Chikasha Chamalwihu

◼ Indi kamina kakwenzulwila nachu Shikola yaMudimu waTeokalatiki, Kupompa kwaMudimu, Mpanji yaWantu Amavulu, niKudiza kwaKaposhi Kakutalila atela kukitachika ñahi nawa kudinyi?

Ntanjikilu yakamina kakwenzulwila Shikola yaMudimu waTeokalatiki yamulungu nimulungu ayisha muNdandanda yaShikola yaMudimu waTeokalatiki yekalaña muchamukachi chaMudimu Wetu waWanta waOctober. Tumina twakwenzulwila nikukumisha nachu Kupompa kwaMudimu atwishaña hefu 2 muMudimu Wetu waWanta. Chochimu, naambala yatumina twakuzatisha haKudiza kwaKaposhi Kakutalila kwamulungu nimulungu twekalaña hefu 2 muKaposhi Kakutalila kadi kejima. Tumina tuyatanjikawu twesekana hamu nampanji yamukupompa nawa atela kukitachika kudi mana kwetu wunakulombola kupompa bayi neyi kudi Nkoñi waShikola hela cheyamani waKupompa kwaWantu Amavuluku.

Chakutalilahu, nkoñi waShikola yaMudimu waTeokalatiki wukashikija izaza, nakutena kamina kakwenzulwila, kulombola shikola, nikutambika nhoshi watachi wamuKupompa kwaMudimu kwinza hachinañamu. Mana kwetu wudi nampanji yamuKupompa kwaMudimu diyi wukutena kamina kakwenzulwila nachu Kupompa kwaMudimu.

Munjila yoyimu, Kupompa kwaWantu Amavulu atela kukwitachika kudi cheyamani. Wukashikija izaza dejima namuzañalu nikudileja kwimbila hamu kamina kanatonduwu kudi nhoshi. Cheyamani (hela mana kwetu mukwawu washikahu alejelawu chadimu) wukenzulula kupompa nakulomba. Kulondelahu wukutena nhoshi nikushimuna mutu wampanji yindi. Neyi mpanji yinamani, cheyamani hatela kuhosha cheñi yikuma yamumpanji yanhoshuku, ilaña wukahosha hohu mazu antesha akuhameka hakufumba. Wukashimuna mutu wampanji yawantu amavulu yamulungu wukalondelahu, kuhiñahu wukaleja izaza kubalumukila kuKudiza kwaKaposhi Kakutalila. Hichinakukeñeka cheyamani kwihula izaza neyi anakukeña kutemesha mutendi kuchipompelu kwafuma nhoshuku. Kufumahu, cheyamani wukatambika mukwakulombola kudiza kwaKaposhi Kakutalila kwinza hachinañamu.

Mukwakulombola Kudiza kwaKaposhi Kakutalila wukashimuna kamina katachi kakwimba kanesekani nakudiza. Wukalombola kudiza kwesekeja nanshimbi jasonekawu nawa watela kushimuna kamina kakukunkulula nachu. Kakavulu mukwakulombola Kudiza kwaKaposhi Kakutalila wukatambika mana kwetu wahana mpanji yawantu amavulu kwinza nakulomba kwakukumishaku.

Kulondela nshimbi yejimiyi yikutwikwasha kumona kwila nawu kupompa kwetu kunalombolewi munjila yayiwahi.