Nkonko ya babadi
“Banjelu basungula” badibu batele mu 1 Timote 5:21 mbanganyi?
Mupostolo Paulo wakafundila mukulu nende Timote, wamba ne: “Ndi nkutumina dîyi ne muoyo mujima kumpala kua Nzambi ne Kristo Yezu ne banjelu basungula bua kutumikila malu aa kuyi udianjila kuelelangana meji mabi anyi ne kansungansunga to.”—1 Tim. 5:21.
Tshia kumpala, tuakulayi bua bantu 144 000. Bantu aba kabena munkatshi mua banjelu basungula abu to. Pavua Paulo mufundile Timote apu, dibishibua ku lufu dia bela manyi bua kuya mu diulu kadivua dianji kutuadija to. Bapostolo ne bela manyi kabavua banji kulua bifukibua bia mu nyuma to, nunku bobu ki ‘mbanjelu basungula’ to.—1 Kol. 15:50-54; 1 Tes. 4:13-17; 1 Yone 3:2.
Tshibidi, “banjelu basungula” ki mbajelu bavua batomboke tshikondo tshia Mvula wa kabutu to. Bualu aba bavua baditue ku tshia Satana, balue bademon; bobu kulua bena lukuna ba Yezu. (Gen. 6:2; Luka 8:30, 31; 2 Pet. 2:4) Kumpala eku, nebabele mu dijimba dile bua bidimu 1 000, pashishe nebalue kubabutula pamue ne Diabolo.—Yuda 6; Buak. 20:1-3, 10.
“Banjelu basungula” bavua Paulo mutele abu bavua ne bua kuikala banjelu bavua ne lulamatu kudi “Nzambi ne Yezu” mu diulu.
Kudi banjelu ba lulamatu bapite bungi. (Eb. 12:22, 23) Katuena ne bua kuela meji ne: banjelu bonso badi ne mudimu wa muomumue to. (Buak. 14:17, 18) Vuluka ne: Nzambi wakapesha muanjelu umue patupu mudimu wa kubutula basalayi bena Ashû binunu 185. (2 Bak. 19:35) Kadi Nzambi udi mua kuikala mupeshe banjelu ba bungi mudimu wa ‘kumbusha mu Bukalenge bua [Yezu] bintu bionso bidi bilenduishangana ne bantu bonso badi bashipa mikenji.’ (Mat. 13:39-41) Udi mua kuikala mupeshe bakuabu mudimu wa ‘kusangisha basungula bende pamue’ mu diulu. (Mat. 24:31) Mmupeshe bakuabu kabidi mudimu wa ‘kutulama mu njila yetu yonso.’—Mis. 91:11; Mat. 18:10; fuanyikija ne Matayi 4:11; Luka 22:43.
Bidi bimueneka ne: “banjelu basungula” badibu batele mu 1 Timote 5:21 mbanjelu bavuabu bapeshe midimu ya pa buayi bua malu adi atangila tshisumbu tshia bena Kristo. Bilondeshile mvese idi kuulu, Paulo uvua ubela bakulu bua mudibu ne bua kuenza midimu yabu, uleja kabidi ne: bena mu tshisumbu badi ne bua kubanemeka. Bakulu badi ne bua kuenza midimu yabu kabayi ‘belelangana meji mabi anyi [kabayi] ne kansungansunga to.’ Kabena ne bua kuangata mapangadika lukasa lukasa kabayi bele meji bimpe to. Bualu bunene budi ne bua kubasaka bua kulonda mubelu wa Paulo budi ne: badi benzela bena Kristo nabu mudimu “kumpala kua Nzambi ne Kristo Yezu ne banjelu basungula.” Mbiumvuike bimpe ne: bamue banjelu badi ne mudimu wa kutangila tshisumbu tshia bena Kristo, bu mudi wa kutshikuba, wa kutangila mudimu wa diyisha, ne wa kupesha Yehowa luapolu lua tshidibu bamona.—Mat. 18:10; Buak. 14:6.