Bakadifila ne muoyo mujima mu Mexique

BIDI bienza disanka bua kumona mudi Bantemu ba bungi batshidi bansonga bapepeja nsombelu wabu bua kuvudija mudimu wabu wa buena Kristo. (Mat. 6:22) Mmalu kayi adibu bashintulule mu nsombelu wabu? Nntatu kayi itubu bapeta? Bua kuandamuna nkonko eyi, tuakulayi bua bamue ba kudibu badi benza mudimu mu Mexique.

“TUVUA NE BUA KUSHINTULULA AMUE MALU”

Dustin ne Jassa ba mu États-Unis bavua baselangane mu ngondo wa 1 mu 2007. Matuku makese pashishe, bakasumba buatu buvuabu bajinga munkatshi mua matuku a bungi ne bakasombamu munkatshi mua tshidimu tshijima. Bavua basuike buatu buabu pabuipi ne Astoria mu tshimenga tshitambe buimpe tshia Oregon mu États-Unis, tshidi tshinyunguluka kudi dîtu didi pa tukunakuna ne kudi mikuna mibuikila kudi neje pabuipi ne Mbuu wa Pasifike. Dustin udi wamba ne: “Wewe mutangile miaba yonso mu tshimenga etshi neumone ne: ntshimpe be!” Dustin ne mukajende bavua bamone ne: bavua ne nsombelu mupepele ne bavua beyemene Yehowa. Bavua bela meji ne: ‘Tudi basombele mu buatu bua metre matue ku 8, tuenza mudimu mêba makese, tubuela mu bisangilu bia muakulu muenyi ne imue misangu tuenza mudimu wa bumpanda-njila buambuluishi.’ Kadi bakalua kumona ne: bavua badishima. Dustin udi wamba ne: “Pamutu pa tuetu kuenza midimu ya mu tshisumbu, tuvua tupitshisha dîba dia bungi mu dilongolola buatu buetu. Tuvua bamanye ne: tuetu basue kuteka Yehowa pa muaba wa kumpala, tuvua ne bua kushintulula amue malu.”

Jassa udi wamba ne: “Kumpala kua tuetu kuselangana, mvua musombele mu Mexique ne mvua mbuela mu bisangilu mu tshisumbu tshia muakulu wa Anglais. Mvua musue kuenza mudimu muaba eu ne mvua ne dijinga dikole dia kupinganamu.” Bua Dustin ne Jassa kukoleshabu dijinga diabu dia kuya kuenza mudimu mu ditunga dikuabu, bakatuadija kubala mu ntendelelu wabu wa mu dîku miyuki ya bamue bana betu ba balume ne ba bakaji bavua baye kuenza mudimu miaba ivua madimi matoke bua kunowa. (Yone 4:35) Dustin udi wamba ne: “Tuvua basue kupeta disanka dia buena divuabu nadi.” Pavua balunda ba Dustin ne Jassa bavua mu Mexique babambile ne: kuvua kasumbu kapiakapia kavua dijinga ne diambuluisha, bakangata dipangadika dia kuya. Bakalekela midimu ivuabu benza, kupanyishabu buatu buabu ne kuyabu mu Mexique.

“BUALU BUTAMBE BUIMPE BUTUVUA KATUYI BANJI KUENZA”

Dustin ne Jassa bakasombela mu tshimenga tshia Tecomán tshidi pabuipi ne Mbuu wa Pasifike kadi ntanta wa kilometre 4 345 ku Sud kua Astoria. Dustin udi wamba ne: “Pamutu pa tuetu kuikala ne kapepe kimpe ne kumona mikuna mimpe, tudi mu luya lua dikema ne tudi tumona mitshi ya bimuma bia mpusu (anyi citron) misangu ya bungi.” Ku ntuadijilu, kabavua bapete mudimu to. Bu muvuabu kabayi ne makuta, bavua badia nkunde ne losa misangu ibidi ku dituku munkatshi mua mbingu ya bungi. Jassa udi wamba ne: “Anu patuvua katuyi mua kukokesha kabidi bua kudia biakudia ebi, balongi betu ba Bible bakatuadija kututuadila mangaya, bibote, bipapayi ne bibuta biule tente ne bimuma bia mpusu.” Mu bungi bua matuku, bana betu aba bakapeta mudimu uvuabu benzela ku Enternete mu tulasa tua miakulu tua mu Taïwan. Makuta avuabu bapeta ku mudimu eu akabambuluisha bua kukumbaja majinga abu a ku dituku ne dituku.

Dustin ne Jassa badi bumvua bishi bua nsombelu wabu mupiamupia eu? Badi bamba ne: “Luendu lutuvua benze elu luvua bualu butambe buimpe butuvua katuyi banji kuenza. Malanda etu ne Yehowa, ne adi pankatshi petu babidi mmakole kupita mutuvua bele meji. Dituku dionso tudi tuenza malu a bungi pamue bu mudi kuya mu buambi pamue, kuyukila bua mushindu utudi mua kuambuluisha balongi betu ba Bible ne kulongolola bisangilu. Katuena tusamisha kabidi mutu bua amue malu mutuvua tuenza kumpala to. Mpindieu tudi tumvua bimpe kupita kumpala mulayi udi mu Musambu wa 34:8 wa ne: ‘Teta, ulabule, umvue ne: Yehowa udi muakane.’”

TSHIDI TSHISAKA BANTU BA BUNGI BUA KUDIFILA KU BUDISUILE

Bana betu ba balume ne ba bakaji basele ne bajike bapite pa 2 900 mbaye kuenza mudimu mu Mexique mu miaba idibu dijinga dinene ne bamanyishi ba Bukalenge. Ba bungi ba kudibu badi ne bidimu pankatshi pa 20 ne 40. Bua tshinyi Bantemu bonso aba mbitabe bua kuenza mudimu mukole eu? Pavuabu bele bamue ba kudibu lukonko elu, bakatela malu manene asatu. Mmalu kayi au?

Bua kuleja mudibu banange Yehowa ne bantu nabu. Leticia uvua mutambule ne bidimu 18 udi wamba ne: “Pangakadilambula kudi Yehowa, ngakafika ku diumvua ne: kuenza nunku kuvua kundomba bua kumuenzela mudimu ne muoyo wanyi wonso ne anyima wanyi yonso. Nunku bua kuleja mundi munange Yehowa ne muoyo mujima, mvua musue kufila dîba dianyi ne makanda anyi onso bua kumuenzela mudimu.” (Mâko 12:30) Hermilo wakalua kusela Leticia, uvua ne bidimu 20 ne bia mu njila pavuaye muye bua kuyisha muaba uvuabu dijinga ne bamanyishi ba Bukalenge ba bungi. Udi wamba ne: “Ngakamona ne: kuambuluisha bantu bua kupetabu bulelela kuvua mushindu muimpe wa kuleja mundi munange bantu nanyi.” (Mâko 12:31) Nunku, wakumbuka mu tshimenga tshia Monterrey tshivua ne bubanji bua bungi, muvuaye wenza mudimu ku banke ne muikale ne nsombelu muimpe ne kuyaye mu katshimenga kakese.

Bua kuikala ne disanka dilelela ne dia kashidi. Matuku makese panyima pa Leticia mumane kutambula, wakaya ne muanetu wa bakaji mukuabu uvua mpanda-njila kukadi bidimu bia bungi mu tshimenga kampanda tshia kule, bakayishamu mu ngondo mujima. Leticia udi uvuluka wamba ne: “Biakankemesha bikole. Mushindu uvua bantu bitaba mukenji wa Bukalenge utuvua tubayisha wakansankisha bikole. Ku ndekelu kua ngondo au, ngakadiambila ne: ‘Ke tshindi musue bua kuenza mu nsombelu wanyi etshi.’” Bia muomumue, pavua Essly, muanetu wa bakaji utshidi mujike, udi ne bidimu 20 ne bia mu njila mumone bamanyishi bikale ne disanka, biakamusaka bua kuya kuenza mudimu muaba uvuabu dijinga dikole ne bamanyishi. Patshivuaye mu tulasa tua bikadilu, wakapetangana ne Bantemu ba tshisumi bavua bayishe miaba ivuabu dijinga dikole ne bamanyishi. Udi wamba ne: “Pamvua mumone disanka divua nadi bana betu aba, biakansaka bua kuikala ne nsombelu wa buena wabu.” Bana betu ba bakaji ba bungi mbitabe pabu bua kuenza malu anu bu Essly. Nunku, kudi bana betu ba bakaji batshidi bajike bapite pa 680 badi benza mudimu muaba udibu dijinga dikole ne bamanyishi mu Mexique. Badi tshilejilu tshimpe kudi bansonga ne bakulumpe kabidi.

Bua kuikala ne nsombelu wa disanka ne udi ne tshipatshila. Pavua Essly mujikije tulasa tuende tua bikadilu, bakamuanyishila bua kutungunuka ne tulasa tua iniversite kayi ufuta. Bansonga nende bakamukankamija bua kuitaba ne kuikala ne tshidibu bamona ne: nsombelu muimpe, mmumue ne: kuikala ne dipoloma dia iniversite, mudimu muimpe, mashinyi ne kuenza ngendu. Kadi kakalonda mibelu yabu to. Essly udi wamba ne: “Bamue balunda banyi bavua bena Kristo bavua bakeba malu aa, ne ngakamona ne: kabatshivua kabidi badifila mu malu a mu nyuma to. Ngakamona kabidi ne: bu muvuabu badifila bikole mu malu a mu bulongolodi ebu, bavua bapeta anu tunyinganyinga mu malu avuabu benza. Mvua musue kuenzela Yehowa mudimu ne muanyi muonso mu bunsonga buanyi.”

Essly wakalonga kabidi midimu ivua mimuambuluishe bua kupeta makuta avuaye mua kudiambuluisha nawu pavuaye wenza mudimu wa bumpanda-njila. Pashishe wakaya muaba uvuabu dijinga dikole ne bamanyishi ba Bukalenge. Wakadienzeja bua kulonga muakulu uvuabu bakula kudi ba-Otomi ne ba-Tlapaneco. Padiye wela meji bua bidimu bionso bisatu bidiye muyishe mu miaba ya kule udi wamba ne: “Kuenza mudimu muaba udi dijinga dikole nkumpeteshe disanka ne nsombelu wa nsongo. Nkukoleshe kabidi malanda anyi ne Yehowa.” Phillip ne Racquel, mulume ne mukaji badi ne bidimu 30 ne bia mu njila ba mu États-Unis badi bitaba bualu ebu. Badi bamba ne: “Malu adi enda ashintuluka ne lukasa mu bulongolodi ebu ne bantu ba bungi mbamone ne: kabena ne nsombelu muimpe to. Kadi kuenza mudimu muaba utudi tupeta bantu ba bungi badi bateleja mukenji wa mu Bible kudi kutupesha nsombelu muimpe. Tudi ne disanka dia bungi.”

MUSHINDU WA KUPITA NE NTATU

Bushuwa, bantu badi benza mudimu muaba udibu dijinga ne bamanyishi ba bungi badi ne yabu ntatu. Lumue lua ku ntatu eyi mmushindu wa kupeta makuta a kudiambuluisha nawu. Bua kulutantamena, udi ne bua kuikala mudiakaje bua kushintulula malu bilondeshile muaba uudi uya. Verónica udi mpanda-njila kukadi matuku a bungi udi wamba ne: “Mu umue muaba umvua muye kuyisha, mvua ndamba ne mpanyisha biakudia bia mushinga mukese bivua kabiyi bingangata dîba dia bungi. Muaba mukuabu, mvua mpanyisha bilamba ne nkosa nsuki. Mpindieu, ndi nkolopelangana mu nzubu ne ndongesha bantu batshidi baluilaku baledi, mbalongesha mua kuyikilabu ne bana babu.”

Wewe muye kusombela muaba wa kule, mbikole bua kuibidilangana ne bilele bia bena muaba au. Ke tshivua tshifikile Phillip ne Racquel pavuabu bayisha muaba uvuabu bakula muakulu wa Nahuatl. Phillip udi wamba ne: “Bilele bietu ne bia muaba au bivua bishilangane bikole.” Tshivua tshibambuluishe bua kuibidilangana ntshinyi? Udi wamba kabidi ne: “Tuvua tutamba kuimanyina pa malu mimpe atuvua tumona bena Nahuatl benza bu mudi: bena mu mêku abu bavua balamatangane bikole, bantu bavua bambilangana bulelela munkatshi muabu ne bambuluishangana bikole.” Racquel udi pende wamba ne: “Tuakalonga malu a bungi muaba au ne kudi bana betu ba balume ne ba bakaji ba muaba au batuvua tuenza nabu mudimu.”

TSHIUDI MUA KUENZA BUA KUDILONGOLOLA

Wewe musue kuya miaba ya kule idibu dijinga ne diambuluisha, tshiudi mua kuenza bua kudilongolola ntshinyi? Bana betu ba balume ne ba bakaji bakadi benze midimu eyi badi bamba ne: Kumpala kua kuya, anji kupepeja nsombelu webe ne udienzeje bua kuikala ne disanka. (Filip. 4:11, 12) Tshiudi mua kuenza kabidi ntshinyi? Leticia udi wamba ne: “Mvua mbenga midimu ivua indomba bua kuyenzela muaba umue matuku a bungi. Mvua musue kuikala mudiakaje bua kuya muaba kayi onso ne dîba kayi dionso.” Hermilo udi wamba ne: “Ngakalonga bua kulamba, kusukula bilamba ne kubikoma.” Verónica udi wamba ne: “Pamvua kuetu ne baledi banyi ne bana betu mvua nkolopa mu nzubu, mvua mulonge mua kulamba bia kudia bia mushinga mukese kadi bivua bidisha mubidi. Mvua kabidi mumanye mua kulama makuta.”

Levi ne Amelia badi bafumine mu États-Unis ne baselangane kukadi bidimu muanda mukulu badi baleja muvua kulomba malu kampanda masunguluke mu masambila kubambuluishe bua kudilongolola bua kuya kuenza mudimu mu Mexique. Levi udi wamba ne: “Tuakenza makumi bua kumanya bungi bua makuta atuvua mua kutula munkatshi mua tshidimu tshijima muaba utuvua tuya ne kulomba Yehowa mu disambila bua atuambuluishe bua kupeta makuta aa.” Munkatshi mua ngondo ya bungi, bakakumbaja makuta avuabu balombe mu disambila au ne kuyabu ne lukasa luonso. Udi wamba kabidi ne: “Yehowa uvua muandamune disambila dituvua benze, nunku tuvua ne bua kuenza tshituvua bambe.” Amelia udi pende wamba ne: “Tuvua tuela meji ne: netusombe anu bua tshidimu tshimue, kadi tudi muaba eu kukadi bidimu muanda mutekete ne katuena basue kumbuka to. Kusombela muaba eu nkutuambuluishe bua kumona mudi Yehowa nkayende ututabalela. Dituku dionso tudi tumona buimpe buende.”

Disambila divua diambuluishe padi bikole Adam ne Jennifer, mulume ne mukaji ba mu État-Unis badi benza mudimu mu tshisumbu tshia Anglais mu Mexique. Badi balomba bantu ne: “Kuindidi pakana malu to. Ikala usambila bikole bua dijinga diudi nadi dia kuenza mudimu muaba mukuabu ne enza malu bilondeshile biudi ulomba. Pepeja nsombelu webe, fundila Betele wa mu ditunga diudi musue kuya ne wewe mumane kumanya tshidi tshikengela, ndaku.”a Wewe muenze nunku neupete nsombelu muimpe wa mu nyuma matuku adi alua.