Ilenu Ayikwashi Kutiyisha Bayibolu

Fwikijenu munayi kwituña kumwabulahu dehi kuya. Mukuwana antu, tushidikilu, yakudya nimali azatishañawu chakwila kanda muyimoneñahu dehi. Mukuneña nankashi.

Dichi mukutiya neyi dikatachi kutaña Bayibolu. Hampinji yimunakutaña mukuwana nsañu yawantu akushankulu imwabula kwiluka. Mukuwana antu atenañawu nawu aFwilistinu, cheñi mukuwana chisemwa chawantu ‘ataboleleña yakuvwala,’ hela mukwiluka yakudya yateneneñawu nawu manina nimali amawayawaya atenañawu nawu dirakima. (Kwidika 16:31; Yoshuwa 13:2; 2 Samweli 3:31; Luka 15:9) Yuma yejimiyi yikuyitiyisha kutama. Chochimwatiyaña neyi muya kwituña dacheñi, mwatiyaña kuwaha neyi kudi muntu wunakuyilumbulwila yuma yimwabula kwiluka, netu?

CHAYIKWASHILUWU KUNYIMA

Kufuma hampinji yatachikiluwu kusoneka nyikanda yajila munkulakaji yayaaka 16 B.C.E., antu ayikwashileña kutiyisha chahosha nsañu nsona. Chakutalilahu, Mosi nlomboli watachi wamutaña wawaIsarela, ‘washimwini’ nshimbi yasonekeluwu.—Kuhituluka 1:5.

Antu adizishileña akwawu nsañu yamuNsona achidiña kwoku hanyima yankulakaji yayaaka ikumi. Mu 455 B.C.E., izanvu deneni dawaYudeya, kushilahu niatwansi amavulu apompeli mulubanza mumusumba waYerusalema. Akwakudizisha akwawu Bayibolu ‘atañileña nezu datiyakana mumukanda [wajila].’ Azatili nañovu chikupu. ‘Ayikwashili antu kutiya nsañu yatiyileñawu.’—Nehemiya 8:1-8.

Chihahitili yaaka nkulakaji yitanu, Yesu Kristu niyena wazatiluku iwu mudimu wakutañisha. Kafwampi, antu amwilukili nawu ntañishi. (Yowanu 13:13) Wadizishili mazaza awantu, kushilahu tuhu nimuntu wumu wumu. Hampinji yimu, wahanjekeli nezaza deneni, wahanini mpanji yaya Mpuhu yahaMpidi nawa ‘mazaza awantu ahayamini kuleja kwindi.’ (Matewu 5:1, 2; 7:28) Muchaaka cha 33 C.E., Yesu wahanjekeli nawatumbanji twindi ayedi hampinji yayileñawu kumukala wekala kwakwihi naYerusalema, ‘wayilumbulwilili chikupu’ Nyikanda Yajila.—Luka 24:13-15, 27, 32.

Atumbanji twaYesu niwena adiña akwakulumbulula Izu daNzambi. Hampinji yimu, kalama kamwanta wakuEtiyopiya wadiña nakutaña nsañu yamuNyikanda Yajila. Kambanji Fwilipu hakumuwana nakumwihula nindi: “Chiwudi nakutaña chinakulumbulukili, tahindi? Kuchinka yena kalama nindi, Chikunlumbulukila ñahi chakadi muntu kunleja?” Dichi, Fwilipu watachikili kumulumbulwila nsañu yadiña nakutañayi.—Yililu 8:27-35.

WUKWASHU WUDI KWOKU NIMAKONU

Kufwana antu akunyima adiña nakulumbulula nikutañisha akwawu nsañu yamuBayibolu, aYinsahu jaYehova niwena makonu azataña mudimu wakudizisha nsañu yamuBayibolu mumatuña 239 mukaayi kejima. (Matewu 28:19, 20) Mulungu nimulungu akwashaña antu akubadika ha 9 miliyoni kutiyisha Bayibolu. Antu amavulu adizishañawu hiyafuma muyisaka yawakwaKristuku. Iku kudizisha kwekala kwawana nawa anateli kuyidizishila hetala denu hela kwiluña dimukutonda. Amakwawu adizaña kuzatisha nshiña hela vidiyo, kompyuta hela chozelu chakusenda kumakasa.

Mwani ihulenu Chinsahu chaYehova wudi wejima kulonda yayileji chimunateli kuhetelamu muniyi ntanjikilu. Munateli kwiluka nenu, himukanda wunateli kutiyawu antu, Bayibolu “yawaha kuleja nachu, nikutanyisha nachu, nikwolola nachu, nikufumba nachu mwaloña,” kulonda muntu “waNzambi awanini chikupu, awahili nyidimu yayiwahi yejima.”—2 Timotewu 3:16, 17.