Endenu Neyi Antu Akwamaana
1 Hampinji Yesu yatambikiliyi ayibinda yanshi awaana nindi ekali atumbanji twindi, hiyashintajaliluku ilaña “hohenohu . . . hiyakumulonda.” (Mat. 4:18-22) Sawulu wakuTarusa niyena hampinji yamubalumwiniwu nakutachika kumona, hajinookeluku, “Hohenohu hakushimuna nsañu yaYesu mu[sinagogi].” (Yil. 9:20) Mpinji yatwalekañahu kuya kumbidi; chiyahita, yinahiti kunahu. Dimuloña waweni wutwatela ‘kwendela neyi antu akwamaana’ kutalisha hachitunakuzatisha mpinji yetu.—Efwes. 5:15, 16.
2 Kululakana Chayilulakenu: Mpinji yitukweti lelu yakumukalakela Yehova hekwawu kumadiki hitwakekala nayuku. (Yak. 4:14) Wonsu wetu twatalañanaña ‘nakululakana chayilulakenu.’ (Mukwa. 9:11) Cheñi, wonsu wetu tunakushinakaja, nawa muyinu nyaka yamakonu, hitukutwesha kutondolwela “mafuku atama” yitwatalañanaña nawu neyi hitukushinakaja nawa kwatwikañeshaña kuzata nañovu mumudimu waYehovaku. (Mukwa. 12:1) Dichi, bayi tushintajalaña hakudihana kudi Nzambi hela kuhembelela hakawahila yuma mwaka dinu twakazati chikupu mumudimu wetu wakushimwinaku. (Luka 9:59-62) Abarahama wadiña mukuwunda muyaaka yindi yawushinakaji, wafwili “kashinakaji wanyaka nanyaka” muloña wazatishili wumi windi chachiwahi, wadiheni chikupu kudi Yehova.—Kutach. 25:8.
3 Mpinji Yinakehi Dehi: Anetu nawa twatela kuzatisha mpinji yetu chiwahi muloña ‘mpinji yinashaliku yinakehi dehi.’ (1 Kor. 7:29-31) Katataka tuhu ayinu mpata yatama yimani. Mpinji yakukalakalaku mumudimu weneni wakupompesha antu adi neyi anyikoku ‘hakumuna yuma yaheseki’ yikakuma. (Chim. 14:15) Dichi twatela kubabala kuchina yuma yawumi wunu niyahuñumunaña yakenda katudyila mpinji yitwatela kuzatisha mumudimu wakushimwina. (Luka 21:34, 35) Chikatuletela muzañalu nankashi hakumona netu twadikitili chikupu mumudimu wakwañula!
4 Dichi twatela kwikala asoñama kulonda tuzateñaku nyidimu yayiwahi yitwatela kuzata. Dichi tufwilenu kumukalakela Yehova nañovu “hohanu hachidi kutenawu nawu, Lelu.” (Heb. 3:13) Neyi twila mwenimu, tukumwekesha netu tudi namaana chikupu, muloña “muntu welaña muchima waNzambi washakamaña haya nyaka.”—1 Yow. 2:17.