Komana Mwamwekeshahu Dehi Chitwadizaña Bayibolu naWantu Halwendu Lwatachi?
Enimatala amakwawu neyi tuyileja netu tudizeña nawu Bayibolu, ahoshaña nawu hiyanakukeñaku hela nawu adizaña Bayibolu kuchaachi yawu. Chineli eluka wanyi nawu twadizaña Bayibolu munjila yambuka nansakililu jikwawu, eluka wanyi nawu kudiza Bayibolu hichuma chinateli kuyizañalesha. Dichi dinu, chatela mumuleji hohu muntu nenu mudizeña nindi Bayibolu, kwila mwikala najiminiti jantesha kulonda mumwekeshi chitwadizaña Bayibolu nawantu halwendu lwatachi nehi? Chakutalilahu: Chatela mumuleji muntu nenu mwatelekaña chachiwahi nawa munakukeña mwakamuleteli yakudya; mwinkenuhu yantesha yoyitompi hohenohu. Talenu chimwatela kwila mujiminiti jantesha hohu, kuzatisha njila yidi hefu 6 muMudimu Wetu waWanta waChibemba waJanuary 2006:
“Komana munakutoñojoka nenu kwakekala mpinji yamba kashikijewa awa mazu? [Tañenu Isaya 33:24, nawa mulekenu yaakuli.] Tali niyileji yuma yayiwahi kutalisha haniyi nsañu.” Mwinkenu mwiniitala mukanda waChatañishaña Bayibolu, nawa mulejenu yabakuli hefu 36 parakalafu 22. Tañenu lwihu ludi heshina defu, nawa mwilenu mwiniitala yawani ñakwilu chimukutañaña parakalafu. Kufumahu mwihulenu cheñi lwihu nawa tiyililenu chikwakulayi mwiniitala. Tañilenu cheñi hamu nsona jikwawu. Mwihulenu lwihu lumwakakula hakufuntilaku, nawa diloñeshenu chikupu mwakafuntiluku. Dikwila nawu munatachiki kudiza Bayibolu namwiniitala!