Progiramu Yayiha yaKupompa kwaÑinza

Yehova watelela kumulemesha. Munjilanyi mutwatela kumulemeshela Yehova? Yumanyi yayikañeshaña amakwawu kubula kumulemesha Yehova? Nkiswinyi yatambwilañawu antu anakumulemesha Nzambi makonu? Progiramu yakupompa kwañinza yachaaka chamudimu cha 2008 yikahana ñakwilu yakumanisha mpwila yanawa malwihu. Mutu waprogiramu yakupompa kwañinza wunakuhosha nawu ‘Ilenu Yuma Yejima Kulonda Kulemesha Nzambi.’ (1 Kor. 10:31) Toñojokenu hayuma yinatuloñesheluwu hakupompa kudi hambidi kwamafuku ayedi akufumba kwakuwahi kwakuspiritu.

Nkoñi wankambi wukahosha mpanji yidi namutu wunakwila nawu “Muloñadi Wutwatelela Kumulemeshela Nzambi?” ‘niIkalenu naChakutalilahu chaChiwahi haKushikija Yuma Yakeñañayi Nzambi.’ Wakahana cheñi mpanji yawantu amavulu yikahoshaña nawu, “Anyi Anakumuhameka Nzambi Makonu?,” nimpanji yakukumishaku yikahoshaña nawu, “Ikalenu Anuñañana haKumulemesha Nzambi Mukaayi Kejima.” Cheñi nkoñi wankambi wakalombola Shikola yaMudimu waTeokalatiki. Nkoñi wañinza wakahosha hanyitu yampanji yinakwila nawu “Tiyenu Kuwaha Hakumwekesha Kulema kwaNzambi,” “Kuta Maana Kuyuma Yinakukeñeka muÑinza,” “‘Kolelenu muNsañu Yalala,’” yikashindamena ha 2 Petulu 1:12. Kubombelahu, tukadiza cheñi “Mudimu wawuPayiniya waMulemeshaña Nzambi.” “Twatela Kumulemesha Nzambi Muyuma Yejima yaMuchihandilu Chetu,” mpanji yatachi yahajimpanji jiyedi jakulondashana jakusañumuna chikupu, yikalumbulula chiwahi mazu akunama onenawu ekala ha 1 Akorinda 10:31. Mpanji yakulondashana yikahoshaña nawu “Kukalakala Mudimu Wajila Kulonda Kumuhameka Yehova” yikahosha hayuma yashiyashana yakudifukula kwetu. Twakadiza cheñi Kaposhi Kakutalila mukwihihisha nikuhanjeka hansona yefuku hamulungu. Cheñi nawa kwakekala chipapatishu.

Antu amavulu hiyanakukeña kumwiluka Nzambuku. Amavulu anahuñumuki chikupu nakufuukula kwawantu chakwila anakañanyi nikutoñojoka hayuma yayiwahi yaYehova. (Yowanu 5:44) Ilaña etu tuneluki chikupu kulema kwakwikala nampinji yakutoñojoka ‘Chakwila Yuma Yejima Kulonda Kulemesha Nzambi.’ Diloñeshenu kulonda mwakawanikiku nawa mwakahetelumu chikupu muyibalu yejima yiwana.