Diloñeshenu Chikupu Kuwanika kuChanukishu
Chaletaña muzañalu nikalemesha kudi atumbanji twaKristu kudiloñesha chikupu hawufuku wutwanakanaña kufwa kwaYesu Kristu. (Luka 22:19) Yumanyi yayiwahi yitwatela kwila hakuloñesha ifuku daChanukishu?
◼ Iluña niMpinji: Antu ejima atela kwiluka chikupu mpinji niiluña dadeni kwakekalila Chanukishu. Neyi yipompelu yayivulu yikazatisha Itala daWanta dimu, chalema kutachika kupompa mumpinji nikwidika munjila yayiwahi chineli hakahitaña mpinji yantesha hakwila nawu chipompelu chikwawu chitachiki kupompa. Mwatela kuzata nañovu kulonda kubula kudichima hayisu, munjila nihamaluña hakwimikila nyotoka.
◼ Yipapilu Yakutambika Nachu Antu: Komana akwakushimwina ejima akweti yipapilu yawu yakutambika nachu antu, nawa aneluki chakuyizatisha? Munahitulukumu chakuhana iyi yipapilu? Anyi yimwakenka iyi yipapilu? Mwatela kuzata nañovu kulonda kuhana yipapilu yejima.
◼ Ñendelu: Antu amakwawu akweti mpwila yakudiza chalala hamu tuhu niamana kwetu niahela amavulu atela kukeña wukwashu muñendelu hela muyuma yikwawu. Munaloñeshi ñahi kulonda kuyikwasha?
◼ Yifwikija: Mwatela kwiluka nenu yifwikija akayihitishamu neyi itañwa dinahumi dehi. Mwatela kuloñesha kulonda kuya nakuhana yifwikija kudi wawayishewa wakata, wunakañanyi kwinza. Mwatela kuloñeshela chadimu mankendi nivinyu yinakukeñeka kulonda kuyizatisha.—Talenu Kaposhi Kakutalila kaChibemba kaFebruary 15, 2003 mafu 14-15 parakalafu 14, 17.
◼ Itala daWanta: Mwatela kuwahishila chadimu itala dawanta chachiwahi. Mwatela kuletelañahu dehi yeña yamawumba, malupasa, mesa yayiwahi niihina dahamesa mwitala dawanta. Neyi mwakazatisha itala dawanta wanyi, mwatela kwiluka nenu yihoshelu yayiwahi yidi kwoku kulonda ejima adi mwizaza akatweshi kumutiya nhoshi. Atulama niakwakuhitishamu yifwikija atela kuyilejela chadimu kutalisha hamudimu wawu, njila yatela kulondelawu ninvwalilu yayiwahi nimmwekenu.
Hanidi ifuku dalema daChanukishu chakufwa kwaYesu Kristu, twatela kudiloñesha chikupu neyi chipompelu nihamuntu hamuntu. Chakubula kujinooka, Yehova wakakiswila antu ejima ahamekaña chikupu yuma yejima yayinkayi antu kuhitila mumulambu waMwanindi wakeñayi, Yesu Kristu.