Bayibolu Yinateli Kunkwasha Ñahi?

WADI KWILA ÑAHI?

Fwikijaku chumichi: Kayombu nakwendesha motoka mwiluña mwabula kwilukayi. Yinjikijilu yamumukwakwa yinakumwekesha nawu najimbali. Kayombu hakwiluka nindi najimbali. Hadaha hadiña nakwinzayi, wajimbala njila nakuzatisha njila yacheñi.

Neyi yeyi wadiña Kayombu, wadi kwila ñahi?

SAMBILAKU KUTOÑOJOKAHU!

Wunateli kwikala nanjila jajivulu jakwililamu:

1. Kwihula kulonda akuleji njila.

2. Kutala hamapu hela kuzatisha ikina dakwiluka nachu iluña.

3. Kutwalekahu kwendesha, nakukuhwelela neyi kumbidi wukuwana njila.

Chakadi nikujina, njila yamuchisatu yikuzatika wanyi chiwahi.

Njila yamuchiyedi, yinateli kuzatika chiwahi kubadika njila yatachi. Nawa wukwikala namapu hela ikina dakwiluka nachu maluña muchikasa cheyi munjila mwejima muwukuyaña nawa yikukulombolaña kuwunakuya.

Munjila yoyimu, Bayibolu yinateli kukukwasha!

Iwu mukanda welukawu nankashi nawa walandishañawu chikupu wunateli

• kukulombola mukukala kuwukumonaña muchihandilu cheyi

• kukukwasha kudiiluka eyi aweni nikwikala muntu wamuwahi

• kukuleja chiwunateli kwikala nachihandilu chachiwahi

KWAKULA MALWIHU ALEMA AMUCHIHANDILU

Twehulaña malwihu kufuma tuhu hampinji yitwatachikaña kuhosha.

• Muloñadi iwulu chidamwekenaña bulu?

• Indi tutumbwa atuleñeli nanka?

Kuhiñahu, twatachikaña kwihula malwihu hayuma yinakumwekana mukaayi.

• Muloñadi yuma yatama chiyamwekenaña?

• Muloñadi antu chafwilañawu?

Mukwila ñahi neyi chakwila ñakwilu yanawa malwihu ejima yekala muBayibolu yaaka yejima?

Antu amavulu ahoshaña nawu muBayibolu mwenzala tuheka ninsañu yakushankulu, yakwila yinashimbuli nankashi hela yakala kutiyishisha. Komana Bayibolu diyi yikweti kukala tahindi kukala kudi hayuma yatiyawu antu kutalisha haBayibolu? Tahindi ayilejeli nsañu yakutwamba?

Chakutalilahu, antu atoñojokaña nawu Bayibolu yahosha nawu Nzambi diyi wayuulaña kaayi. Chumichi chikuzatika ñahi? Kanu kaayi kanasweji kutaminaku! Munenzali kuneña nikukabakana, yikatu nikufwa, wuzweñi nikukala kwadimwekenaña. Hanu dinu, Nzambi wukweti kukeña nateli kuleta ñahi kukala kwejimiku?

Wukukeña kwiluka ñakwilu? Wukuhayama nankashi neyi wiluka nsañu yahosha Bayibolu kutalisha hadi wunakuyuula kaayi!

Hadaha wunamoni neyi kufumba kudi muyinu buloshuwa kunashindameni haBayibolu. A Yinsahu jaYehova eluka chikupu nawu muBayibolu dimwafumaña wunlomboli walala. Muloña “ayonena kudi Nzambi nawa yawahila kudizisha nachu, kuzuwila nachu, kwolola nachu.” (2 Timotewu 3:16, 17) Watela kuwutaña iwu mukanda wasonekeliwu kunyaaka ilaña wunakuzatika nimakonu!