Tunateli Kukwasha Ñahi Antu Akawanika kuChanukishu?

1. Wunsahwinyi wawuwahi wukahanewa haMarch 22, 2008?

¹ HaMarch 22, 2008, yihita yawantu mwahita kaayi kejima yikatiya wunsahu wawuwahi. Antu akawanika kuChanukishu akatiya nsañu yakukeña kwaYehova kwasweja kwakuloñeshela muchidi wamuntu ifutu danyiloña. (Yow. 3:16) Akadiza haWanta nichakawizatishayi Yehova kulonda kushikija nkeñelu yindi yafuukwilayi iseki dejima. (Mat. 6:9, 10) Akadimwena kukeña nikunuñañana kwekala nawantu jaNzambi nawa akamona chitwakayitwambwila nachisambu.—Mas. 133:1.

2. Tunateli kukwasha ñahi atudizi aBayibolu anawaniki kuChanukishu?

² Atudizi aBayibolu: Amakwawu akawanika kuChanukishu hiyantu yitunatachiki kudiza nawu Bayibolu katataka. Yilumbululenu kudi amana kwatu niahela. Yilejenu mafuku akupompa kwamulungu nimulungu, nawa yinyeñumwishenu kulonda atali Hetala daWanta. Nhoshi wukakolesha atudizi aBayibolu kutwalekahu nakukulilaku lwakuspiritu mumpanji. Munateli kuzatisha mazu anhoshi kulonda kukolesha nachu atudizi enu.

3. Tunateli kukolesha ñahi akwakushimwina azeya anawaniki kuChanukishu?

³ Azeya: Amakwawu akawanika kuChanukishu akekala akwakushimwina azeya. Tachikilenuhu kuyimusha namuzañalu. Bayi muyihujola malwihu hela kuhosha yuma yatela kuyitiyisha nsonyuku. Chimwakahita mafuku hanyima yachanukishu, aeluda atela kuyendela akwakushimwina azeya enjili, yihamekenu hakuwanika kuChanukishu nawa yilejenu cheñi kulonda akawaniki kukupompa kwachipompelu kukalondelahu.

4. Tunateli kukwasha ñahi enyi hamuntu hamuntu?

⁴ Enyi: Amakwawu akawanika kuChanukishu hiyamabwambu jetu hela antaña yitwatambikili. Hadaha amakwawu atambwilili chipapilu chakutambika nachu hampinji yakampeni kadimena. Neyi mumona antu yimwabula kwiluka, tachikilenuhu kuyileja ijina denu nawa yishikijenu. Hadaha kanda awanikeñahu dehi kukupompa kwetu. Hampinji yimunakuhanjika nawu munateli kuyihula kwashakamañawu. Mwatela kuyikolesha kudiza yuma yayivulu nikuyileja neyi akukeña kudiza Bayibolu kuhitila mukuyendela hela kuyitemeshela nshiña chimwahita mafuku antesha hanyima yaChanukishu.

5. Twatela kuhosha netudi hakutachika kudiza Bayibolu?

⁵ Twatela kuzatisha nsañu yamumpanji yaChanukishu kulonda kuyilumbulwila nachu mukanda waChatañishaña Bayibolu hakufuntilaku. Chakutalilahu, nhoshi wampinji yaChanukishu wukataña nsona yaIsaya 65:21-23. Hakufuntilaku, munateli kuhosha hampanji nikumuleja nenu: “Talenu nkisu yikwawu yikaleta ifutu danyiloña.” Kufumahu talenu hamafu 4-5 amukanda waChatañishaña Bayibolu. Hela munateli kuhosha nenu, “Antu amavulu ehulaña mpinji yitwakamona kushikijewa kwawuprofwetu waIsaya.” Kuhiñahu tañenu maparakalafu 1-3 mukapetulu 9. Njila yikwawu yimwatela kutachika kudiza Bayibolu hikutena mazu ahosheliyi nhoshi wampanji yaChanukishu, kufumahu mulejenu mukanda waChatañishaña Bayibolu, nawa mulejenu chakudiza.

6. Kukoolekanyi kutukweti hampinji yitunakwovwahila lunshimbi lwaYesu lwakwanakana kufwa kwindi?

⁶ Dichi wejima wetu twatela kwikala asoñama kulonda kukwasha atudizi aBayibolu, akwakushimwina azeya, nienyi akawanika kuChanukishu. (Luka 22:19) Chakadi nikujina Yehova wakatukiswila hakuzata nañovu mumudimu wetu waWanta.