Kwashenu Antu Amutiyilili Nzambi
1. Mabuloshuwa amu adi edishiluwu haKupompa kwaNkambi kwadiña nakwila nawu “Wanta waNzambi Winzi,” nawa chumanyi chaletesha ekali yozelu yayiwahi?
1 Hakupompa kwaNkambi kwadiña nakwila nawu “Wanta waNzambi Winzi,” edishili mabuloshuwa amaha ayedi, Mutiyililenu Nzambi Kulonda Mwakahandi Haya Nyaka, nibuloshuwa yasonekawu munjila yapela yahoshaña nawu Mutiyililenu Nzambi. Anateli kuyituntulula swayi-swayi muloña akweti mazu antesha. Kafwampi hampinji yedishiluwu buloshuwa yaMutiyililenu Nzambi Kulonda Mwakahandi Haya Nyaka ayitejeli kuyituntulula mumadimi 431.
2. Anyi akahetelamu munawa mabuloshuwa?
2 Anyi akahetelamu chikupu munawa mabuloshuwa? Shinshikenu iyi nsañu yinalondeluhu yamwekanaña mpinji yejima mukaayi kejima:
• Mukwakushimwina nakuhanjeka namwiniitala, chili halwendu lwatachi hela hakufuntilaku, hakwiluka nindi mwiniitala heluka kutañaku hela welukisha wanyi kutaña.
• Mukwakushimwina nakushimwina muntu wahoshaña idimi ditwatuntulula nyikanda yantesha hela ditwabula kutuntulula. Hela neyi antu amavulu mwiluña dakushimwina hiyatweshaña kutaña idimi dahoshañawu chiwahuku.
• Mukwakushimwina nakumushimwina kamama mwidimi dawatumama mwiluña dindi dakushimwina.
• Nvwali nakukeña mwanindi wanyanya wabula kwiluka kutaña yadizi nsañu yalala.
3. Indi buloshuwa yaMutiyililenu Nzambi ayisoneka ñahi?
3 Chasonekawu Nsañu Yidi Munawa Mabuloshuwa: Buloshuwa yaMutiyililenu Nzambi yikweti mazu antesha chikupu, kafwampi yikweti hohu mukuku wamazu apela niNsona yinatenuwu yinakuhosha hayikuma yayeni heshina defu. Muloñadi? Fwikijenu neyi muntu nayinki buloshuwa yasonekawu mwidimi dimwabula kwiluka kutaña, hadaha ninsona jidumu himwajilukaku. Komana mukuyitiya kuwaha hela chakwila yikweti nyevulu yayiwahi? Antu amavulu hiyakuyitiya kuwahaku. Chochimu, antu abula kwiluka kutaña hiyatiyaña kuwaha nyikanda yekala namazuku. Dichi chuma chinakumwekana nankashi hamafu ejima hinyevulu yinaloñeshuwu chiwahi nichinjikijilu chakuyilombola hakuhanjeka hamwevulu wumu nakuya hawukwawu.
4. Indi buloshuwa yaMutiyililenu Nzambi Kulonda Mwakahandi Haya Nyaka ayisoneka ñahi?
4 Buloshuwa yaMutiyililenu Nzambi Kulonda Mwakahandi Haya Nyaka yikweti nyevulu yoyimu neyi yaMutiyililenu Nzambi. Ayisoneka kulonda tuyizatisheña hakudiza nawantu abula kwiluka kutaña chiwahi hela anakudiza kutaña. Iyi buloshuwa anateli cheñi kuyizatisha kudi mukwakushimwina hakudiza namuntu wunakuzatisha buloshuwa yaMutiyililenu Nzambi. Hefu dejima dakuchimunswa, hewulu hadi lwihu lunakuluwu hakudiza kudi hamafu ejima ayedi. Hanyevulu yejima hadi cheñi mazu ninsona jinatenuwu. Hamafu amavulu hadi chikasha chikweti yikuma yikwawu niNsona yinatenuwu yimunateli kuhanjeka kwesekeja nawuswa wakadizi.
5. Tunateli kuhana ñahi awa mabuloshuwa nawa mpinjinyi?
5 Chakuyizatisha: Munateli kuhana mabuloshuwa ejima mumudimu wakwitala nikwitala neyi mumona nenu anateli kumukwasha muntu chili tunakuhana wanyi mabuloshuwa munoku kakweji. Munateli kuhosha hamabuloshuwa hampinji yimunakufuntilaku nakumuleja muntu wukweti mpwila nenu mukweti chuma chimunakukeña kumuleja, kufumahu mwinkenu buloshuwa.
6. Tukalombolaña ñahi atudizi aBayibolu kuzatisha awa mabuloshuwa?
6 Chineli buloshuwa yaMutiyililenu Nzambi hiyikweti malwihu asonekawuku, himunateli kuhanjeka neyi chimwahanjekaña hakudiza mumukanda waChatañishaña Bayibolu kuhanjeka kwamalwihu nañakwiluku. Antu akuyisemwa yejima atiyaña kuwaha kutiyilila mpanji. Dichi zatishenu nyevulu kulonda mushimuni mpanji yonenawu yasonekawu muBayibolu. Lumbululenu yuma yidi hamwevulu. Hoshenu namuzañalu. Mwihulenu kadizi yashimuni yuma yinakumonayi niyinakutoñojokayi. Tañenu nsona jidi heshina nawa hanjekenu nindi nsañu yinakuhosha nsona. Ihulenu malwihu kulonda kadizi yahosheñahu hakwila mwiluki neyi nachitiyi. Neyi nakuzatisha buloshuwa yaMutiyililenu Nzambi Kulonda Mwakahandi Haya Nyaka, tañilenu hamu mazu aduhu ninsona hampinji yimunakuhanjeka hanyevulu yejima.
7. Tunateli kukwasha ñahi kadizi wetu waBayibolu kuyilaku hambidi?
7 Mukwashenu Kadizi Kuyilaku Hambidi: Tunakuhweleli netu nsañu yimukuhanjekaña yikusañumuna mpwila yakadizi wenu kulonda yadizi chakutaña hakwila yadizeña hadi Yehova nkawindi. (Mat. 5:3; Yow. 17:3) Ilaña neyi mwadizaña mubuloshuwa yaMutiyililenu Nzambi, hadaha munateli kumudizisha kadizi chakutaña, nawa munateli kutachika kudiza mubuloshuwa yaMutiyililenu Nzambi Kulonda Mwakahandi Haya Nyaka. Hichikweti muloña nabuloshuwa yimunakuzatishaku, kadizi hakushikahu kupapatishewa chimwamanisha kudiza buloshuwaku. Mwatela kutachika kudiza mumukanda waChatañishaña Bayibolu hela mukanda wukwawu wukumukwasha chikupu kwiluka nsañu yamuBayibolu.
8. Muloñadi chitwasakililaña haniyi yozelu yayiha yakuzatisha mumudimu wakushimwina?
8 Antu atela kutiyilila kudi Mwanta wakuleña kwejima neyi akukeña kuhanda haya nyaka. (Isa. 55:3) Nawa Yehova wakeñaña nindi “antu ejima,” kushilahu niabula kwiluka kutaña, adizi chakumutiyilila. (1 Tim. 2:3, 4) Tunakusakilila chikupu haniyi yozelu yayiwahi yitunateli kuzatisha hakutañisha antu kulonda amutiyilili Nzambi.