KUDIZA 02

Bayibolu Yatukwashaña Kuchiñeja

Kakupulinta

Antu mukaayi kejima anakumona kukala kunakuyiletela chineñi, kwakama nikuyeña. Mwamonahu dehi kukala kwayiletesheli kutiya muniyi njila? Hadaha munakukabakana muloña wayikatu indi kwiji muloña wakufwisha ntaña yenu. Hadaha munakutoñojoka nenu, ‘Komana yuma yamba kawaha?’ Bayibolu yaakula ilu lwihu.

1. Bayibolu yatulejaña nawu chihandilu chakekala ñahi kumbidi?

Bayibolu yatulejaña chinaswejeli yihuñu mukaayi nawa yatulejaña cheñi nsañu yayiwahi nawu kukala kwejima kutunakumona kwakapinji kantesha nawa keña kumani. Yuma yashiika Bayibolu yinateli “[kuyinka] mbidi yayiwahi nikuchiñeja.” (Tañenu Yeremiya 29:11, 12.) Iyi yikaninu yatukwashaña kuumika kukala kutunakumona makonu nikwikala namuzañalu chayinu mpinji nawa yatulejaña nawu twakekala namuzañalu haya nyaaka kumbidi.

2. Bayibolu yashimuna nawu yuma yakekala ñahi kumbidi?

Bayibolu yashimuna nawu kumbidi “[kufwa] hikwakekalaku cheñiku, hikwakekala cheñi kudishona, kudila hela kuyeñaku.” (Tañenu Chimwekeshu 21:4.) Kukala kwaleteshaña antu makonu kukabakana kudi neyi wuzweñi, wuñanji waheña, yikatu nikufwa, kwakekalaku wanyi. Bayibolu yashiika nawu antu akashakamaña haya nyaaka muParadisa hamaseki.

3. Chumanyi chikuyikwasha kukuhwelela nenu yuma yashiika Bayibolu yikashikijewa?

Antu amavulu akuhwelelaña kumona yuma yayiwahi, ilaña eluka wanyi neyi chakwila iyi yuma yikamwekana. Ilaña yuma yashiika Bayibolu yaambukaku. Tunateli kukuhwelela yuma yejima yahosha Bayibolu kuhitila ‘mukutalatala muNsona nakanañachima.’ (Yilwilu 17:11) Chimukudizaña Bayibolu, mukutondahu enu aweni neyi munateli kukuhwelela yuma yahosha Bayibolu hayuma yikamwekana kumbidi hela nehi.

SANDUJOLENU CHIKUPU

Talenu yuma yimu yashiika Bayibolu nawu yikamwekana kumbidi. Talenu yuma yashiika Bayibolu chiyinakukwasha antu makonu.

Nyevulu: Nyevulu yinakumwekesha chaambu chidi hakukala kunakumonawu antu makonu nachikekala chihandilu kumbidi neyi chashimuna Bayibolu. Iyi nyevulu anayimwekeshi cheñi heshina.

4. Bayibolu yatushiika nawu twakashakama haya nyaaka chakadi kukabakana

Talenu iyi yikaninu yashimunawu muBayibolu. Yikaninu yimu yidihi yimwakeña nankashi? Muloñadi?

Tañenu nsona jinashimuniwu haniyi yikaninu nawa akulenu awa malwihu:

Munakutoñojoka nenu iji nsona jikuyikwasha kwikala nakuchiñeja? Jinateli kukwasha chisaka chenu niamabwambu jenu kwikala nakuchiñeja?

Fwikijenu munakushakama mwituña mwakwila

KWOSI MUNTU . . .	ANTU EJIMA . . .
wakatiyaña kuyeña, wakazeboka nawushinakaji hela wakafwaku.—Isaya 25:8.	akamona antaña jawu afwili anayisañuli, akekala cheñi amomi heseki.—Yowanu 5:28, 29.
wakakataña hela wakekala chifwayiku.—Isaya 33:24; 35:5, 6.	akekala akola kumujimba ninañovu jawukwenzi.—Yoba 33:25.
akaheñeshelañawu wuñanjiku.—Isaya 32:16, 17.	akekala nayakuda yayivulu, matala amawahi, ninyidimu yayiwahi.—Isamu 72:16; Isaya 65:21, 22.
wakakabakanaña muloña wanjitaku.—Isamu 46:9.	akashakamaña mukuwunda kwakweni.—Isamu 37:11.
wakanukaña yuma yatamaku.—Isaya 65:17.	akashakamaña chiwahi haya nyaaka.—Isamu 37:29.

Mwana wadiña wakata nakoli nawa namukumbati mama yindi.

Iyala wadiña kashinakaji nafunti kuwukwenzi nawa nakushinjika wilubala mudi yakuda.

5. Yikaninu yamuBayibolu yinateli kutukwasha kwikala ambukaku

Antu amavulu anakuneña nikuhila muloña wakukala kunakumonawu. Amakwawu anakuzata nañovu nawu awahishi yuma. Talenu chikaninu chamuBayibolu chakwila nawu yuma yakawaha chichinakukwasha antu makonu. Vumishenu VIDIYO, kuhiñahu hanjekenu hamalwihu analondelihu.

VIDIYO: Nakeñeleña Kwolola Yuma (4:07)

Nyevulu: Nyevulu yinafumi muvidiyo yinakwila nawu ‘Nakeñeleña Kwolola Yuma.’ 1. Rafika nakwanda wanda nawantu akumuchidi windi hachidiyi kansi. 2. Rafika nazañalali hakumona antu akunyichidi yashiyashana chinakuhanjekawu hanayiyi katachi kukupompa kweneni kwaYinsahu jaYehova.

Muniyi vidiyo, yumanyi yamuneñesheleña Rafika?
Hela chakwila yuma yamuneñesheleña yamanini wanyi, Bayibolu yamukwashili ñahi?

Kuchiñeja kwashimunawu muBayibolu hayuma yakumbidi kwatukwashaña kubula kusweja kwikala nachineñi nawa kwatukwashaña kuumika kukala. Tañenu Yishimu 17:22 niARoma 12:12, kuhiñahu hanjekenu hanawa malwihu:

Munakutoñojoka nenu nsañu yakuchiñeja yidi muBayibolu yinateli kuhimpa chihandilu chenu makonu? Muloñadi?

AMAKWAWU AHOSHAÑA NAWU: “Yikaninu yamuBayibolu yakashikijewa wanyi.”

Chalemenadi kukeñakeña enu aweni kulonda mwiluki wunsahu?

YUMA YIMUNADIZI

Bayibolu yatukwashaña kuchiñeja nikuumika kukala kuhitila mukutuleja yuma yayiwahi yidi kumbidi.

Kuhitulukamu

Muloñadi antu chatela kwilukilawu yikaninu yaNzambi?
Bayibolu yahoshahu nawudi hayuma yikamwekana kumbidi?
Kuchiñeja yuma yakumbidi kunateli kuyikwasha ñahi makonu?

Namanishi iku kudiza dalelu ha:

Yuma Yimukwila

Ilukenu yikaninu yamuBayibolu kuhitila mukutaña mavasi adi mukunu kudiza.

Yikwawu:

Your other goal

ILUKILENUHU NSAÑU YIKWAWU

Dizenu mwiluki kuchiñeja chikunateli kuyikwasha neyi munamoni kukala.

“Finshi Fingamwafwa Ukuba ne Subilo?” (Loleni!, April 22, 2004)

Talenu kuchiñeja yuma yakumbidi chikunateli kukwasha antu adi nayikatu yabulaña kumana.

“Yikatu Yabulaña Kumana—Komana Bayibolu Yinateli Kuyikwasha?” (Chibaaba chahaIntaneti)

Chimukutalaña iyi vidiyo yatumina, difwikijenu enu nichisaka chenu mudi muParadisa yakanawu muBayibolu.

Fwikijenu Iyi Mpinji (3:37)

Tañenu nsañu yamuntu wakeñeleña kwolola yuma chahimpiliyi chihandilu chindi chelili adizi chahosha Bayibolu hayuma yakumbidi.

“Hinnakutoñojoka Cheñi Nami Natela Kuhimpa Yuma muKaayiku” (Kaposhi Kakutalila, July 1, 2013)