Twayilejaña Antu Kuchiñeja Kwetu kwaWanta
1 Munanu mafuku akala, antu amavulu mukaayi hiyakweti kuchiñejaku. (Efwes. 2:12) Amakwawu niwena anashindameni hamaheta, anyuli awantu, mujasayansi yamakonu, niyuma yikwawu. Wenowu muzañalu wutukweti hakwikala nakuchiñeja kwalala kwakumbidi, kuchiñeja “kwemikishaña wumi wetu, neyi chikuñu chakwimikisha nachu watu; kwalala, kwakola”!—Heb. 6:19.
2 Muchiyulu chaWanta waNzambi, iseki akadibalumuna kwikala paradisa. Antu yitwakeña afwa dehi akayisañula. (Yil. 24:15) Wuzweñi, kuluwalala, yikatu, wushinakaji, nikufwa kwakekala kwosi. (Mas. 9:18; Mat. 12:20, 21; Chim. 21:3, 4) Iyi diyi yikaninu yikwawu yaYehova yikukeña kushikijewa. Hakachi kayuma yitwachiñejaña, chumanyi chimwatalilaña chikupu nenu chikashikijewi?
3 Shimwinenu Nsañu Yayiwahi: Bayi tubula kulejaku amakwawu kuchiñeja kwaWantaku. Kukeña kutwamukeña Nzambi niakwetu kukutuletesha kumwimbujola Yesu ‘nikushimwina atuzweñi nsañu yayiwahi, . . . nikuyileja ankoli nsañu yakuyisubula, niamputamesu atoni; kulonda kuyumbaku antu anachikuwu.’ (Luka 4:18) Kapostolu Pawulu wadiña nakushimwina nsañu yayiwahi hayisankanu nikumaluña ejima kwadiña antu. Waswejeli kwikala neyena dakushimwina. (Yil. 18:5) Dichi kwimbujola chakutalilahu chindi chakushimwina namukoyi mumudimu chikukañesha “kwakama kwamakonu, nikudimbana kwamaheta” kwaluwañeshaña kuchiñeja kwetu kwawiniKristu.—Maku 4:19.
4 Kuchiñeja kwetu kwaWanta hikwazeyaña neyi tuhosha nawantu anabuli mpwila, abula kukeñesha nsañu yaWanta, hela atwikaanaña hatookaku. Dichi ‘twakakelaña kukwiteja kwakuchiñeja kwetu mbe, chakadi kuhumeka.’ (Heb. 10:23) Komana ‘hitwatiyaña nsonyi yansañu yayiwahuku.’ (Rom. 1:16) Dichi kukuhwelela kwetu chikupu nikukakela kukaletesha amakwawu kutambwila nsañu yayiwahi.
5 Hela chakwila chachiwahi kuhosha hayuma yamukaayi yinakutaminaku yinakushikija wuprofwetu waBayibolu, hitudi akwakushimwina wubanji wunakwinzaku. Ilaña, mudimu wetu washindamena hakuchiñeja kwetu kwaWanta, dikwila nawu nsañu yayiwahi yaWanta waNzambi. Dichi tushimwinenu iyi nsañu yayiwahi nachikuhwelelu nawa nampwila ‘kulonda tusweji kuchiñeja, ndo nikunsa.’—Heb. 6:11.