Shimwinenuña ‘Antu Ejima’
1. Indi akwakushimwina akuluka yitembi ekala ñahi neyi mukwawukalawenu wakuluka yitembi?
1 Mukwawukalawenu wakuluka yitembi wekala nayozelu yayivulu, nawa weluka mpinji yatela kuzatisha chozelu chidi chejima nichatela kuchizatishayi. Anetu nawu tukweti yozelu yashiyañana yatela kutukwasha kuzata mudimu wetu neyi akwakushimwina. Chakutalilahu, asoneka mabuloshuwa ahosha hansañu yambokamboka atela kutukwasha kushimwina ‘antu ejima.’ (1 Kor. 9:22) Chamukachi chawunu Mudimu Wetu waWanta chikweti ndandanda yamabuloshuwa wenawa nawa analumbululi antu asonekeleluwu nichitwatela kuyihana kudi antu.
2. Mpinjinyi yitunateli kuzatisha mabuloshuwa mumudimu wakushimwina?
2 Mpinji Yitwatela Kuzatisha maBuloshuwa: Mukwawukalawenu wazatishaña chozelu chindi hampinji yatelela. Chochimu tunateli kuhana buloshuwa neyi twiluka netu yinateli kumukwasha muntu, bayi neyi mutukweji twakuhana iyi buloshuwa hohuku. Chakutalilahu, neyi tunakuhana mukanda waChatañishaña Bayibolu nawa tunakushimwina kudi muntu wabula kwikala mukwaKristu wudana mpwila yakutaña Bayibolu, chikuwaha neyi tumwinka buloshuwa yatelela nakuhembelela mpinji yikamwekeshayi mpwila mwaka dinu twakamwinkeña mukanda waChatañishaña Bayibolu neyi tunamukwashi dehi kwikala nampwila yakudiza.
3. Muloñadi wutwatelela kwiluka chakuzatisha yozelu yetu mumudimu wakushimwina?
3 Bayibolu yahamekaña antu adikitaña chiwahi nyidimu yawu. (Yish. 22:29) Chalala makonu kwosi mudimu wasweja kulema kubidika ‘mudimu wajila wakushimuna nsañu yayiwahi.’ (Rom. 15:16) Hakwila nawu twikali ‘akwakukalakala akadi hakutiyila nsonyi,’ tukufwilaña kwiluka chakuzatisha yozelu yetu.—2 Tim. 2:15.