Chakudizisha Amaha Kushimwina
1. Mwatiyili ñahi ifuku dimwatachikili kushimwina?
1 Komana munakwanuka ifuku dimwatachikili kushimwina kwitala nikwitala? Chakadi kujina mwatiyili woma. Neyi mwazatili namuntu wayidizishileña Bayibolu hela mukwakushimwina mukwawu, mwatiyili kuwaha chayikwashiliyi. Chineli mwekala dehi akwakushimwina akuluka yitembi, dikwila nawa munashikuhu kudizisha amaha chakushimwina.
2. Yumanyi yatela kudizawu akwakushimwina amaha?
2 Akwakushimwina amaha atela kudiza chakutachika kuhanjeka namwiniitala, chakuzatisha Bayibolu, chakufuntilaku, nichakutachika nikudizisha enimatala Bayibolu. Atela cheñi kudiza chakushimwina munjila jashiyashana chidi neyi, kushimwina mumukwakwa nikushimwina kudi antu mumaluña akuzatila. Munateli kuyikwashaku kuzata chiwahi muniji njila kuhitila muchakutalilahu chenu nikuyileja mwakwilila.
3. Tunateli kukwasha ñahi amaha nachakutalilahu chetu?
3 Yidizishenu Kuhitila Mukumwekesha Chakutalilahu: Yesu wayidizishili atumbanji twindi kuhitila mukuyileja nikumwekesha chakushimwina. (Luka 8:1; 1 Pet. 2:21) Neyi munadikani kushimwina namukwakushimwina wamuha, loñeshenu chimwenu chapela chatela kwimbujolayi mukwakushimwina, hadaha mwatela kuzatisha chimwenu chidi munyikanda yetu. Kufumahu, mulejenu nenu mukusambila kushimwina mwiniitala wumu hela ayedi kulonda mukwakushimwina yamoni chimukushimwinaña. Neyi munafumi dehi hetala mwatela kumwihula mukwakushimwina yahoshuhu kutalisha hanjila yimwazatisha hakushimwina. Chumichi chikumukwasha kwiluka kulema kwakuzata nawantu amakwawu mumudimu wakushimwina nawa wukwitejaña yuma yidi yejima yimukumuleja neyi nashimwini dehi.
4. Tunateli kumukwasha ñahi mukwakushimwina wamuha neyi nashimwini dehi?
4 Yilejenu Njila Jakushimwinamu: Yesu niyena wayilejeli atumbanji twindi chakushimwina. (Mat. 10:5-14) Anenu nawa munateli kukwasha mukwakushimwina wamuha munjila yoyimu. Neyi nakushimwina, tiyililenu nakanañachima. Neyi himukuya munjila, muhamekenu chakufuma kumuchima hela chakwila munamoni hatela kuwahishayi. Henohu kanda mumuleji mwakwilila, mwatela kuhembelela kulonda mumoni neyi wukushimwina chiwahi hetala dikwawu. Hadaha watiya woma hohu. Anukenu cheñi nenu akwakushimwina akweti wuswa washiyashana, nawa cheñi kwekala njila jajivulu joloka jakushimwinamu.—1 Kor. 12:4-7.
5. Twatela kuhoshadi neyi tunakukeña kumuleja mukwakushimwina njila jakuzatisha?
5 Mpinji yikwawu mukwakushimwina wamuha nateli kuyihula njila jatela kuzatishayi hakushimwina. Neyi hanayihuluku mukwashenu. Munateli kumukwasha ñahi chakubula kumuhilisha? Akwakushimwina akuluka yitembi ehulaña ñane, “Watela kwiteja neyi nikuleja njila yakushimwinamu?” hela, “Indi yina njila yakushimwinamu yadiña ñahi?” Hadaha mwatela kuhosha nenu, “Hampinji yinadiñi mukwakushimwina wamuha, chadiña chankalila kwila . . . , ilaña chumichi chankwashaña. . . . ” Mpinji yikwawu neyi mutala munyikanda mwakuwana nsañu hamu chatela kuyikwasha. Hakwila nawu nsañu yimukumuleja yibuli kumuvulila, mulejenu hohu mwakwilila hanjila yimu yazatishayi.
6. Indi “chikuñu chahotolaña chikuñu” munjilanyi kutalisha hamudimu wakushimwina?
6 Chikuñu Chahotolaña Chikuñu: Timotewu, mukwakushimwina wakuluka yitembi amukolesheli kudi Pawulu kutwalekahu kusha muchima kukutañisha kulonda yayileñaku hambidi. (1 Tim. 4:13, 15) Hela chakwila mwatachikili kushimwina hayaaka haheni, mwatela kutwalekahu kuwahisha njila yimwatañishilañamu. Dizilenu kudi akwakushimwina imwashimwinaña nawu, chili tuhu abula kukuluka yitembi chikupu mumudimu wakushimwina, nawa ikalenu asoñama hakukwasha amakwawu, sweje-e amaha kulonda eluki chikupu chakushimwina nsañu yayiwahi.—Yish. 27:17.