Udi Mumanye Anyi?
Mmunyi mudi madioto avuabu bapete mu bikulu bia Babilona wa kale ne mushindu uvuabu baenza bishindika bujalame bua Bible?
BAKEBULUDI ba bintu biangula bia kale mbapete mu Babilona wa kale madioto a bungi avuabu bibake nawu tshimenga atshi. Bua Robert Koldewey, mukebuludi wa bintu bia kale, bavua buosha madioto au mu mfulu ivua “pambelu pa tshimenga, muaba uvua buloba buimpe bua diima ne uvua nkunyi mua kupeteka bipepele.”
Bakebuludi abu mbapete malu adi ajadika ne: bamfumu ba mu Babilona bavua kabidi benza malu mabi matambe ne mfulu ayi. Paul-Alain Beaulieu, mumanyi mupiluke wa malu a kale a bena Ashû ne a muakulu wabu udi kabidi mulongeshi mu université de Toronto, udi wamba ne: “Mifundu ndambu ya bena Babilona idi ileja ne: mukalenge wabu uvua muele mukenji wa kuosha muntu yonso uvua kayi umutumikila anyi kayi unemeka bintu biabu bia tshijila mu tshikutu tshia kapia.” Mbafunde mu umue mukanda wa mu matuku a mukalenge Nebukadenesâ ne: “Bashipayi, nuoshe mibidi yabu, . . . mu mfulu wa balambi . . . muishi wa mibidi yabu ubande, nubashipe mu tshikutu tshikole tshia kapia.”
Bualu ebu budi buvuluija babadi ba Bible malu adi mu Danyele nshapita 3 udi uleja muvua mukalenge Nebukadenesâ muenze lupingu lunene lua or mu mpata wa Dula, uvua pambelu pa tshimenga tshia Babilona. Pavua bansonga basatu bena Yuda aba: Shadalaka ne Meshaka ne Abedenego babenge kulukukuila, Nebukadenesâ wakamba kutayika ne tshiji, ke kutumaye dîyi bua basonsole tshikutu tshia kapia “misangu muanda mutekete kupita mututshi matuku onso,” pashishe ‘kubeleshaye mu tshikutu tshia kapia kakole’ atshi. Kadi muanjelu wa bukole wakabasungila ku lufu.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Didioto dikale ne tshitampi tshia dîna dia Nebukadenesâ
Madioto adibu bapete mu Babilona au adi ajadika kabidi mudi Bible mujalame. Mbafunde pa a bungi a kudiwu miaku idi itumbisha mukalenge wa Babilona. Mu miaku ayi muvua ivua yamba ne: “Nebukadenesâ, mukalenge wa Babilona . . . Dibalasa, dindi meme mukalenge munene muibake . . . Ndelanganyi yanyi ishalaku ikokeshalamu bua kashidi.” Miaku eyi mifuanangane menemene ne mêyi a Nebukadenesâ adi mu Danyele 4:30, avuaye muambe ne diambu dionso ne: “Eu ki m’Babilona Munene undi meme muase bua nzubu wa bukalenge ku bukole ne makanda anyi, bua butumbi ne bunême buanyi anyi?”