Ndandanda Yayiha yaKupompa kwaChipompelu
1, 2. Kutachika muJanuary 2009, kukekala kuhimpikanyi kutalisha hakupompa?
1 Mumulungu waApril 21-27, 2008 amana kwetu amukaayi kejima atiyili kubidika kwakuzañalesha. “Kutachika haJanuary 1, 2009, Kudiza kwaMukanda haChipompelu kukekalaña hamu naShikola yaMudimu waTeokalatiki niKupompa kwaMudimu. Ijina daKudiza kwaMukanda haChipompelu akadihimpa nakwikala Kudiza kwaBayibolu haChipompelu.”
2 Ndandanda Yakunu Kupompa kwaMulungu niMulungu: Kuleha kwampinji yejima yakunu kupompa kushilahu tumina nikulomba, yikekalaña ora yimu najiminiti 45. Kupompa kwakatachikaña nakamina nikulomba (Jimin. 5), kuhiñahu Kudiza kwaBayibolu haChipompelu (Jimin. 25). Kufumahu hakalondelaña Shikola yaMudimu waTeokalatiki ya (Jimin. 30). Kuhiñahu, (Jimin. 5) jakamina kakutachika nachu Kupompa kwaMudimu kwa (Jimin. 35). Kupompa kwakamanaña nakamina nikulomba (Jimin. 5). Hakwila chikayikwasheñaku kuloñesha iku kupompa, ndandanda yaKudiza kwaBayibolu haChipompelu, Shikola yaMudimu waTeokalatiki, niKupompa kwaMudimu akayisonekaña muMudimu Wetu waWanta hakakweji nikakweji.
3. Indi Kudiza kwaBayibolu haChipompelu akukwilombolaña ñahi?
3 Kudiza kwaBayibolu haChipompelu: Iku kupompa akakwilombolaña neyi chalombolañawu kudiza kwaKaposhi Kakutalila. Hichikakeñekaña kuhituluka munsañu yimwadizili mumulungu wunamanuku. Hela chochu, ntachikilu yakupompa yatela kwikala yayihi chikupu. Ichi chikaleteshaña ejima anapompi kwikala nampinji yakuhoshahu chantesha. Nkoñi wakutwaminina wukekala namudimu wakwinka aeluda ashiyashana mudimu wakulombola iku kupompa, kuzatisha eluda wacheñi mulungu nimulungu.
4. Indi Kupompa kwaMudimu kukahimpika munjilanyi?
4 Kupompa kwaMudimu: Kupompa kwaMudimu kukekala neyi chochikwekalaña hadikalu, ilaña mpanji jikekalaña jajihi. Yakubidika kakavulu yikekalaña najiminiti jitanu. Iyi mpinji yinateleli kubidikilamu nsañu yalema ninyikanda yikwawu yafumaña kukasanji kamutayi. Yakubidika yidi neyi kuhumañana kwakudiza yuma yamumudimu wamwiha, ndandanda yakuwahisha, lipoti yamali, ninyikanda yimwatañaña mafuku ejima yakufuma kukasanji kamutayi hiyikakeñekaña kuyitañila hachinañamuku, ilaña mwakayilamikaña habodi himwalamikaña nsañu kulonda amana kwetu akatañeña. Ejima anenkuwu mpanji muKupompa kwaMudimu atela kuloñesha chachiwahi, nikulondela nshimbi jatanjikawu nikukakela nankashi kumpinji yinayinkuwu.
5. Indi ndandanda yakupompa kwachipompelu yikekalaña ñahi mumulungu wakuhempula kwankoñi wañinza?
5 Kuhempula kwaNkoñi waÑinza: Ndandanda yamulungu wakupompa kwankoñi wañinza yakahimpika wanyi. Hachiyedi kukekalaña Shikola yaMudimu waTeokalatiki niKupompa kwaMudimu, kuhiñahu kamina. Kufumahu nkoñi wañinza wakahosha mpanji yajiminiti 30. Neyi chochichidi katataka mulungu wakuhempula kwankoñi wañinza, ifuku dikwawu dakekalaña daKudiza kwaBayibolu haChipompelu kuhiñahu kamina nimpanji yamudimu nankoñi wañinza. Kupompa kwakamanaña nakamina nikulomba.
6. Mudimwinyi wukwetiyi mukulumpi wezanvu?
6 Kuhumañana kwaMudimu waMwiha: Akulumpi amazanvu akayitonda kudi izaza dawaeluda kulonda kwakamena mudimu wamwiha nikubiña antu amwizanvu. Neyi chakwila nkoñi wakuzatila diyi wunakwakamena iwu mudimu, mwatela kumutena nenu “nkoñi wezanvu.”
7. Chumanyi chitwatela kutalila kutalisha handandanda yayiha yakupompa kwachipompelu?
7 Neyi chinamwekeshuwu, twakekalaña nakukooleka kwakudiluñisha chawija chakuspiritu chachiwahi hampinji yakupompa. Ichi chikutukwasha kwikala akwakushimwina niantañishi akuluka yitembi, adizishewa kuzata mudimu wakushimwina wasoñaña nyikabu chikupu.—Efwes. 4:13, 14; 2 Tim. 3:17.
8. Indi kuloñeshela chadimu halwetu kukatukwasha ñahi niamakwawu?
8 Kuloñeshela chadimu nsañu yakudiza hakupompa kukutukwasha kushinshika chikupu hayikuma yamaneni yikahoshawu hakupompa kwejima. Wejima wetu twakekala nakukooleka kwakuhoshahu kulonda kudikolesha. (Rom. 1:11, 12; Heb. 10:24) Chikokwanyi chetu chidi ‘chakudimwekesha chitunakuyilaku hambidi’ chakuhitila ‘mukulumbulula mazu ansañu yalala mwayawu mwayawu.’—1 Tim. 4:15; 2 Tim. 2:15.
9. Tunafukuluhu kwiladi, nawa muloñadi?
9 Tunatiyi kuwaha haniku kuhimpa kwalema kwakupompa kwetu kwachipompelu. Dichi wejima wetu tuzatisheña chikupu iwu wunlomboli wunatuloñesheli ‘nduñu wamaana nikashinshi’ nakukundama kudi Kabiña ketu Muneni chinakutufumbayi kutalisha ‘hayihuñu’ yeneni yidi kwakwihi.—Mat. 24:21, 45; Heb. 13:20, 21; Chim. 7:14.