Nshapita Wa Dikumi Ne Muisambombo
‘Nunangangane bikole’
1. Mmalu kayi atu atamba kukemesha benyi batu babuela mu bisangilu bia Bantemu ba Yehowa?
PADI bantu balua musangu wa kumpala mu bisangilu bia Bantemu ba Yehowa, batu misangu mivule bakema bakatshila bua dinanga ditubu bamona munkatshi muabu. Batu bamuenena dinanga edi ku mushindu udibu babakidila bilenga ne ku bulunda bua disanka butubu bamonamu. Bantu batu balua mu mpungilu yetu batu pabu bamona dinanga edi. Kamona-kamba mukuabu wakafunda pa bidi bitangila mpungilu wetu kampanda ne: ‘Kakuena muntu nansha umue mukuatshike diamba anyi maluvu to. Mitoyi nansha mbila kabienaku. Kakuena difuilakana. Kakuena disakilangana. Kakuena dikanyinangana nansha bipendu. Kuakumvua mêyi mabi anyi a bundu. Kuakumonamu muishi wa makanya. Kamuena buivi. Kakuena muntu wimansha bintu bia manyanu mu mashinde. Bivua bualu butu kabuyi butamba kuenzeka.’ Malu onso aa mbijadiki bia dinanga, dinanga didi ‘kadiyi dipange bukalanga, kadiyi dikeba diakalenga diadi.’—1 Kolinto 13:4-8, MMM.
2. (a) Ntshinyi tshidi ne bua kumueneka kunyima kua matuku mu dilejangana dietu dia dinanga? (b) Bua kuidikija Kristo, tudi ne bua kuikala ne dinanga dia mushindu kayi?
2 Dinanga dia buena-muntu ke tshimanyinu tshidi tshisunguluja bena Kristo balelela. (Yone 13:35) Patudi tukola mu nyuma, tudi tumanya mua kutamba kuleja dinanga edi. Mupostolo Paulo wakasambila bua dinanga dia bena Kristo nende ‘ditambe kudiundadiunda.’ (Filipoi 1:9) Mupostolo Yone wakaleja ne: dinanga dietu didi ne bua kuikala ne lungenyi lua didifila. Wakafunda ne: ‘Mu muanda eu tudi bamanye dinanga, bualu bua [Muana wa Nzambi] wakateka muoyo wende panshi bua bualu buetu; ne tuetu tudi ne bualu bua kuteka mioyo yetu panshi bualu bua bana betu.’ (1 Yone 3:16; Yone 15:12, 13) Tudiku mua kuteka muoyo wetu panshi bua bana betu anyi? Nansha mudibi kabiyi bitulomba bua kuenza nanku misangu mivule, tutu tuenza muetu muonso bua kubambuluisha, nansha padibi bimueneka bitukolele?
3. (a) Tudi mua kutamba kuleja dinanga dietu mushindu kayi? (b) Kunangangana bikole mpindieu kudi ne mushinga bua tshinyi?
3 Pa kumusha bienzedi bietu bidi bileja ne: tudi ne lungenyi lua didifila, tudi kabidi ne bua kunanga bana betu bikole. Dîyi dia Nzambi didi ditubela ne: ‘Mu dinanga dia bana benu ba mu Kristo nunangangane, muntu ne muntu.’ (Lomo 12:10) Tuetu bonso tutu tuleja bamue bantu dinanga edi. Kadi tudiku mua kulonga bua kuleja kabidi bakuabu dinanga edi anyi? Bu mudi nshikidilu wa ndongoluelu wa kale eu wenda usemena pabuipi, mbimpe tuetu kukeba bua kutamba kushemesha malanda ne bena Kristo netu. Bible udi wamba ne: ‘Nshikidilu wa bionso ukadi pabuipi. Kumpala kua bionso, nanganganayi bikole, bualu dinanga didi dijibikila mibi mivule.’—1 Petelo 4:7, 8, MMM.
Padi bilumbu bijuka
4. (a) Bua tshinyi bilumbu bidi mua kujuka munkatshi mua bena mu tshisumbu? (b) Nansha katuyi misangu yonso ne meji a kutumikila mibelu ya mu Bible, mbipeta kayi bimpe bidi mua kumueneka bituayitumikila?
4 Bushuwa, patutshidi bantu bapange bupuangane apa, nekuikale anu misangu ituenza amue malu adi abungamija bakuetu. Bana betu badi pabu mua kutuenzela bibi mu mishindu kampanda peshi kansanga. (1 Yone 1:8) Bualu bua nunku buobu bukufikile, udi ne bua kuenza tshinyi? Mukanda wa Nzambi udi uleja tshidi tshikengela kuenza. Kadi tshidiwu wamba katshiena pamuapa mua kupetangana ne tshidi meji etu tuetu bantu bapange bupuangane atusaka bua kuenza to. (Lomo 7:21-23) Nansha nanku, patudi tutumikila ne muoyo mujima mibelu idi mu Bible, nebileje ne: tudi tujinga bikole bua kusankisha Yehowa. Kuenza nanku nekukoleshe kabidi dinanga dietu kudi bakuabu.
5. Bua tshinyi katuena ne bua kudisombuela padi muntu mutuenzele bibi?
5 Bantu bakuabu patubu babenzela bibi, batu bakeba mushindu wa kudisombuela. Kadi kuenza nanku nkuvudija bilumbu tshianana. Tudi ne bua kushiya bualu ebu mu bianza bia Nzambi. (Nsumuinu 24:29; Lomo 12:17-21) Bakuabu badi mua kukeba bua kuepuka muntu udi mubenzele bibi eu. Kadi katuena ne bua kuenzela bena Kristo netu nunku to, bualu Nzambi udi wanyisha ntendelelu wetu kabidi anu bua dinanga ditudi banange bana betu. (1 Yone 4:20) Ke bualu kayi Paulo wakafunda ne: ‘Nulejangane lutulu, nulekelelangane mibi yenu, bikala muntu ne mukuabu tshilumbu; bu muakanubuikidila Mukalenge mibi yenu; nuenu nuenze muomumue kabidi.’ (Kolosai 3:13) Udiku mua kuenza nanku anyi?
6. (a) Tudi ne bua kubuikidila bana betu bilema misangu bungi munyi? (b) Ndijingulula bualu kayi budi bututangila diatuambuluisha bua kubuikidila bakuabu mibi idibu batuenzela?
6 Kadi tudi mua kuamba tshinyi bikala muntu utuenzela bibi misangu ne misangu kadi kayi wenza mpekatu munene udi mua kumuipatshishisha mu tshisumbu? Bua mibi mikese ya nunku, mupostolo Petelo wakamba bua kuyibuikidilangana “misangu muanda mutekete.” Kadi Yezu wakamba ne: ‘Tshiena nkuambila ne: too ne ku misangu muanda-mutekete, ndi nkuambila ne: too ne ku makumi-muanda mutekete [ne] muanda-mutekete.’ Wakaleja bunene bua dibanza ditudi nadi kudi Nzambi, ditudi katuyi mua kufuanyikija ne didi muntu kayi yonso mua kuikala nadi kutudi. (Matayo 18:21-35) Matuku onso tutu tuenzela Yehowa bibi mu mishindu mivule; imue misangu bua kudisankisha, ku malu atudi tuamba ne atudi tuelela meji ta ku bitudi tupanga bua kuenza katuyi nansha tumanya ne: tudi tuenza mpekatu. (Lomo 3:23) Pabi Nzambi udi utungunuka amu ne kutufuila luse. (Musambu 103:10-14; 130:3, 4) Udi utulomba bua tuetu kufuilangana petu luse. (Matayo 6:14, 15; Efeso 4:1-3) Nanku netuikale ne dinanga didi ‘kadiyi dibala malu mabi adibu badienzela.’—1 Kolinto 13:4, 5; 1 Petelo 3:8, 9.
7. Tudi ne bua kuenza tshinyi padi muanetu muikale netu tshilumbu?
7 Kudi mua kulua bikondo bitudi mua kumona ne: nansha mutudi katuyi benzele muanetu bualu bubi, yeye udi anu netu tshilumbu munda. Nunku tuetu tudi mua kulengulula ngikadilu wende eu ne ‘kumubuikidila tshilumbu atshi mu dinanga’ anu mudibu baleje mu 1 Petelo 4:8. Peshi tudi mua kuya kuyikila nende bua kukeba mua kupingaja ditalala pankatshi petu nende.—Matayo 5:23, 24.
8. Padi muanetu wenza bualu budi butunyingalaja, tshidi tshikengela kuenza ntshinyi?
8 Bidi mua kuenzeka bua ne: malu adi muanetu kampanda wenza adi akunyingalaja, ne anyingalaja kabidi bakuabu. Kuenaku umona ne: mbimpe uyikile nende bua bualu ebu anyi? Pamuapa ke tshidi tshikengela kuenza. Wewe mua kumumvuija tshilumbu atshi mu buimpe, bidi mua kulela bipeta bia disanka. Kadi, bangabanga udi mua kuanji kudikonka ne: ‘Udi menemene wenza bualu budi bubengangane ne Dîyi dia Nzambi anyi? Peshi bualu budi se: bibidilu bianyi ne mushindu undi meme mukole mbishilangane ne biende yeye anyi?’ Wamanya bua kuedi yebe mikenji ne bua kumupishi bilondeshile yebe mikenji iudi muele eyi. (Yakobo 4:11, 12) Yehowa udi witaba bantu badi bakole mu nsombelu ya mishindu ne mishindu kakuyi kansungasunga to, ne udi nabu lutulu padibu benda bakola mu nyuma.
9. (a) Badi batangila tshilumbu tshia bilema binene mu tshisumbu mbanganyi? (b) Ndîba kayi didi muntu udibu benzele bibi ne bua kuanji kuenza bualu kampanda, ne neenze nanku bua kuipatshila tshinyi?
9 Muanetu kampanda wa mu tshisumbu yeye muenze tshilema tshinene bu mudi tshiendenda, bidi bikengela batangile bualu ebu bimpe menemene ne lukasa. Kudi nganyi? Kudi bakulu. (Yakobo 5:14, 15) Kadi, bualu bubi ebu buobu buenzela muntu, pamuapa mu malu a makuta anyi mu dienza mudimu bibi ne ludimi luetu, muntu udibu benzele bibi au udi ne bua kuanji kuenza muende muonso bua kuyikidilabu pa babidi ne udi mumuenzele bubi au. (Matayo 18:15) Bikala malu kaayi malongoloke, nebikengele kulonda bidia bikuabu bidibu baleje mu Matayo 18:16, 17. Dinanga ditudi banange muanetu udi mutuenzele tshilema au ne dijinga dia ‘kumuvuija muanetu kabidi’ nebituambuluishe bua kukeba mushindu wa kulenga mutshima wende.—Nsumuinu 16:23.
10. Padi tshilumbu tshijuka, ntshinyi tshiatuambuluisha bua kutshimona mushindu muakanyine?
10 Padi tshilumbu tshijuka, nansha tshikale tshinene ta tshikese, netupite natshi bimpe tuetu banji kukeba bua kumanya mushindu udi Yehowa yeye utshimona. Katu wanyisha mpekatu nansha wa mushindu kayi to. Benji ba mpekatu minene badi kabayi banyingalala ne bayilekela batu bipatshibua mu bulongolodi buende mu tshikondo tshidiye mulongolole. Kadi, katupu muoyo ne: tuetu bonso tutu tuenza mpekatu ne tudi dijinga ne lutulu ne luse luende. Yehowa udi utuleja tshilejilu tshia tuetu kulonda padi bakuetu batuenzela bibi. Patudi bena luse, tudi tuleja dinanga dia buena diende.— Efeso 5:1, 2.
Keba mishindu ya ‘kunzulula mutshima webe’
11. Bua tshinyi Paulo wakakankamija bena Kolinto bua ‘kunzulula mitshima’ yabu?
11 Paulo wakenza ngondo mivule mu dikolesha tshisumbu tshia ku Kolinto, mu ditunga dia Gelika. Wakenza mudimu mukole bua kuambuluisha bana betu ba mu tshisumbu etshi, ne wakabananga. Kadi bamue ba kudibu kabavua bamuanyisha to. Bavua bamujana bikole. Wakabambila bua ‘kunzulula mitshima’ yabu mu dileja dinanga. (2 Kolinto 6:11-13; 12:15, MML) Tuetu bonso tudi ne bua kukonkonona mushindu utudi tuleja bakuabu dinanga dietu ne kukeba mishindu ya kunzuluilangana mitshima yetu anyi kuvudija dinanga dietu.—1 Yone 3:14.
12. Mmunyi mutudi mua kukolesha dinanga dietu kudi bantu bonso badi mu tshisumbu?
12 Kudiku bamue bantu mu tshisumbu batudi tumona bitukolela bua kusemena padibu anyi? Tuetu mua kudikolesha bua kulengulula dishilangana dia ngikadilu ditudi nadi (anu mutudi mua kujinga bua buobu pabu batuenzele) bidi mua kutuambuluisha bua tuetu kulengeja malanda pankatshi petu nabu. Tudi kabidi mua kufika ku dibanyisha bikole tuetu mua kutangila anu ngikadilu yabu milenga ne kuimanyinapu. Kakuyi mpata, kuenza nunku nekukoleshe dinanga dietu kudibu.—Luka 6:32, 33, 36.
13. Mmunyi mutudi mua kudiundisha malanda etu mu dileja dinanga kudi bena mu tshisumbu tshietu?
13 Bulelela, malu atudi mua kuenzela bakuabu adi ne mikalu. Katuena mua kukokesha bua tuetu kuela bantu bonso muoyo mu tshisangilu tshionso to. Kakuena mushindu wa kubikila bantu bonso patudi tubikila balunda betu ku metu bua kudia nabu pamue to. Kadi tudiku mua kunzulula mitshima yetu anyi kudiundisha malanda etu pa kupitshisha minite nansha mikese tshianana bua kumanyangana bimpe ne muntu kampanda wa mu tshisumbu tshietu anyi? Tudiku imue misangu mua kulomba muntu utudi katuyi bamanye bimpe bua kupatukaye netu mu buambi anyi?
14. Mmunyi mutudi mua kuleja bana betu bena Kristo batudi katuyi bamanye ne: tudi babanange bikole?
14 Mpungilu ya bena Kristo itu itupetesha mishindu milenga ya kudiundisha dinanga dietu. Bantu binunu ne binunu badi mua kubuelamu. Katuena mua kumonangana nabu bonso to, kadi tudi mua kuikala ne ngikadilu udi uleja ne: tudi tuteka masanka abu kumpala kua malu adi atulengelela tuetu. Kumpala ne kunyima kua bitupa bia mpungilu ne mu dikisha, tudi mua kuleja ne: tudi tusanka bua mutudi babamone pa kuyikilaku ne bamue ba ku badi basombele pabuipi netu. Dimue dituku bantu bonso badi pa buloba nebalue bena muntu, bikale mu buobumue mu ntendelelu wa Nzambi mulelela ne Tatu wa bonso. Nebikale disanka bushuwa dia kumanyangana! Dinanga dikole neditusake bua kuenza bualu ebu. Bua tshinyi kubenga kutuadija mpindieu?
Diambulula
• Padi bilumbu bijuka pankatshi pa bena Kristo, mmunyi mudibu ne bua kubijikija, ne mbua tshinyi?
• Patudi tuenda tukola mu nyuma, mmu mishindu kayi mudi dinanga dietu padi ne bua kukola?
• Mmunyi mutudi mua kuleja bantu ba bungi dinanga dikole pamutu pa kudileja amu kasumbu kakese ka balunda?
[Tshimfuanyi mu dibeji 148]
Kudi mishindu mivule ya kuleja dinanga dia Buena-Kristo: bu mudi mu bisangilu bia tshisumbu