Antu Akenza kuChanukishu Akatiya Wunsahu Wawuwahi
1. Kubombela hampanji yikahoshawu, yumanyi yikwawu yazañaleshaña enyi haChanukishu? Lumbululenu.
1 Akenza nakutiya wunsahu weniwu hefuku daChanukishu. Nawa tunazati nañovu hakutambika antu kulonda tukapompi nawu. Nsañu yatiyañawu enyi bayi neyi diyayizañaleshaña hohuku. Hanyima yaChanukishu, mumbanda wayili nakupompa wahosheli hayuma yamweniyi, antu adikeña, itala dawu dadiwahi nawa dawunyonji adituñili kudi akwakuzata mudimu wakudikeñela. Dichi, wejima wetu kubombelahu ninhoshi twashimwinaña wunsahu hanidi ifuku dasweja kulema muchaaka.—Efwes. 4:16.
2. Tunateli kushimwina ñahi wunsahu kudi enyi?
2 Yimushenu Enyi naMuzañalu: Tunateli kushimwina wunsahu kuhitila mukumwemweta nikuyimusha enyi namuzañalu. (Yow. 13:35) Hela chakwila mukutwesha wanyi kuhosha nawenyi ejima, munateli kuleja antu adi kwakwihi ijina denu. (Heb. 13:1, 2) Shenuku muchima wakukeñakeña enyi abula kwilukahu muntu. Hadaha atambwili chipapilu chakutambikilahu antu hampinji yakampeni. Munateli kuyihula nenu, “Dikatachi kwinza nakupompa?” Yilenu mushakami nawu nawa akulenu malwihu ejima akuyihulawu. Neyi mukunyakala kwidika muchipompelu kulonda mupompeli amakwawu, munateli kuhosha nenu, “Inakukeña kwiluka yuma yimunakutoñojoka haniyi progiramu. Nateli kuyiwana kudihi?”
3. Tunateli kuyitambwila ñahi azeya?
3 Yitambwilenu Azeya: Chakadi nikujina akwakushimwina azeya akenza, kushilahu niantu enzaña hohu kuChanukishu hachaaka nichaaka. Yitambwilenu nawa yilejenu nenu munazañalali chikupu hakuyimona. (Rom. 15:7) Chimwakahita mafuku, aeluda atela kuyendela kumatalawu nakuyikolesha kulonda atwalekuhu kupompa. Tunakulomba netu antu amavulu akenza kuchanukishu akamulemesha Nzambi bayi neyi hamuloña wayuma yikatiyawu hohuku, ilaña niyuma yakamonawu muloña ‘wanyidimu yetu yayiwahi yamonañawu.’—1 Pet. 2:12.