Yizatishenuña Mpinji Yejima
1. Tilakiti yaÑakwilu Yanawa Malwihu twatela kuyizatisha munjilanyi?
1 Tilakiti yinakuhosha nawu Komana Munakukeña Kwiluka Ñakwilu Yanawa Malwihu? ayisoneka kulonda yitukwasheña hakutachika kudizisha antu Bayibolu. Cheñi yinateli kutukwasha nankashi hakukuwa mbutu yansañu yalala. (Mukwa. 11:6) Talenu jinjila jinashimunuwu heshina jikutukwasha kuzatisha chiwahi iyi tilakiti.
2. Tunateli kuzatisha ñahi tilakiti hakutachika kuhanjeka?
2 Hakutachika Kuhanjeka: Munateli kumwinka mwiniitala iyi tilakiti, nikumuleja malwihu atanu nayimu adi hefu datachi, nawa mwihulenu nenu: “Hakachi kanawa malwihu, lwihu lumu ludihi lumwatoñojokahu dehi?” Chakulayi, mulejenu mwiniitala Bayibolu chiyinakuli lwihu lunehuliyi nawa tañenu nsona yimu yinashimunuwu muchibaaba. Tañenu hela mulumbulwilenu mukwihihisha yuma yidi hefu dakukumishaku, nawa mwinkenu mukanda waChatañishaña Bayibolu. Hela chakwila hanatambuli mukandaku, chakala natambuluku tilakiti, yikuleñela chalala chimushiki hamuchima.—Mat. 13:23.
3. Chumanyi chitwatela kwila neyi mwiniitala hakweti mpinjuku?
3 Neyi Mwiniitala Hakweti Mpinjiku: Munateli kuhosha nenu: “Chineli himukweti mpinjuku, nukuyishila hohu iyi tilakiti. Mudi malwihu alema atanu nayimu itwadihulahu dehi nawa yinalumbululi chikupu chahosha Bayibolu hakwakula awa malwihu. Chinakafunta, twakahanjeka hayuma yimunatoñojoki.”
4. Tunateli kuhosha netudi hakuhana tilakiti neyi tunakushimwina mumukwakwa?
4 Hakushimwina Mumukwakwa: Munateli kuhosha nenu: “Mudi ñahi mwani. Kwiji mwadihulahu dehi awa malwihu? [Mulekenu yaakuli.] Iyi tilakiti yinakushimuna ñakwilu yayiwahi yamuBayibolu.” Neyi muntu wudi nampinji, munateli kuhanjeka nindi hañakwilu yidi mutilakiti nikumwinka mukanda waChatañishaña Bayibolu.
5. Tunateli kuzatisha ñahi iyi tilakiti mpinji yikwawu hamatala hanabuli antu?
5 Neyi Hamatala Hosi Antu: Mumaluña amakwawu, akwakushimwina ashiyaña nyikanda hamatala hanabuli antu. Neyi dichimwelaña muchipompelu chenu, mpinji yikwawu munateli kushiya tilakiti yaÑakwilu Yanawa Malwihu. Hakufuntilaku munateli kuhosha nenu: “Chitwenjili, twayiwaninuhu wanyi, dichi twayishilili iyi tilakiti muchisu. Hadawa malwihu, lwihu ludihi lumukukeña nenu tulwakuli?”
6. Yumanyi yinaleteshi tilakiti yaÑakwilu Yanawa Malwihu yikali chitwa chachiwahi chakuzatisha hakushimwina?
6 Tilakiti yaÑakwilu Yanawa Malwihu yashimunaña nsañu yalala munjila yapela, nawa yatiyakana. Yashikaña hanyichima yawantu amusankililu niyisemwa yejima. Yaswayi kuhana; atwansi niakwakushimwina amaha anateli kuyihana. Komana munakuyizatisha mpinji yejima?