Udi mumanye anyi?

Ntshinyi tshivua bakuidi benza ne mashi a nyama ivuabu balambula mu ntempelo?

BAKUIDI ba mu Isalele wa kale bavua balambula nyama binunu bia bungi pa tshioshelu mu ntempelo tshidimu tshionso. Bilondeshile mumanyi wa malu a kale wa mu bidimu lukama bia kumpala, diende Josephus, mu tshibilu tshia Pasaka, bavua balambula bana ba mikoko bapite pa 250 000. Ke bualu kayi mashi avua apueka a bungi ku tshioshelu. (Lew. 1:10, 11; Nom. 28:16, 19) Bavua benza nawu tshinyi?

Bena malu a sianse kampanda bakasangana bintu bivuabu benze ku ntempelo wa mu tshikondo tshia Yezu bua mashi a nyama ikale apueka. Bakamona muaba uvua mashi apatukile, apueka, aya kule ne ntempelo.

Tuakulayi bua bintu bibidi bivua biambuluisha bua kulama tshioshelu tshikezuke:

• Tshina tshivua kuinshi kua tshioshelu: Mu mukanda mukuabu wa mikenji ne bilele bia bena Yuda wa panyima pa tshidimu tshia 200 mbumvuije muvuabu benze bintu abi bamba ne: ‘Kuvua bina bibidi ku ditumba dimue dia tshioshelu. Mashi a nyama ivuabu balambula ne mâyi avuabu batshisukula nawu avua apuekela mu bina abi, aya matangile mu tshibandabanda tshia Kidilona.’

  Mukanda mukuabu wa matuku etu aa udi pawu uleja ne: tshivua bakebuludi bapete atshi ntshilelela. Nunku bilondeshile bivuabu bamone, pamuapa bina bivua ku tshioshelu abi ke bivua mashi apuekela.

• Mâyi a bungi: Bakuidi bavua dijinga ne mâyi a bungi bua kukolopa kuinshi kua tshioshelu ne bua kupuekesha mashi bimpe. Bakuidi bavua bapetela mâyi au mu tshimenga. Bavua benze minkoloji ivua ifikisha mâyi ku tshioshelu aku. Bavua kabidi ne bina ne bintu bikuabu bia kulamina mâyi. Muena malu a sianse mukuabu, diende Joseph Patrich, udi wamba ne: “Bidi bimueneka ne: tshikondo atshi kakuvua ntempelo mukuabu bu au to, bualu bintu bivuabu benze bua kufikishaku mâyi ne kumbusha a manyanu bivua bia pa buabi.”