyi ngenzelu wa sianse wa dikebulula nende malu bidiku ne mandamuna ku nkonko idi itangila malu a Muoyo wa kunyima kua panu anyi? Bashindamene pa mianda idibu balonde matuku aa ya dîba dia dikula muoyo anyi ya malu mamona ‘kabiyi mu mubidi,’ bamue bakebuludi mbatete mua kufila ngenyi pa bidi bitangila muoyo kunyima kua lufu. Muikale ukonkonona amue a ku malu adibu bamba mu muyuki wende wa “Lufu ludi bu mushindu wa kubuela mu butoke anyi?,” Hans Küng, muena teoloji wa bena Katolike, wakakoma ne: “Malu mamonamona a mushindu eu kaena ajadika bualu nansha bumue pa muoyo udi mua kuikalaku kunyima kua lufu: tshidiku muaba eu tshidi anu malu a mu minute itanu ya ndekelu kumpala kua lufu, ki mmuoyo wa tshiendelele kunyima kua lufu.” Wakasakidila ne: “Muanda wa muoyo udi mua kuikalaku kunyima kua lufu ng’wa mushinga mukole mutambe bua muntu udi ne muoyo. Udi ulomba diandamuna didibu ne bua kukeba muaba mukuabu biapangadi kupeteka mu malu a luondapu.”

4 Netuambe tshinyi bua nkindi? Idiku mua kutuambuluisha bua kupeta mandamuna mu mishindu mivule ya muoyo wa kunyima kua lufu mileja kudi bitendelelu kabukabu anyi? Dikebulula mu malu a nkindi didi dikonga “mudimu wa dinana lungenyi,” ke mudi Bertrand Russell, muena nkindi wa bena Grande-Bretagne wa mu siekele wa 20, wamba. Bilondeshile tshibungu kampanda, nkindi idi “mushindu wa dikebulula—ngenzelu wa dikonkonona, ditshinka, disumununa malu ne dinana lungenyi.” (The World Book Encyclopedia) Pa tshiena-bualu tshia Muoyo wa kunyima kua panu, kudi mishindu mishilangane ya bena nkindi ya dinana lungenyi kubangila ku dibikila muoyo ukena kufua bu dijinga dia mu lungenyi patupu too ne ku diumanyisha bu bunême bua ku tshilelelu bua muntu yonso.

Mpokolo wa pa buende wa mandamuna

5 Kadi, kudi mukanda umue udi ne mandamuna malelela ku nkonko ya mushinga idi itangila muoyo ne lufu. Mmukanda wa kalekale kupita yonso idi mifunda, bimue bitupa biawu mbifunda kukadi bidimu bu 3 500. Tshitupa tshia kumpala tshia mukanda eu tshivua tshifunda siekele mikese kumpala kua Veda (tusala tua kumpala menemene tua mifundu ya bena Hindu) kayi muanji kupatula, ne bidimu bitue ku tshinunu kumpala kua Buddha, Mahāvīra ne Confucius kabayi banji kuikala ne muoyo. Mukanda eu bakaujikija mu 98 B.B., bidimu bipite pa 500 kumpala kua Muḥammad kayi muanji kuenza Islame. Mpokolo eu wa pa buende wa meji matumbuke m’Bible.a

6 Bible udi ne malu a kale matambe kujalama kupita mukanda kayi wonso mukuabu udiku. Malu a kale mafunda mu Bible adi aya too ne ku tshibangidilu tshia dîku dia bantu ne adi umvuija mushindu utuakalua panu pa buloba. Adi mene atufikisha too ne ku tshikondo tshivua bantu kabayi banji kufukibua. Mukanda wa nunku udi bushuwa mua kutupesha bujinguludi mu mushindu wakenjibua muntu ne tshidi anyima muikale.

7 Kusakidila apu, Bible mmukanda wa milayi idi mikumbane kakuyi ntupakanyi. Tshilejilu, wakadianjila kumanyisha dibanda ne dikuluka dia ampire wa Medo-Perse ne wa Grèce mu katoba mu katoba. Mêyi aa avua majalame bikole mu mushindu wa se: bamue batobolodi bakateta, kadi kupangilabu, bua kujadika ne: bavua baafunde kunyima kua malu adiwu alonda mamane kuenzeka. (Danyele 8:1-7, 20-22) Imue milayi mifunda mu Bible idi yenda ikumbana mu tunungu tuayi tuonso mu tshikondo tshietu etshi mene.b—Matayo, nshapita 24; Mâko, nshapita 13; Luka, nshapita 21; 2 Timote 3:1-5, 13.

8 Kakuena muntu, nansha muikale wa lungenyi, uvua mua kudianjila kuamba mu mushindu mujalame nunku malu avua ne bua kuenzeka pashishe. Anu Mufuki wa bukole buonso ne wa meji onso wa bukua-bifukibua ke uvua mua kuenza nanku. (2 Timote 3:16, 17; 2 Petelo 1:20, 21) Bible udi bushuwa mukanda wa kudi Nzambi. Bulelela, mukanda bu eu udi mua kutupesha mandamuna malelela ne adi asankisha pa tshidi tshitufikila patudi tufua. Tuanji kumona kumpala tshidiye wamba bua anyima.

[Mêyi adi kuinshi]

a Tangila broshire wa Un livre pour tous, mupatula kudi Watch Tower Bible and Tract Society of Pennsylvania.

b Tangila mukanda wa La Bible : Parole de Dieu ou des hommes ?, mupatula kudi Watchtower Bible and tract Society of New York, Inc.

[Nkonko ya dilonga]

1, 2. Pa kumona dishilangana dia mitabuja a malu a Muoyo wa kunyima kua panu, nnkonko kayi idi ijuka?

3. Sianse anyi ngenzelu wa dikebulula wa bena sianse bidiku bifila mandamuna ku nkonko idi itangila muoyo kunyima kua lufu anyi?

4. Nkindi idiku mua kutuambuluisha bua kupeta mandamuna mu mishindu mivule idiku ya muoyo wa kunyima kua lufu mileja kudi bitendelelu kabukabu anyi?

5. Mmukanda kayi udi wa kalekale kupita yonso idi mifunda?

6. Bua tshinyi tudi mua kutekemena bua Bible kutuambilaye tshidi anyima muikale?

7, 8. Bua tshinyi tudi mua kutangila Bible ne dieyemena dionso bua kupeta mandamuna malelela ne adi asankisha pa tshidi tshitufikila patudi tufua?

[Tshimfuanyi mu dibeji 18]

Mukanda wa kalekale kupita yonso idi mifunda

[Tshimfuanyi mu dibeji 18]

Mukanda udi ufila mandamuna a kueyemena ne adi asankisha

    Mikanda ya mu Tshiluba (1982-2024)
    Patuka
    Buela
    • Tshiluba
    • Tumina bakuabu
    • Biudi musue
    • Copyright © 2025 Watch Tower Bible and Tract Society of Pennsylvania
    • Malu a kulonda
    • Mikenji ya mua kulama malu masokoka
    • Biudi witaba bua kuenzekabi mu tshiamu
    • JW.ORG
    • Buela
    Tumina bakuabu