Bayi Muvulamena Azeyaku
1. Muloñadi wutunakufwila kukolesha ana anazeyi?
1 Komana mwelukahu muntu wunazeyi? Hekwawu waleka dehi kwinza nakupompa kuchipompelu nawa wapwapuka dehi. Hadaha mwahoshahu dehi namuntu wamuchidiwu hampinji yimwadiña nakushimwina kwitala nikwitala. Twatela kwiluka netu iwu muntu wazeya wuchidi mana kwetu wakuspiritu. Twatela kumumwekesha kukeña kwetu nikumukwasha kulonda yafunti muchipompelu nikudi ‘kabiña mukwakuhemba wumi wetu.’—1 Pet. 2:25.
2. Tunatweshi kukolesha ñahi wazeya?
2 Mwekeshenu Kwakamena: Kuhosha nindi hanshiña mukapinji kantesha hela kumuhempula kukuleñesha wazeya kutoñojoka nindi hitwamuvulamenaku. Tunatweshi kuhosha netudi? Tunateli kumukolesha muntu kuhitila mukumuleja netu twadiña nakutoñojoka hadi yena. Mpanji chiña yikala yakuzañalesha nawa yakukolesha. (Fwi. 4:8) Hekwawu tunateli kuhosha hachikuma chatutiyishili kuwaha hakupompa kwakatataka. Twatela kumutambika cheñi kwinza kukupompa kwachipompelu kukalondelahu hela kwañinza nakumushila hakushakama hela kumwinka mali akwendela.
3. Indi muhela wumu amukolesheli ñahi cheñi?
3 Muhela wumu wadiña wazeya kubadika hayaaka 20 amuwanini mwiluña dakushimwina. Hela chakwila, hakeñeleña kudiza kwaBayiboluku, muhela wamuwanini watwalekeluhu nakumuhempula, nakumushilaña magazini yakatataka. Hanyima yakupompa kwankambi, mukwakushimwina wahanjekeli nindi yikuma yahakupompa kwankambi, nkumininaku ona muhela wazeyeli wakoleli cheñi.
4. Twatela kumumona ñahi muntu wunatachiki cheñi kudikunda nachipompelu kuhitila mukuwanika kukupompa?
4 Neyi Wazeya Nafunti: Neyi mana kwetu wazeya yatachiki kwinza kukupompa, twatela kumumona ñahi? Chachiwahi, komana Yesu wayimweni ñahi atumbanji twindi hanyima yakumushiya kampinji kantesha? Namuzañalu wayiteneni nindi “ana kwami” nawa wayikuhweleleli. Cheñi nawa wayinkeli mudimu walema nankashi. (Mat. 28:10, 18, 19) Hashimbwili wanyi, atachikili kushimwina nsañu yayiwahi neyena ‘chakubula kuleka.’—Yil. 5:42.
5. Tenenu yuma yitwatela kuhosha nawa eluda kutalisha hadi muntu wazeya?
5 Henohu kanda tutachiki kudiza kwaBayibolu namutu wadiña wazeya hela henohu kanda tumwili mana kwetu wadiña wazeya hadi mpinji yayilehi kuya nindi mumudimu wakushimwina, twatela kulomba wukwashu kudi aeluda. Neyi tuwana mukwakushimwina wazeya mwiluña dakushimwina, twatela kuleja aeluda kulonda atweshi kuhana wukwashu wunakukeñeka.
6. Tunateli kwikala namuzañalu wamuchidinyi hakukwasha antu azeya?
6 Neyi chochahosha Bayibolu chikupu nawu, chiña hohu antu akutemuka nakushika kumufunda diwu akamona wamwinu. (Mat. 24:13) Dichi dinu, shenuku kashinshi kudi antu adimbwishiluwu indi kwiji apwapukili. Neyi tukwimbujola kukeña kwaYehova mukudiwunjika kuhitila hakumwekesha kukeña kwalala kudi antu amuchidiwu, tunateli kutiya kuwaha hakuyimona anatachiki cheñi mudimu wawu wajila hamu nanetu.—Luka 15:4-10.