Mpinjinyi Yitwatela Kufuntila Kudi Antu Amwekesheli Mpwila yaKudiza Bayibolu?
1. Yumanyi yabombela mukwilisha atumbanji?
1 Mukwilisha atumbanji mwabombela kufuntila kudi antu ejima amwekesheli mpwila yakudiza nsañu yaWanta waYehova. (Mat. 28:19, 20) Kakavulu mpinji yayiwahi yitwatela kufuntilaku yashindamenaña hanyidimu yitukweti niyikweti muntu wamwekesheli mpwila yakudiza. Muloñadi wutwatela kunyakala kufuntila kudi antu amwekesheli mpwila yakudiza?
2, 3. Muloñadi chitwatela kufuntilaku swayi-swayi?
2 Muloñadi Wutwatela Kufuntilaku Swayi? Mudimu wakushimwina “nsañu iyi yawanta yayiwahi” keña wukumi, nikukuma kwayuma yamakonu kudi dehi kwakwihi. (Mat. 24:14; 1 Pet. 4:7) Chineli antu akweti mpwila yakudiza achidi kushakama ‘mwiifuku dawamwinu,’ twatela kutiyilila kufumba kwakushimwina ‘izu nakunyakashana.’ Chumichi chinabombelumu kufunta swayi kudi antu amwekesheli mpwila kulonda tuyisañumuni.—2 Kor. 6:1, 2; 2 Tim. 4:2.
3 Satana nakufwila chikupu kufumisha mbutu yaWanta yitwakuwaña mumuchima wamuntu wukweti mpwila. (Maku 4:14, 15) Kakavulu, antu akweti mpwila ayisehaña kudi antaña jawu, akwawu mwazatilañawu, niantu amakwawu. Neyi tufuntilaku swayi tunateli kumukwasha muntu wunamwekeshi mpwila yakudiza kutwalekahu henohu amakwawu kanda ajimi iyena dikwetiyi.
4. Tunateli kwala ñahi chikuku halwendu lwatachi kulonda twakafuntiluku?
4 Tiyañanenu Ifuku daKufuntilaku: Chachiwahi kutiyañana ifuku dakufuntilaku neyi munakumishi dehi kuhanjeka namuntu halwendu lwatachi. Mwihulenu lwihu lumwakakula hampinji yimwakafunta. Mwatela kusoneka wunsahu wejima. Neyi himukweti nyidimu yayivuluku, munateli kumuleja kulonda mwakafunti kwiifuku dikwawu hela chakubula kuhitishamu mafuku amavulu. Neyi mwamwendela muntu kunsa yamulungu nawa muntu yenowu wazataña mukachi kamulungu, hadaha nateli kwiteja kumwendela kunsa yamulungu wukalondelahu. Neyi munatiyañani ifuku bayi mwakajiñaku.—Mat. 5:37.
5. Indi kufuntilaku swayi kukutukwasha ñahi kushikija lushimbi lwaYesu lwakwilisha atumbanji?
5 Dichi tunamoni yuma yikutuleñela kufuntila swayi-swayi kudi antu amwekesheli mpwila yakudiza. Dichi, tiyañanenu ifuku nawa funtilenuku swayi, muloña ‘mpinji yinashaluku yinakehi dehi.’ (1 Kor. 7:29) Neyi tufuntilaku swayi kudi antu amwekesheli mpwila yakudiza nsañu yaWanta, chakadi kujina ñovu jetu hijakaya mumenjuku.