Yitambwilenu
1. Mpinjinyi yitwekalaña nakukooleka kwakuwahi kwakushimwina wunsahu nawa muloñadi?
1 Kwosi mpinji yitwekalaña nakukooleka kwakushimwina wunsahu chikupu kubadika mpinji yachidika chaChanukishu chahachaaka hachaaka. Toñojokenu chumichi: Achinu chaaka tunakukuhwelela enyi akubadika ku 10,000,000 akenza kuChanukishu nakutiya Nzambi niYesu chamwekesheluwu kukeña kwabadika kuhitila mwifutu danyiloña. (Yow. 3:16; 15:13) Akeluka nkisu yinateli kutambwilawu hamuloña wachawana chaYehova. (Isa. 65:21-23) Hela chochu, bayi neyi nhoshi nkawindi diyi wakahana wunsahu hanidi ifukuku. Wejima wetu tukekala nakukooleka kwakuhana wunsahu chikupu hakutambwila enyi nachisambu.—Rom. 15:7.
2. Tunateli kutambwila ñahi enyi namuzañalu?
2 Chatela mushakami hohu nakuhembelela mpinji yikutachika progiramu, munateli kuleja antu adi kwakwihi ijina denu. Enyi anateli kutiya woma nawa hiyanateli kwiluka chakwilaku. Neyi tumwemweta nikwimusha enyi namuzañalu, anateli kwikala akasuluka. Hakwila mwiluki neyi muntu wenza muloña amwinkeli chipapilu chakutambikilahu antu, munateli kumwihula neyi dikatachi kwinza kukupompa kwetu hela neyi welukahu muntu muchipompelu. Hadaha munateli kuyila kulonda mushakami nawu hakwila muzatishi hamu Bayibolu nimukanda wenu wakamina. Neyi munakuzatisha Itala daWanta, munateli kuyinyeñumwisha kulonda eluki chididi. Mpanji chiyamana, dihanenu kulonda mwakuli malwihu akwihulawu. Neyi chipompelu chenu chikunyakala kwidika kulonda mupompeli amakwawu, munateli kuhosha nenu, “Inakukeña kwiluka yuma yimunakutoñojoka haniyi progiramu. Nateli kuyiwana kudihi?” Diloñeshenu kulonda mukahanjeki nindi ifuku dikwawu. Aeluda atela kwikala asoñama kulonda akoleshi akwakushimwina azeya akenza.
3. Muloñadi chichalemena kutambwila enyi haChanukishu?
3 Enyi amavulu akamona katachi kuwunda, muzañalu nikunuñañana kwadiluñishañawu antu jaYehova. (Mas. 29:11; Isa. 11:6-9; 65:13, 14) Yumanyi yakanukañawu enyi hanyima yaChanukishu? Enyi anateli kwanuka yuma yayivulu kushindamena hayuma yitukela kulonda tukayikwashi.