Munateli Kutachika Kudizisha Antu Bayibolu muOctober?
1. Indi muOctober tukahanañadi?
1 MuOctober tukahanaña magazini yaKaposhi Kakutalila niAwake! Hakufuntila kudi antu amwekeshili mpwila, anatuleji kuyinka tilakiti yinakuhosha nawu Komana Munakukeña Kwiluka Ñakwilu Yanawa Malwihu? nawa fwilenu kutachika kudiza nawantu Bayibolu. Hakufuntilaku tunateli kuhana ñahi iyi tilakiti?
2. Tunateli kuzatisha ñahi tilakiti yaKwiluka Ñakwilu hakutachika kudiza Bayibolu nawantu hampinji yakufunta nakutala muntu watambwili magazini?
2 Chitwatela Kuzatisha Tilakiti: Twatela kuhosha netu: “Magazini yinayishilili yinakukolesha antu akunyunza yejima ninsakililu kudiza Bayibolu. [Mwinkenu mwiniitala tilakiti yaKwiluka Ñakwilu, nawa mulejenu malwihu adi hefu datachi.] Awa diwu malwihu amawahi amakwawu akulawu chiwahi muBayibolu. Mwadihulahu dehi malwihu amuchidawa?” Mwiniitala chakulayi, tañilenu hamu ñakwilu yalwihu lwindi mutilakiti, nawa tañenuhu nsona yimu yinatenuwu. Kuhiñahu lumbululenu nenu ichi hichakutalilahu chimu chayuma yatañishaña Bayibolu, nawa mwinkenu mukanda waChatañishaña Bayibolu. Tunateli kuhanjeka maparakalafu atachi adi mukapetulu kanatondiyi hefu dayuma yidimu. Hela tunateli kuya hefu hadi nsañu yayivulu kutalisha hamutu wutwahanjekeluhu mutilakiti. Iyi diyi nyitu yitwatela kuzatisha:
● Komana chalala Nzambi watwakamenaña? (mafu 9-11, mapara. 6-10)
● Indi njita nimakabi amba kamana? (ifu 12, mapara. 12-13)
● Chumanyi chatwimwekenaña neyi tunafwi? (mafu 59-60, mapara. 7-8)
● Komana kuduhu kuchiñeja kudi kwejima kwawa afu? (ifu 71, mapara. 13-15)
● Nateli kulomba munjilanyi hakwila nawu Nzambi yantiyi? (mafu 166-167, mapara. 5-8)
● Nateli kuwana ñahi muzañalu muchihandilu? (ifu 9, mapara. 4-5)
3. Tunateli kuzatisha ñahi njila jashiyashana kwesekeja nayuma chiyidi?
3 Hela chochu, neyi kudi yuma yikutukañesha kutachika kumwekesha chakudiza mumukanda waChatañishaña Bayibolu hefuku datachi ditunafuntiluku, tunateli kudikana ifuku ditukafuntilaku nakutwalekahu kuhanjeka. Kwesekeja nampwila yikwetiyi owu muntu, tunateli kuhanjeka hamalwihu amavulu adi mutilakiti mpinji yejima yitukumwendela henohu kanda tumwinki mukanda. Tuzatishenu iyi tilakiti yayiwahi muOctober kulonda tutachiki kudizisha antu Bayibolu nikukwasha antu anyichima yayiwahi ‘eluki nsañu yalala.’—Yow. 8:31, 32.