Zatishenu Njila Yazatikaña Chiwahi
1. Yumanyi yitukudizila kunjila jambokamboka jazatishileñawu akwaKristu akusambila?
1 AkwaKristu akusambila ashimwinineña nsañu yayiwahi kudi antu akuyisemwa ninsakililu yashiyashana. (Kol. 1:23) Hela chakwila ashimwinineña nsañu yoyimu, Wanta waNzambi, azatishileña njila jambokamboka kwesekeja nawantu ashimwinineñawu. Chakutalilahu, Petulu chahosheliyi nawaYudeya alemesheli Nsona, wasambilili kutena nsañu yakaprofwetu Yoweli. (Yil. 2:14-17) Kwambukaku, shinshikenu Pawulu chahanjekeliyi nawaGriki neyi chasonekawu haYililu 17:22-31. Makonu, antu mumaluña amakwawu akushimwinamu alemesha Nsona, nawa tunateli kutaña Bayibolu chakubula kukala neyi tunakushimwina kwiitala nikwiitala. Hela chochu, twatela kwikala ababala neyi tunakushimwina antu abula kulemesha Bayibolu ninsakililu hela ekala munsakililu yabula kwikala yawakwaKristu.
2. Tunateli kuzatisha ñahi nyikanda yakuhana hakukwasha antu alemesha Bayibolu niantu abula kuyilemesha?
2 Zatishenu Chiwahi Nyikanda Yakuhana: Nyikanda yakuhana muchinu chaaka chamudimu yikuhimpaña hanyima yatukweji tuyedi nawa tukuhanaña magazini, matilakiti nimabuloshuwa. Hela chakwila antu amwiluña detu alemesha wanyi Bayibolu, tunateli kuhanjeka nawu nsañu yakeñawu. Hitunateli kutaña nsona halwendu lwatachi hela kuhosha haBayiboluku, ilaña neyi namwekeshi mpwila tunateli kufuntilaku kulonda tumukwashi mwiniitala kumukuhwelela Nleñi Niizu dindi donenawu. Ilaña neyi tunakushimwina antu alemesha Bayibolu, tunateli kuzatisha nyikanda ninjila yikuyisañumuna. Kafwampi tunateli kuyinka mukanda waChatañishaña Bayibolu hela buloshuwa yaMutiyililenu Nzambi hela Mutiyililenu Nzambi Kulonda Mwakahandi Haya Nyaka kala mpinji, hela tunakuhana nyikanda yacheñi munowu ñondu. Chakala tunazatishi njila yazatikaña chiwahi.
3. Indi nyichima yawantu amwiluña detu dakushimwina yekala ñahi neyi maseki?
3 Loñeshenu Maseki: Muchima wamuntu wudi neyi maseki. (Luka 8:15) Maseki amakwawu akeñekaña kuyiloñesha chikupu henohu mbutu yansañu yalala yamuBayibolu kanda yitachiki kumena nakukula. Akwakushimwina amuyaaka nkulakaji yakusambila atumbili mbutu mumaseki ejima, nawa chumichi chayizañalesheli. (Yil. 13:48, 52) Anetu nawa tunateli kwikala namuzañalu neyi tuzatisha njila yazatikaña chiwahi.