Mwatela Kutukumwina Hambutu Kulonda Jikuli Chiwahi
1. Yumanyi yitwatela kutukumwina kulonda yikuli chiwahi?
1 Mbutu jatumbañawu mwitempa atela kujitukumwina kulonda jikuli chiwahi. Dichitwatela kwila neyi tunatumbi mbutu yachalala munyichima yawantu adi mwiluña detu dakushimwina. (1 Kor. 3:6) Twatela kufuntila kudi antu itwahanjekeli nawu nakutukumwina mbutu jachifwikija kuzatisha Izu daNzambi neyi tunakukeña netu apami nikusoña nyikabu.
2. Tunateli kumukwasha ñahi mwiniitala kulonda yakeñi yuma yitwakahanjeka neyi tunafunti?
2 Ihulenu Lwihu: Neyi himukuloñesha nsañu yakuhanjeka namuntu, komana kwila muloñesha lwihu lwaluwahi lumwakakula neyi munafuntuluku cheñi nehi? Mwatela kumwihula neyi munamanishi dehi kuhanjeka nindi hanjila yatachi, nawa tiyañanenu mpinji nifuku dimwakafunta. Amavulu azatishaña nsañu yidi mumukanda waChatañishaña Bayibolu kulonda akatachiki kudiza nawantu Bayibolu.
3. Neyi himukusoneka yuma yamwekana halwendu lwatachi, nsañwinyi yikwawu yimwatela kusoneka?
3 Sonekenu: Neyi munafumi dehi hetala dindi, sonekenu yuma yejima yimunahanjeki nindi. Sonekenu ijina dindi nikeyala. Mwatela cheñi kusoneka ifuku, mpinji yimunahoshi nindi, nsañu yimwahanjeka nimukanda wumunamushili. Wayileja nindi wayaña kuchechi? Wukweti chisaka? Nayileji yuma yakeñayi nikukala kunakumonayi? Neyi mwiluka yuma yejimiyi, chikayikwashaku kuhanjeka hansañu yalemeshayi ifuku dimwakafuntilaku. Mwatela kusoneka cheñi ifuku dimunaditeji kufunta nilwihu lumukahanjeka.
4. Muloñadi chitukubulila kuzeya neyi hitukufunta nakudimona namuntu wamwekesheli mpwila?
4 Bayi Muzeyaku: Satana wukutwalekahu kwimika mazewu kulonda ‘yafumishi mazu’ itwakuwaña munyichima yawantu. (Maku 4:14, 15) Dichi bayi muzeyaku neyi mubula kuwana muntu wamwekesheli mpwila yakudiza hetala. Komana kwila mutemesha mukanda hela kusha kachipapilu mwishina dachenzelu nehi? Payiniya wumu watachikili kudiza Bayibolu namumbanda wumu hetala ilaña chafuntiliyi cheñi, kuwana chekeli kambolu, dichi wamutemesheleli mukanda. Ifuku damuwaniniyi hetala, iwu mumbanda wahamekeli chikupu hakukeña kwamumwekesheleliyi. Neyi tutukumwina mbutu jansañu yalala, tukuzañalala hakumona chinakupamawu kuspiritu ‘nakusoña awa makumi asatu, awa makumi atanu nadimu, awa nkulakaji.’—Maku 4:20.