Kuwahisha Njila Jetu Jakushimwinamu—Kusoneka Antu Anamwekeshi Mpwila
“Dihembi eyi aweni, wuhembi kuleja kuwalejaña akwenu.” (1 Tim. 4:16) Iku kufumba kwonenawu kwamufumbiluwu Timotewu kudi Pawulu kwamwekeshaña nawu twatela kuzata nañovu kulonda tuyileñaku hambidi hamu neyi akwakushimwina, hela chakwila tudi amaha hela tunashimbuli. Hakwila nawu twileña mwenimu, muMudimu Wetu waWanta mukwikalaña chibaaba chachiha chidi namutu wakwila nawu “Kuwahisha Njila Jetu Jakushimwinamu.” Chibaaba chidi chejima chikuhoshaña hayuma yalema, yitwatela kwiluka ninjila jitukulondelaña. Mukakweji kejima, wonsu wetu twatela kushaku kashinshi kulonda tukayizatisheña. Hakumana kwakakweji, muKupompa kwaMudimu mukekalaña mpanji yitwakashimunaña chitwaheteleli muniyi njila nikushimuna yuma yayiwahi yamwekeni. Munonu kakweji anatukoleshi kusoneka antu akumwekeshaña mpwila.
Kwalemenadi: Hakwila nawu tuzati mudimu wetu, kudi yuma yikwawu yitwatela kwila kubadika kushimwina hohu. Twatela kufuntila kudi antu amwekeshaña mpwila, nikuyidizisha kulonda tutukumwini mbutu yachalala yitwatumbili. (Mat. 28:19, 20; 1 Kor. 3:6-9) Ichi chakeñekaña kwiluka kwashakamañayi muntu, kuhanjeka hayuma yinakutoñojokayi, hakwila tutwalekuhu kuhanjeka hansañu yitwahanjekeluhu hakusambila. Dichi, neyi tuwana muntu wudi nampwila chalema nankashi kusoneka nsañu yinakundami kudi owu muntu.
Yuma Yimwatela Kusoneka:
• Mwatela kwiluka nenu munasendi yuma yinakukeñeka mwipakumuna denu dimwazatishaña mumudimu wakushimwina kulonda musoneki antu anakumwekesha mpwila. Mwatela kuhemba chiwahi nsañu yimukusoneka. Chimwakumisha kuhanjeka namuntu sonekenu hohenohu.
• Sonekenu nsañu yinakundami kudi mwiniitala. Ijina dindi, keyala, ninaambala yashiña ni e-mail yindi. Yumanyi yalema yimunamoni hadi owu muntu nichisaka chindi? Wukweti anyana? Kuduhu muntu wakata muchisaka chindi?
• Sonekenu yuma yimunahanjekuhu. Nsonanyi yimwataña? Wahosha nindidi hayuma yakuhwelelayi? Mwamushila mukandanyi? Sonekenu mpinji niifuku dimwamwendela munowu mulungu.
• Sonekenu yuma yimunakufwila kwila chimwakafuntilaku. Mwamukanini nenu mukahanjeka hansañwinyi? Mwahosheli nenu mwakafuntilaku ifukwinyi?
• Mpinji yejima yimukufuntilaku sonekelenuhu nsañu yikwawu. Kutiya kukala nehi neyi musoneka nsañu yayivulu.
Esekenu Kuzatisha Iyi Njila Mukanu Kakweji:
• Hakusoneka nsañu mulejenu mukwenu imunakuzata nindi nsañu yimunakusoneka.